Miranduléś|
C'l artìcul chè 'l è scrit in
Miranduléś |
_(9377174774).jpg)
La Garbiñe Muguruza Blanco (Caràcas, 8 'd Utóbar dal 1993) l'è na tenìsta spagnōla, ad màdar venesuelàna, prufesiunìsta da 'l 2011 ch'l'è stada la nùmar trént'òt dal mónd al 13 ad Śnar dal 2014.
L'è élta 182 cm, la péśa 73 chilo e la dróa al bras dèstar. Al sò arvèrs 'l è a dū maṅ.
In dla sò caréra l'à mis in bisàca sèt tìtui ITF in tut e òṅ ad qvéi WTA, vins a Hobart in dal Śnar dal 2014.
Caréra
La spagnōla la vins al sò prim turnèo ITF in dal Dicémbar dal 2009 ma 'l è in dal 2011 ch'la fà 'l salt parchè la in vins quàtar cun anc tri finàli e la pasa da èsar la nùmar 432 dal 2010 a dvintàr la nùmar 249 dal mónd.
In dal 2012, dòp avér purtâ a cà 'n ITF da vintsìnc-mila dòlar a Clearwater, la ciàpa na carta salvàdga par śugàr al premier mandatory ad Miami. Chè la s fà strada dimóndi mandànd a cà l'Ayumi Morita par 6-3 2-6 3-0 bandòṅ, la Vera Zvonarëva par 6-4 6-3 e la Flavia Pennetta par 6-2 1-6 7-6 e pardénd sōl cun la nùmar quàtar dal mónd, l'Agnieszka Radwańska, par 3-6 2-6. Cun i sènt-quarànta punt muciâ sù la spagnōla la strabàlsa a 'l nùmar 144 dal mónd. Anc a Barcelóna la gh'à na carta salvàdga par śugàr dirèt ma la n la dasfrùta minga parchè la pèrd a 'l secónd tùran cun la Julia Görges par 5-7 7-5 2-6. A Fès l'è custréta a pasàr p'r al qualificasiòṅ p'r andàr dènt'r a 'l tablòṅ dal turnèo maruchèṅ. Chè pò la bat l'Anna Tatishvili par 7-5 5-7 6-4 e la Patricia Mayr-Achleitner par 6-4 bandòṅ ma in di quàrt la céd a la Kiki Bertens par 1-6 4-6. Anc a Madrid i gh dànan la carta salvàdga ma la Na Li la la fà fóra a 'l prim tùran. In Luj, baténd l'Alizé Cornet, la riva in finàl a 'l ITF ad Bùcarest ma pò la gh'à da pigàr la tèsta cun la María Teresa Torró Flor ch'la vins sèg par 6-3 4-6 6-4. A gl'US Open la cata subìt la Sara Errani e la gh pèrd par 3-6 7-6 1-6. La finìs 'l an a la 104śma puśisiòṅ dal ranking.
In d'l inìsi dal 2013 la riva a 'l secónd tùran sōl a Melbourne e a Florianopolis ma chè la cata la Serena Williams e la Venus Williams ch'i la mànd'n a cà. La spagnōla la fà invéci méj a Indian Wells e a Miami. In Califòrgna la bat la Bojana Jovanovski 2-6 7-5 6-3, l'Ekaterina Makarova 6-3 1-6 6-4 e la Magdaléna Rybáriková 6-4 6-0 pardénd in di utàṿ da l'Angelique Kerber par 4-6 5-7. In Flòrida invéci l'è bòna ad far fóra l'Anastasija Pavljučenkova e la Caroline Wozniacki prima ad cédar in di utàṿ a la Na Li par 6-7 2-6. In sla tèra la cata sù pôc. A Charleston la pèrd da la qualificàda Jessica Pegula mént'r a Stucàrda e a Madrid la n pasa minga 'l qualificasiòṅ pardénd da gl'itagliàni Nastassja Burnett e Camila Giorgi. A Róma la fà pò secónd tùran (2-6 2-6 da la Marija Šarapova), a Straśbûrg la pèrd subìt da la Lucie Hradecká, a 'l Roland Garros la ciàpa la paga a 'l secónd tùran da la Jelena Janković par 3-6 0-6. A 'S-Hertogenbosch invéci la riva in semifinàl vinsénd cun la Mona Barthel, cun la Lauren Davis e cun la Dominika Cibulková e pardénd cun la Kirsten Flipkens par 3-6 1-6. 'L ùltim turnèo ch'la śóga in dal 2013 'l è qvél ad Wimbledon e lè la riva a 'l secónd tùran, pardénd in tri sét cun la rusa Ekaterina Makarova.
La taca a la granda al 2014 rivànd in di quàrt a Auckland (3-6 3-6 da la Venus Williams) e vinsénd a Hobart al sò prim tìtul WTA sénsa lasàr par strada gnanc un sét. In Austràglia, pasànd p'r al qualificasiòṅ, la bat subìt tri śugadōri dal Bélgi, l'An-Sophie Mestach, la Yanina Wickmayer e la Kirsten Flipkens, par pò far fóra par 6-0 6-1 l'Estrella Cabeza Candela e par 6-4 6-0 la céca Klára Zakopalová.
Culegamènt estéran
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
