From Wikipedia, the free encyclopedia
C'l artìcul chè 'l è scrit in
Miranduléś |
La Germaine Hélène Irène Lefebvre, cgnusùda méj c'n al nóm 'd art ad Capucine (Saint-Raphaël, 6 ad Śnar dal 1928 – Luśàna, 17 ad Mars dal 1990) 'l è stada n'atōra e mudèla francéśa.
La Germaine Lefebvre da śōvna la sarnìs 'd ciamàr-as Capucine, al nóm druâ in francéś p'r al fiōr Tropaeolum. Anc s'la sò famìja la vliva ch'la dvintìs n'insgnànta lē la và avànti listés par la sò strada par tgnir adrē a 'l sò deśidèri 'd far l'atōra.
A vint an la ciàpa na part in dal film L'aquila a due teste ad Jean Cocteau pò la cuntìnua cun Le sedicenni ad Jacques Becker. Dòp ès'r-as laureàda in léngui furastéri in Frància, in dal 1950 la spóśa 'l atōr e ardupiadōr Pierre Trabaud ma 'l sò matrimòni al durarà sōl sèt méś, pò la n sa spuśarà mai piò. Élta, magra e elegànta la Capucine la taca anc a far la mudèla par Christian Dior e par Pierre Balmain.
In di an Ssanta la lavóra cun George Cukor in Estasi e cun Blake Edwards in dla cumèdia La Pantera Rosa, un sucès mundiàł in du la fà la mujér ad cal cajòṅ d'l ispetōr Clouseau. Àtar film 'd arcurdàr ad cal perìud lè i èṅ Ciao Pussycat ad Clive Donner, Masquerade ad Joseph L. Mankiewicz e Fellini Satyricon ad Federico Fellini.
Dòp Sole rosso ad Terence Young la sò caréra in di an Stanta la và śò e dònca la s ardùś a lauràr a di prugèt piculèṅ in Frància e in Itàglia cuma Bluff - Storia di truffe e di imbroglioni ad Sergio Corbucci, Contro 4 bandiere 'd Umberto Lenzi, Le foto di Gioia ad Lamberto Bava, I miei primi 40 anni ad Carlo Vanzina e Pygmalion 88 ad Flavio Mogherini. Qvést chè al sarà anc la sò ultma pelìcula parchè dū an dòp la s cópa butànd-as fóra par la fnèstra dal sò cundumìni in du la vivìva in Śvisra faghénd un vōl da 'l utàṿ piàṅ. L'artìsta francéśa l'éra dimòndi śò e la gh'iva di prubléma 'd salùt tant ch'l'iva bèla tintâ 'd masàr-as tajànd-'s al véni ma i l'ìvan salvàda a 'l ùltim minùt. L'à lasâ incòsa a i sò tri gat.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.