Fjildtocht

In fjildtocht, militêre kampanje of offinsyf is in rige oanienslutende gefjochten (skermutselingen, fjildslaggen en/of belegerings) dy't útfierd wurde troch ien en deselde legermacht. It is mooglik dat de legermacht dy't op fjildtocht is tuskentiids fuortsterke wurdt mei farske troepen, en ek kin it wêze dat in fjildtocht útfierd wurdt troch ferskate legermachten dy't yn koördinaasje mei-inoar operearje. Mar it as ferskate legermachten folslein los faninoar operearje of as in legermacht út it fjild helle en folslein ferfongen wurdt, kin men net mear fan ien fjildtocht sprekke.

Faak falt in fjildtocht gear mei in beskate faze fan in oarloch, bygelyks as fijannich gebiet stapsgewiis ferovere wurdt. Net alle gefjochten yn in fjildtocht hoege wûn te wurden om 'e fjildtocht sels te winnen; it kin wêze dat men nei in tydlike tebeksetter dochs noch de einoerwinning behellet. In slimmen nederlaach betsjut lykwols yn 'e measte gefallen de ein fan 'e fjildtocht; men seit dan dat de fjildtocht 'fêstrûn' is. De tiidsdoer fan fjildtochten ferskilt. Sa'n operaasje moat sûnder mis ferskate dagen duorje om in fjildtocht neamd te wurden, mar kin ek maklik wiken of moannen duorje. Yn guon gefallen kin soks sels oprutsen wurde oant jierren.

Foarbylden fan bekende fjildtochten binne:

• de Tocht nei Moskou (1812-1813), it besykjen fan Napoleon om Ruslân te feroverjen
• de Tsiendeiske Fjildtocht (1830), fan it Nederlânske leger tsjin 'e opstannelingen ûnder de Belgyske Opstân
• de Bighorn-ekspedysje (1876), fan it Amerikaanske Leger tsjin 'e Lakota en de Noardlike Sjajinnen yn it noarden fan Wyoming en it suden fan Montana
• de Achttjindeiske Fjildtocht (1940), de ferdigening fan it Belgyske leger tsjin 'e Dútske ynfal oan it begjin fan 'e Twadde Wrâldoarloch
• Operaasje Barbarossa (1941-1943), it besykje fan nazy-Dútslân om de Sovjet-Uny te feroverjen
• it Ardinnenoffinsyf (1944-1945), it lêste besykjen fan nazy-Dútslân om 'e westlike Alliëarden werom te smiten

Boarnen, noaten en referinsjes