Pigugnìṅ

 Miranduléś

C'l artìcul chè 'l è scrit in Miranduléś

Al Pigugnìṅ (o pigògn) 'l è un śóg ad carti ch'al s fà cun al carti da Brìscula uriginàri dla Pruvîncia ed Mòdna. In Dialètt mudnés Pigugnìṅ a vōl dir cas. 'L è un śóg 'd aśàrd parchè da spés i s dróan di bèsi.

In Itagliàn al ciapa al nóm ad Pigugno, Pigugnino o Pico.

Al Fant ad Spadi dit Pigugnìṅ

Règuli

A s śóga cun un mas ad 40 carti, ad sòlit in quàtar o sinc śugadōr, o anc in dū còpi.

A 'l inìsi i vènan dadi tut al carti, 10 o 8 a tèsta a secónd di caś. Al śóg al partìs tgnénd cònt dal sèns cuntràri d'l arlój, tacànd da quél subìt a la dèstra ad quél ch'l à dâ 'l carti. Chi lò al decìd ad śugàr na carta a piaśér e chi àtar i èṅ custrét a rispóndar a la stésa manéra, s'i gh'i aṅ: spadi, cóp, danâr o bastòṅ.

La scalaróla dla fòrsa l'è cumpàgna a quéla dal Trisèt, in órdan: Tri (la carta più élta), Dū, As, Rè, Cavàl, Fant, Sèt, Siē, Sinc e Quàtar (la carta più basa). Al valōr dal carti però 'l è difarènt: 'l As chè al vàl 3 punt, al Dū, 'l As e al Figùri (Rè, Cavàl, Fant) i vàlan 1 punt mèntar chi atri carti gnanc un punt. Chi al ciapa l'ultma maṅ pò al fà sù àtar 3 punt, p'r un tutàl ad 35 punt.

• 
  AS, carta da 3 punt
• 
  DŪ, carta da 1 punt
• 
  TRI, carta da 1 punt
• 
  FIGÙRA, carta da 1 punt

Al scòp dal śóg 'l è quél ad ciapàr almànc na maṅ miténd insém méno punt ch'a s pōl, ma, in sima a tut, a n tōr minga al Pigugnìṅ (al fant ad spadi). Al śugadōr ch'a la fiṅ al fà più punt ad tut al mùcia sù na busca (ma al in tōś 2 s'al gh'à almànc 18 punt). Stés quèl anc par quél ch'al gh'à abû la dasfurtùna ad purtàr-'s a cà al Pigugnìṅ: na busca anc par lò.

Quànd òṅ al n ciàpa gnanc na maṅ (al stà fóra in gèrg) la busca al la ciàpa sōl lò e chi al gh'à al Pigugnìṅ da la sò banda. Se invéci un śugadōr al fà sù tut al mas, al ciàpa sōl la busca dal Pigugnìṅ ma chi àtar i in patìsan 3.

Quànd un śugadōr al mùcia sù 7 buschi al "và fóra": al pèrd ma al cuntìnua a śugar par védar chi vins.