Parqui Natural

Un Parqui Natural es aquel espáciu natural con caraiterísticas biolóhicas u paisahísticas especialis que les hazin tenel una especial proteción i determinás huncionis (recreativa, centífica...), teniendu especial cudiau ena conservación i mantenimientu las sus cualiais.

Parqui Natural de Cornalvu.

Los Parquis Naturalis puein sel marítimus u terrestris i puein alcuentralsi ena montaña, nel mari, el desieltu u cualisquiel otru espáciu definiu heográficamenti.

En España se hazi una destinción entri "Parqui Natural" i "Parqui Nacional". Al contráriu de lo que sueli pensalsi, las categorias d'espácius naturalis protehius en España (Lei 4/1989) nu se basan en niveles mayoris u menoris de proteción, polo qu'el Parqui Nacional nu es la fegura de mayol proteción. Se basa enas sus huncionis i caraiterísticas, que son:

• Parquis: árias naturalis, pocu trasholmás pol esprotaeru u asiahamientu umanu que, en razón a la belleça los sus paisahis, la representativiá los sus ecosistemas u la su frora, la su fauna u las sus holmacionis heomorfolóhicas, posein unos valoris ecolóhicus, estéticus, eucativus i centíficus cuya conserváncia mereci atención preferenti. Un Parqui Nacional lo es pol sel d'enterés nacional en razón de que seya representativu del patrimoñu natural i de qu'encruya angunu los prencipalis sistemas naturalis españolis.

• Reservas Naturalis: espácius naturalis cuyu criaeru tiini pol fin la proteción d'ecosistemas, comuniais u elementus biolóhicus que, pol sel rarus, frahilis, emportantis u singulariá merecin una valoración especial.

• Monumentus Naturalis: espácius u elementus de la naturaleza costituius básicamenti pol holmacionis de notória singulariá, merecin sel ohetu de proteción especial.

• Paisahis Protehius: lugaris concretus del meyu natural que, polos sus valoris estéticus i curturalis, seyan mereceoris d'una proteción especial.

Dendi el pubricaeru la Lei 4/1989, la hestión de los Parquis Nacionalis se hazia endi el Estau pol mé d'una comisión mesturá de hestión. La hestión de los Parquis Naturalis es de las Comuniais Autúnomas. Ebiu a un recursu presentau pol Andalucia i Aragón, i amparándusi en qu'el Parqui Nacional de Aigüestortes i Estany de Sant Maurici estaba bahu competéncias de Cataluña, s'á reconociu qu'ebi sel igual pa tolos Parquis Nacionalis. Pol ellu, uguañoti s'está a l'aspera d'un regulaeru específicu i traspasu de competéncias (Agostu de 2006).

Un sabulugal de Parqui Natural marítimu-terrestri es el de Cabo de Gata en Almeria.

El mayol espáciu protehiu d'España i amás, Parqui Natural, es el Parqui Natural de la Sierra de Cazorla, Segura y Las Villas, ena província e Haén, ondi tiini la su nacéncia riu Guadalquivil.

Atihus

• Parquis Naturalis d'España
• Parquis Naturalis, Nacionalis i espácius protehius d'España.