Marianna Debes Dahl

Marianna Debes Dahl (fødd 24. november 1947 í Vestmanna) er føroyskur rithøvundur.

Hon hevur útbúgving sum lærari, men hevur starvast sum rithøvundur burturav nú í nøkur ár. Hon hevur verið virkin á vinstravonginum og var partur av lítla blaðbólkinum, sum frá 1983 til 1993 gav út blaðið Fríu Føroyar, hvørs undirheiti var "Friður - umhvørvisvernd - sosialistiskt tjóðveldi. Hon hevur umframt at skriva bøkur eisini framleitt ein hóp av sendingum til Útvarp Føroya. Fyrsta bók hennara var Burtur á heiði, ein barnabók, ið vann fyrstu virðisløn í kapping um at skriva barnabók.

Marianna er dóttir gamla landslæknan Hanus Debes Joensen (1913-1995). Hon fór 12 ára gomul til Danmarkar at ganga í skúla. Í 1971 kom hon heim aftur og fór í Læraraskúlan, haðani hon tók læraraprógv. Hon starvaðist í mong ár sum lærari, men hevur seinni roynt seg í øðrum størvum eisini. Marianna hevur verið virkin á mongum økjum, t.d. í Rithøvundafelag Føroya, Listafólkasambandinum (LISA), innan friðarrørsluna og í rørsluni ímóti rasuskilnaði (apartheid). Hon hevur verið sera virkin høvundur innan mong tekstasløg. Hon hevur skrivað smábarna- og barnabøkur, bøkur fyri ung, stuttsøgur, skaldsøgur, ferðafrásagnir, leikir, hevur týtt og ummælt, skrivað, týtt og lagt til rættis nógvar ljóðmyndir, sum Útvarp Føroya hevur sent. Hon er gift við Árna Dahl, tey eiga tvey børn: Tóta Árnadóttir, (fødd 1970) og Teitur Árnason, (føddur 1972).

Ritverk

Skaldsøgur

• Blá Mascara 1980
• Lokkalogi, Forlagið Fannir, 1984
• Onglalag, 1986
• Faldalín 1988
• Vívil 1992

Ævisøgur

• Úti á leysum oyggjum, 1997

Stuttsøgusøvn

• Lepar, 1980
• Millumleikur, 1978
• Fløkjan, 1978
• Síðsta skúlaárið, 1980

Barnabøkur

• Burtur á heiði, 1975
• Dirdri, 1979
• Skilnaður, 1981
• Prikkut vár, 1989 (ikki útkomin enn)

Smábarnabøkur

• Bjarta og snigilin, 1983
• Døgg er dottin, 1984
• Hanna og Hóri, 1984
• Hóri letur upp, 1986
• Sturli súkklar, 1985
• Alvi er og ferðast, 1986
• Tunnuflakin, 1990
• Flosi fer í føðingardag, 1990 (ikki útkomin enn)

Myndabøkur

• Sonurin, 1990 (La Filo á esperanto)

Lesibøkur

• Ása fer í skúla, 1983

Ferðafrásagnir

• Latið altíð sólina skína, 1982

Leikir

• Skálatoftir, 1979 (saman við J.S. Hansen)
• Bardagabørn, 1990

Týðingar

• Uppreisnin, 1982, søgur úr Suðurafrika

Týtt og lagt til rættis ljóðmyndir til útvarpið

• Victor (um sangaran Jara úr Kili)
• Monir (úr Iran)
• Chico Mendes (úr Brasilia)
• Miriam Makeba (úr Suðurafrika)
• Menn undir sól (úr Palestina)
• Zosia (sovjetisk søga úr 2. heimsbardaga)
• Tað langa brævið (úr Senegal)
• Edith Piaf (úr Fraklandi)

Heiðurslønir

• Barnabókavirðisløn Tórshavnar Býráðs, 1978

Keldur

• Rithøvundafelagi Archived 2016-03-05 at the Wayback Machine