Internacia Centra Komitato

Internacia Centra Komitato (ICK), komence ankaŭ Centra Komitato de la Esperanto-Movado, estis unu el la organoj de la Helsinki-sistemo por unuecigi la neŭtralan movadon. En 1923 oni unuafoje elektis ĝiajn ses membrojn, kun la sviso Edmond Privat kiel prezidanto. Lin sekvis la brito John Merchant en 1928. ICK-ano por administraj aferoj estis komence Gabriel Chavet, kiu rezignis jam en 1924. En 1925 Robert Kreuz fariĝis sekretario (ekde 1930: direktoro).

Konferenco en Locarno, 1926

ICK kunordigis la komunajn taskojn de la movado kiel internacia informado kaj informado en landoj kiuj ankoraŭ ne havis movadon, kaj organizis la Universalajn Kongresojn. Pro la reorganizo de la movado en 1932-1934 ĉesis ICK funkcii. UEA fariĝis ĝia jura posteulo.

Vidu ankaŭ

• Helsinki-sistemo
• Historio de UEA

		Ĉi tiu teksto estas prenita el la Enciklopedio de Esperanto 1934. Vi povas plibonigi ĝin per vikiigo kaj aktualigo de la enhavo. Kiam la origina teksto estos sufiĉe vikiigita kaj aktualigita, forigu ĉi tiun kadron, kaj anstataŭe enmetu la ŝablonon EdE en la artikolon.
Internacia Centra Komitato (ICK) de la Esperanto-movado. Sekve de la Kontrakto de Helsinki (v.) Konstanta Reprezentantaro (K. R.) de la Naciaj Societoj kaj UEA interkonsentis pri la elekto de Centra E-komitato, kiu konsistis el ses anoj. La nomo de Centra Komitato poste estis ŝanĝata je ICK, kiu fariĝis la gvida instanco de la neŭtrala E-movado, kun sidejo en Ĝenevo. ICK organizis kunlabore kun la Lokaj Kongresaj Komitatoj ĉiujn UK-jn de 1924. La unua prez. de ICK estis Edmond Privat, poste ĝis 1933 John Merchant. Anoj en la komencaj jaroj: M. Rollet de l' Isle, d-ro J. Dietterle, Rud. Hromada, W. M. Page kaj s-ino J. Isbrücker, anoj en 1932 M. Rollet de l' Isle, s-ino J. Isbrücker, E. Stettler, d-ro A. Vogt kaj Felix Zamenhof. Gvidanto kaj ĉefa efektiviganto de la ĉiam pli ampleksaj laboroj estis Robert Kreuz, ĝen. sekr., poste dir. de la ICK. Post la interkonsento en Köln (1933) ICK daŭrigis sian agadon en la kadro de UEA. Detalaj raportoj pri la vasta agado de ICK aperis ĉiujare en la Oficiala Dokumentaro. v. Organizo.

Ĉi tiu artikolo baziĝas (parte aŭ tute) sur artikolo el la Enciklopedio de Esperanto. La originala teksto kontroleblas en interreta arkivo de la fonto.

• Kategorio Internacia Centra Komitato en la Vikimedia Komunejo (Multrimedaj datumoj)