Varon Atacin

Publi Terenzi Varon Atacin (par latin Publius Terentius Varro Atacinus; Atax, 82 p.d.C. - 40/35 p.d.C.) fo un poete roman antîc.

La poesie

Seont la tradizion tal 47 p.d.C., ma forsit plui adore, al studià la leterature greghe, o la lenghe (no si sa ben), e forsit al tacà in chê volte a poesiâ te maniere dai neoterics, o poetae novi. Difat o savìn che al butà fûr sedi oparis cun chel stîl, come la Leucadia, vadì composizions d'amôr no masse lungjis e metudis su cun finece e erudizion, sedi altris che cun chel genar no a jentravin par nuie, leadis a mûts di scrivi plui vieris, come il Bellum Sequanicum, un poem che al cjantave la vuere di Juli Cesar cuintri Ariovist, e lis sataris, che no a plasevin a Orazi par jessi compagns a chês pôc elegantis e aromai za ladis in vieri di Lucili. Poems 'nd' scrivè ancje di gjeografie, la Chorographia, e di strolegheçs, la Ephemeris, cence contâ il plui impuartant, vadì la version latine des Argonautichis di Apoloni Rodi, che e jere un pôc neoteriche, par vie de erudizion e des vicendis d'amôr che j parà dentri, e un pôc no, par jessi masse lungje e par vê une struture masse classiche e tradizionâl.

Bibliografie

• Paolo Fedeli, Storia letteraria di Roma, Napoli, Ferraro, 2004
• Ettore Paratore, Storia della letteratura latina, Bologne, Sansoni, 1957

Leams esternis

• Varrone Atacino, treccani.it