From Wikipedia, the free encyclopedia
In teister of eachteister is by minsken en oare sûchdieren ien fan 'e stive, boarstelige hierkes dy't yn twa rigen by de úteinen fan it boppeste en ûnderste eachlid lâns groeie. Yn it deistige spraakgebrûk wurdt mei "de teisters" faak inkeld nei de begroeiïng fan it boppeste eachlid ferwiisd.
De biologyske funksje fan teisters is om stofdieltsjes en oare smoargens bûten it each te hâlden. Sadwaande binne se tige taastgefoelich; as se ek mar troch it minste of geringste beroerd wurde, soarget in refleks dat it each daliks tichtgiet. Mei't teisters gauris fernijd wurde en de âlde hierkes dan los reitsje, komt it lykwols geregeldwei foar dat teisters sels it each op in tige yrritante manear besmoargje.
Teisters bepale in wichtich diel fan 'e eachopslach, en fral by froulju wurde se oer it algemien as moaier ûnderfûn neigeraden dat se tsjûker en langer binne. Sadwaande meitsje froulju (en inkeld manlju ek wol) de teisters op troch it gebrûk fan dûnkerkleurige maskara, dat se dúdliker sichtber makket. Foar datselde doel besteane der ek keunstteisters, dy't oan in plakrâne sitte dy't men op it eachlid plakke kin. Soms kinne teisters yngroeie of kinne teisterhierpûdsjes ûntstutsen reitsje. Dan kriget men in bobbeltsje op it eachlid dat yn 'e folksmûle in "strontsje" neamd wurdt.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
