Segnaletiche bilengâl
From Wikipedia, the free encyclopedia
La segnaletiche bilengâl (o ben par estension multilengâl) e je costituide de rapresentazion intun panel segnaletic di tescj in dôs o plui lenghis. L'ûs de segnaletiche bilengâl e je par solit riservât a lis areis dulà che e je presinte une minorance lenghistiche o dulà che a vivin dongje popolazion cun diviersis marilenghis, o a puescj dulà che si cjate un notevul flus turistic e comerciâl (aeropuarts, stazions, puarts, ponts di confin, citâts turistichis, itineraris internazionâi, sêts di autoritâts internazionâls). Intun sens plui larc chest tiermin al inclût ancje, in regjons dulà che si dopre un alfabet diviers di chel latin, la transliterazion dai toponims e la eventuâl traduzion dai tescj complementârs intun altre lenghe (par solite inglês o francês). In gjenerâl, la tendince e je chê di meti al puest des indicazions in plui lenghis (che a puedin rindi la comprension de segneletiche un grum piês) pituris e simbui seguint standards ricognossûts a nivel internazionâl. L'ûs di une segneletiche bilengâl al è salacor il prin e il plui evident imprest simbolic di percezion e di afermazion de realtât multilengâl di un teritori.