Bøur

Bøur er ein bygd í Føroyum, ið er í Vágum vestan fyri Sørvági á norðara armi á Sørvágsfirði.

Bøur
Bø (danskt)
Bygd
Bøur í 2014.
Land	Føroyar
Sýsla	Vága sýsla
Oyggj	Vágar
Kommuna	Sørvágs kommuna
Íbúgvar	69 (2015)[1]
Postnummur	FO-386
Markatal	18-00-00

Tey gomlu húsini í bygdini liggja í einum trunka við smølum túnum ímillum, og vestast stendur hugnaliga Bíggjar kirkja, sum er bygd í 1865. Útsýnið út móti Tindhólmi, Gáshólmi og Drongunum er helst tað stórbærasta og vakrasta í Føroyum. Fram við strondini er ein lítil sandur, og síðan 1972 er loyvt at drepa grind her.

Bøur er gomul bygd, nevnd í Hundabrævinum frá um 1350, men er helst væl eldri. Hon er eisini gomul kirkjubygd, og í skrivligum keldum er nevnt, at kirkja var í Bø í 1710. Nær fyrsta kirkjan í Bø varð bygd er ikki greitt.

Eiriksboði

Tann kendasta søgnin úr Bø er um arvastríð. Tveir brøður, Símun og Eirikur, áttu alla jørðina í bygdini í felag, og Eirikur strongdi á at fáa býtt teirra millum. Tað endaði við, at Eirikur drap Símun og fór til bispin í Kirkjubø at lýsa víggið. Bispur lovaði honum fyrigeving, um hann gav kirkjuni og bispi góðar bøtur. Eirikur játtaði, og semjan varð skorin á eitt trækelvi. Eirikur so vestur aftur, og komin inn um Sund, helt hann seg vera komnan úr øllum vanda, men tá reistist ein boði seg og holvdi bátin, og Eirikur druknaði. Boðin eitur Eiriksboði og liggur innan fyri Tindhólm stutt úr landi.

At stjala eld

Eigindómurin í bygdini er 18 merkur innan- og uttangarðs, og av hesum eru 13¼ mørk kongsjørð og 4¾ mørk óðalsjørð. Ein søgn sigur frá, hvussu tað bar til, at meginparturin av jørðini fór undir kong. Tá hevur bygdin verið lítil, kanska bert tann eini garðurin. Eldurin á grúgvuni var útkólnaður, og fyri at fáa eld aftur mátti farast í grannabygdina at biðja lív,og hetta var hildið at vera skomm. Ein arbeiðskona var send inn til Sørvágs við ílæti at bera eld í. Eingin var inni, og hon tók nakrar gløður av grúgvuni og fór so rennandi aftur til Bíggjar. Men tá ið hon kom nakað áleiðis, fór at rúka úr ílætinum, og hetta var sætt úr Sørvági og meldað til myndugleikarnar. Tá fór henda jørðin undir kong.

Myndasavn

• 
  Frímerki frá 2003.
• 
  Frímerki frá 2005 hjá Eli Smith.
• 
  Bøur
• 
  Útsýnið út móti Tindhólmi, Gáshólmi og Drangunum.
• 
  Í Bø.
• 
  Bøur og Sørvágsfjørður
• 
  Bíggjar kirkja er frá 1865.
• 
  Inni í kirkjuni.
• 
  Tríggjar goymslur.
• 
  Byggja eina goymslu enn?

Kelda

1. Hagstova.fo

• Faroestamps.fo - Bøur Archived 2007-09-30 at the Wayback Machine

Wikimedia Commons logo

Sí miðlasavnið

»Bøur« í Wikimedia Commons.

{{{mynd}}}

Sørvágs kommuna

Bøur · Gásadalur · Mykines · Sørvágur