From Wikipedia, the free encyclopedia
Miranduléś|
C'l artìcul chè 'l è scrit in
Miranduléś |
La Sloane Stephens (Plantation, 20 ad Mars dal 1993) l'è na tenìsta americàna ch'l'è stada la nùmar sédas dal mónd in singulàr (al 18 ad Favràr dal 2013). L'è élta 170 cm par 61 chilo e l'è prufesiunìsta da 'l 2009.
In dla sò caréra l'à vins un turnèo ITF (al Camparini Gioielli Cup ad Réś) e l'è rivàda in semifinàl a gl'Australian Open dal 2013.
La Stephens la riva par la prima vòlta in finàl in un turnèo ITF in dal Maǵ dal 2010 a Caśèrta ma l'al pèrd p'r òpra dla śvisra Romina Oprandi par 3-6 3-6. In Luj la sa spòsta in sla tèra rósa śvedéśa ad Bastad e la riva a 'l secónd tùran baténd la parmśàna Alberta Brianti par pò pèrdar da la Flavia Pennetta par 1-6 1-6.
In dal 2011 la cata a 'l secónd tùran 'd Indian Wells la nùmar òṅ dal mónd Caroline Wozniacki ch'la la manda a cà par 6-3 6-2. In Maǵ la śōga 'l ITF ad Réś e l'al vins baténd prima la Sabine Lisicki in semifinàl par 6-3 6-3 e pò la Nastas'sja Jakimava cun al puntéǵ ad 6-3 6-1. I Stanta punt mis in bisàca i la cùcian in sù in clasìfica. A Carlsbad in di Stat Unî la riva in di quàrt, batùda par l'Andrea Petković, nùm'r ùndas dal mónd, invéci a Cincinnati la và fóra subìt p'r òpra dla bulgnéśa Sara Errani. A gl'US Open la riva a 'l tèrs tùran in dua la pèrd da l'Ana Ivanović par 3-6 4-6.
In dal 2012 la taca a far dabòṅ. Dòp avér pardû a 'l secónd tùran da la rusa Svetlana Kuznecova a gl'Australian Open e da la tedésca Angelique Kerber a Indian Wells, l'americàna la fà fóra la Sara Errani a Miami (dòp èsar pasàda p'r al qualificasiòṅ) ma pò la gh'à da cédar a la Marija Šarapova 4-6 2-6 a 'l tèrs tùran. A Róma la pèrd da la Flavia Pennetta ma pò l'è bòna ad rivàr in semifinàl a Straśbûrg pardénd da la Francesca Schiavone par 5-7 1-6, amprufitànd-'s anc dal bandòṅ dla rusa Marija Kirilenko a 'l prim tùran (i éran un sét para). Incóra in sla tèra rósa la s fà unōr a 'l Roland Garros pasànd tri tùran (mandànd anc a cà l'Ekaterina Makarova) par pò lasàr strada a la finalìsta d'l an prima, l'austragliàna Samantha Stosur. A Wimbledon la pèrd a 'l tèrs tùran da la Sabine Lisicki par 6-7 6-1 2-6. La tórna a śugàr in cà sua: a Washington la riva in semifinàl, a Cincinnati la pèrd a 'l tèrs tùran da l'Agnieszka Radwańska mént'r a gl'US Open la bat subìt la Francesca Schiavone ma cun l'Ana Ivanović la gh'à da cédar 7-6 4-6 2-6, un riśultâ cumpàgn a qvél d'l an prima.
La Sloane la taca a la granda al 2013. A Brisbane la bat subìt la Dominika Cibulková, a Hobart la pèrd in semifinàl da l'Elena Vesnina par 2-6 2-6 ma l'è a gl'Australian Open in dua la fà 'l stus, amprufitànd-'s anc 'd un tablòṅ dimóndi bèl. Sénsa catàr gnanc una dal primi quarànta in di prim tùran, la Stephens la riva acsè a i quàrt in dua la bat na Serena Williams misa mâl a la schina par 3-6 7-5 6-4. In semifinàl però la sa stablìs atàc a na Viktoryja Azaranka cun al diav'l adòs ch'la gh mòla lè un 6-1 6-4. Invéci ad tōr al via, l'americàna la dvénta fiàpa tut 'd un cólp, muciànd sù di prim e secónd tùran. La riva a 'l tèrs tùran sōl a Miami par via dal ritìr dla Venus Williams ma pò l'è la Agnieszka Radwańska ch'la la mét in riga par 6-4 2-6 0-6. In Avrìl la pèrd anc al sò singulàr ad Fed Cup cóntar la śvedéśa Sofia Arvidsson, nùmar sinquànta-quàtar dal mónd.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
