Eŭgeno Miĥalski

Jevgenij Iosifoviĉ "Eŭgeno" MIĤALSKI(J), pseŭdonime konata kiel Torentano, Revulo kaj Profetivski (naskiĝis en 1897, mortis en 1937) estis esperantista poeto, aktiva en la laborista Esperanto-movado.

Eŭgeno Miĥalski
Persona informo
Aliaj nomoj	Torentano • Revulo • Profetivski
Naskiĝo	21-an de januaro 1897 (1897-01-21) en Letychiv
Morto	15-an de oktobro 1937 (1937-10-15) (40-jaraĝa) en Kievo
Mortokialo	Pafvundo
Lingvoj	Esperanto
Ŝtataneco	Soveta Unio
Subskribo
Okupo
Okupo	esperantisto (1911–) poeto verkisto
v • d • r

Vivo

Miĥalski naskiĝis la 21an de januaro 1897 en Letiĉiv (Летичів), Ukrainio, Rusia Imperio. Li esperantistiĝis en 1911. En 1917 li fondis la literaturan Esperanto-revuon Libera Torento en Saratov, kie aperis liaj unuaj poemoj originalaj kaj tradukaĵoj. Li frue aliĝis al SAT kaj kunlaboris al Sennacieca Revuo, La Nova Epoko, "Bulteno de SEU", kaj pli poste al Internaciisto kaj al La Nova Etapo. Profesie li laboris kiel instruisto-bibliotekisto.

Miĥalski estas unu el la kunfondintoj de IAREV en 1931 kaj ludis centran rolon en la reaktivigo de la asocio en 1934. Tiam li redaktis la gazetojn Proleta Literaturo kaj Internacia Literaturo kun la helpo de la franco Honoré Bourguignon. Li estis arestita la 16-an de marto 1937 de NKVD pro senbaza akuzo pri partopreno en kontraŭsovetia trockiista organizo, kaj kondamnita al morto la 14-an de oktobro 1937. Li estis mortpafita la sekvantan tagon, kaj rehonorigita postmorte la 8-an de majo 1958.

Verkoj

Poemaroj

• La Unua Ondo, 1918
• Du Poemoj, 1922
• Prologo, SAT, 1929
• Fajro Kuracas, EKRELO, 1932
• Kantoj de Amo kaj Sopiro, 1934
• Plena Poemaro, FEL, 1994, Serio Stafeto n-ro 18, redaktis William Auld, kun antaŭparolo de Krys Ungar

"Flirtvoĉa poeto. Majstro de la liberaj formoj. Liajn poemojn karakterizas la rapsodieca ritmokonstruo. La ĉeftemo en liaj unuaj tri libretoj estas la nudigita amo. En "Prologo" jam troviĝas socialistaj pensoj, sed en "Fajro kuracas" li tute forĵetis sian ĝistiaman ĉeftemon kaj grandspire kantas pri mondpolitikaj aktualaĵoj laŭ ekstreme maldekstra revolucia koncepto piedpremante la demokration. Cetere liaj poemoj estas belaj, variaj kaj surportas la aromon de ia stranga poezia ĉarmo." - EMBA, EdE

Liajn poemojn ukraine tradukis V. Misik (Avangard, 3, 1929) kaj Petro Timoĉko (Ternopilo).

Esploristoj de vivo de Eŭgeno Miĥalski

En Soveta Unio la vivon de Eŭgeno Miĥalski esploris inĝeniero M. Bjelogolovskij (Belogolovskij?) loĝinta en la urbo Doneck de Ukraina SSR.^{[mankas fonto]}

Bibliografio

• Conterno, Clelia 1973 : Miĥalski, Eŭgeno (1897-1937), Esperanto, 814 (10), p. 170

Eksteraj ligiloj

• Enciklopedio de Esperanto/M en sia originala formo en la Interreto
• Enciklopedio de Esperanto en elŝutebla versio (PDF).
• Rete legeblaj poemoj
• Pri vivo kaj morto de E. Miĥalski, eseo de NikSt, Sennacieca Revuo, 1993
• Monato, internacia magazino sendependa, Poeto de amo kaj revolucio verkita de Boris Kolker.
• Eŭgeno Miĥalski: novaj informoj Arkivigite je 2011-09-05 per la retarkivo Wayback Machine artikolo de Kornilov kaj Lukaŝeviĉ en Sennacieca Revuo, 1993
• Verkoj de Miĥalski en Esperantomuzeo kaj Kolekto por Planlingvoj
• Recenzo de "Mi estas" Arkivigite je 2014-10-06 per la retarkivo Wayback Machine de Ĵak Lepŭil', kies titolo kaj unua kanzono estas poemo de Miĥalskio
• Nikolao Gudskov (2012). “Eŭgeno Miĥalski”, La Ondo de Esperanto (5 (211)), p. 15. 

• Kategorio Eŭgeno Miĥalski en la Vikimedia Komunejo (Multrimedaj datumoj)
• Eŭgeno Miĥalski en Vikifontaro (Universala biblioteko)