Pirinioetako Parke Nazionala

Pirinioetako Parke Nazionala (frantsesez: Parc national des Pyrénées) frantziar Estatuaren hegoaldean dagoen eremu babestu bat da, Pirinioetako mendikatean. Parke nazional gisa izendatua dago frantses legediaren arabera. Pirinio Garaietako departamenduaren (Midi-Pyrénées eskualdea) eta Bearnoren (Akitaniako eskualdea) artean dabil dantzan.

Pirinioetako Parke Nazionala
II. maila: parke nazional
Datu orokorrak
Mendirik altuena	Viñamala
Mota	parke nazional eta naturagune babestua
Azalera	457 km²
Geografia
Koordenatuak	42°49′39″N 0°10′33″W
Estatu burujabe	Frantzia
Frantziaren banaketa administratiboa	Metropolitar Frantzia
Eskualdea	Okzitania
Departamendua	Pirinio Garaiak

Estatu frantsesean parke nazional izendapena dute 9 eremuetako bat da. Hegoaldean, Ordesa eta Perdidoko parke nazionalarekin egiten du muga (Espainiako lurretan); ekialdean, berriz, Neouvielleko Natur Erreserbarekin.

Geografia

Pirinioetako Parke Nazionalak 45.707 ha-ko hedadura du eta 1967an izendatu zuten. Aspa bailaratik (Mendebaldean) Aure bailarara arte (Ekialdean) zabaltzen da. Eremuaren %60 Pirinio Garaietako (Bigorra) departamenduko lurretan dago; gainerakoa Bearnon. Horren babes neurri zorrotzak ez dituen 206.000 ha-ko periferia-eremua du parke nazional honek, 86 udalerri biltzen dituena.

Altuerako 230 laku daude parkearen lurretan, bai eta Pirinioetako 3.000 m-tik gorako gailur ezagun asko ere.

Fauna eta flora

Flora eta fauna aldetik Estatuko gunerik aberatsenetako bat da (bertako floraren %12 endemikoa da). 150 landare-espezie, 1.000 kakalardo-espezie, 300 tximeleta-espezie, sarrioak - parkearen irudi-ikurra - eta desagertze arriskuan dauden hainbat hegazti harrapari bizi dira bertan: ugatzak, sai zuriak eta arrano beltzak. Sai arreen eta marmoten populazioa, berriz, - Alpeetatik ekarritakoak azken horiek - ugaltzen ari dira. Munduan bakarra den uretako ugaztun bat bada bertan (Pirinioetako ur-satorra, ikusten benetan zaila). Horiez gain, katamotza, katajineta eta mendikateko azken hartz basatiak ere bizi dira bertan.

Ikus, gainera

• Pirinioetako eremu babestuak
• Perdidoko mendigunea
• Neouvielleko mendigunea
• Gavarnieko zirkua
• Pont d'Espagne
• Pirinioetako flora

Kanpo estekak

• (Frantsesez) Parkearen gune ofiziala
• (Frantsesez) Parkearen atlasa
• (Frantsesez) Frantziako parke nazionalak

Artikulu hau Frantziako geografiari buruzko zirriborroa da. Wikipedia lagun dezakezu edukia osatuz.

• Datuak: Q738435
• Multimedia: Parc national des Pyrénées / Q738435