Brar C. Roeloffs

Brar Cornelius Roeloffs kām ön di 14. Oktoober 1928 ön Süđerjen/Föör tö Wārel en storev di 22. Marts 2013.

Di Bidrach "Brar C. Roeloffs" staant eksklusiif ön di Nuurđfriisk Wikipedia!

Söl'ring

Brar Roeloffs

Bruarwening

Sin Bruarwening wiar di Buererii, diar hi ön di Hofstair fan sin Faađer bit 1955 eeđergingen es. Hi studiareti da Agrārweetenskep en kür diareeđer bal wichtige Kontoorsaarberen bi't Bundslön' aurnem. Sa waar hi Ministeriālreer fuar Agrarstruktuur iin ön't Kiiler Buereriiministeerium. Fuar en Jaar wiar hi uk jit Referent bi't Bunds-Buereriiministeerium.
Fan dit Jaar 1990 ön holp hi ön di nii Bundslönen en bech di Buererii diar nii āp, wat fuar't Miist hiilendal nii Struktuuren nöörig her. Uk di Kontoorsbirik iin ön di Ministeerien kür sin Help gur brük, dat ja beeter me di Foraneringen klaarkum kür. Diarom giar Roeloffs 1990 naa Mecklenburg-Vorpommern en waar Staatssekreteer iin ön't Schweriner Buereriiministeerium. Diar kām ön di fjuur Jaaren, diar hi diar wiar, masi bi üt, en Brar C. Roeloffs fing 1998 dit Bundsfortiinstkrüts fan di jest Klasi ön't Bjen.

Aarber fuar Dokumentatsjoon en Archiif

Brar "Botje" Roeloffs her al jer en Saamling aur di Histoorii fan di Buererii en Menskhair üp Föör bigent. Bi forskeligi Stiftingen wiar hi Meföligster en uk Reersman fan't Fak. Bi't Nordfriisk Instituut wiar iin ön di Foriinings-Biraat (1996 - 2012).

Hi braacht masi Dokumenti aur di Buererii üp Föör hentö't Archiif fan't Instituut, en 1996 taacht hi höm en "Hofstairen-Archiif" üt. Des Taacht kām sa gur ön, dat dit Instituut en Projekt aur't hiili Lön' Sleeswig-Holstiin bigenti: „Wegweiser zu den Quellen der Landwirtschaftsgeschichte Schleswig-Holsteins“.
Roeloffs wiar Iarenmeföligster fan't Nordfriisk Instituut.

Boker en Skreften

Brar C. Roeloffs heer uk bi Bokern meholpen, we'er hi di ek salev skref, sa üs:

• Nordfriesische Quellen und Studien, Band 8: Vom Schiffsjungen zum Kapitän: Lebenserinnerungen eines Föhrer Seefahrers Uwe E. Johannsen (Ütdönen), Ingke O. Ketels (Ütdönen), Brar C. Roeloffs (Ütdönen), Ferring Stiftung in Alkersum auf Föhr (Ütdönen), Ernst J. Ketels-Harken (Autor)
• Bauern, Seefahrer und Auswanderer von der Insel Föhr / Geschlechterreihen St. Laurentii-Föhr, TEIL IV/4 (Nordfriesische Quellen und Studien, Band 6), skrewen fan Brar C. Roeloffs
• Föhrer Grönlandfahrer, skrewen fan Broder Riewerts en Brar C. Roeloffs (1996)
• Von der Seefahrt zur Landwirtschaft: Ein Beitrag zur Geschichte der Insel Föhr, skrewen fan Brar C Roeloffs (1985)
• Westerlandföhr und Amrum im 18. Jahrhundert. Eine regionalspezifische Studie aufgrund der Volkszählungen 1769 und 1787 in St. Laurentii und St. Clemens, skrewen fan Brar C Roeloffs en Knud Wilke
• Nachkommen von Christian Diederich Roeloffs (1801 - 1885) Sonderbeilage zu: Von der Seefahrt zur Landwirtschaft fan von Brar C. Roeloffs (1985)

... en jit muar.

Luki uk jir

• Presibiskiir fan't Nordfriisk Instituut
• Brar C. Roeloffs bi Amazon

Iinfach bi't Nordfriisk Instituut fraagi, of bi Amazon "Brar C. Roeloffs" iindö. Da ken em jit langsen bi di Bokerlaaden itüüs fraagi, we'er dit bistelt uur ken.