From Wikipedia, the free encyclopedia
![]() | ||
![]() La Cristina Marsillach in na figùra dal film | ||
Òpra 1987 | ||
---|---|---|
Regìa: Dario Argento | ||
Scritōr: Dario Argento • Franco Ferrini | ||
Atōr: Cristina Marsillach • Urbano Barberini Ian Charleson • Daria Nicolodi • Antonino Juorio Coralina Cataldi Tassoni • Sebastiano Somma Barbara Cupisti • Antonella Vitale • Michele Soavi Karl Zinny • William McNamara • György Gyõriványi | ||
Müsica: Claudio Simonetti • Brian Eno (cun dū pès heavy metal di Steel Grave) | ||
Léngua: Itagliàṅ | ||
Dürä dal film: 103 minüt | ||
Nasiōṅ: Itàglia |
C'l artìcul chè 'l è scrit in
Miranduléś |
Opera (Òpra) 'l è 'n film ad scarésa dal 1987 ad Dario Argento. 'L è ambintâ in dal mónd dla lìrica e dimóndi séni i èṅ stadi giràdi in dal Teàtar Régi ad Pärma. Prutagunìsta dal film l'è na śóvna Cristina Marsillach che, a 'l ùltim minùt, l'à tòlt al pòst dla Giuliana De Sio.
La Betty (Cristina Marsillach), na śóvna suprâṅ a 'l debùt, la gh'à da tōr al pòst dna sò culéga più vècia 'd lē ch'l'à fat 'n incidènt la sira prima ad cantàr in dal Macbeth ad Giuseppe Verdi, n'òpra ch'a s diś la pòrta dasfurtùna a chi gh lavóra. In cal mént'r un sasèṅ misterióś al masa na mascra e pò al sćiànca druànd un curtlàs al vistî che la Betty la gh'arév da mét'r-as in sal palc al dè dòp ma soquànti dal curnàci druàdi in dl'òpra i vèran al cadnàs dla gàbia in dū i stàvan e i gh vaṅ adòs. 'L óm al gh la cava però a scapàr via dòp avér-an scurtlâ qualchidùna.
In cal méntar la Betty la s la gôd a lèt cun Stefano (William McNamara), un śóvan ch'al lavóra lè a teàtar, ma quànt qvést chè al và in n'atra cambra par métar sù dal tè, al killer al in prufìta par ciapàr la ragasóla e, tgnénd-la sòdi, ligàr-la da na banda miténd-ag un siròt in bóca p'r a n far-la sigàr e pò dal guci sót a i òć par custrìnś'r-la a guardàr incòsa méntar lò al cópa al sò amìg insfilsànd-ag un curtlàs in góla. Finî al masamènt, al la libra.
In séguit la Giulia (Coralina Cataldi Tassoni), la dóna di custùm ch'la gh'à da giustàr e cuśir al custùm sćiancâ dla Betty, la cata par tèra al brasalèt dal killer e la véd che insìma a gh'è na data. Pròpria méntar la tōś na lènta par véd'r-ag méj, 'l óm misterióś al vèṅ dèntar e al la masa, incóra na vòlta davànti a la pòvra cantànta custréta a tgnir-i 'd òć.
Al regìsta Marco (Ian Charleson), in pinsēr par la Betty, al ciàma al cumisàri ad pulisìa Alan Santini (Urbano Barberini) e chi lò al gh manda a cà 'n agìnt par prutéś'r-la, Daniele Soave (Michele Soavi). A 'n sèrt punt però Daniele al sparìs, pròpria quànt la riva lè la Mira (Daria Nicolodi), la sò manager. Cun la paùra adòs, al dū dóni i rèstan da par lōr in cuśìna. Da drē da 'l us al sòna al campanèṅ un pulisiòt ch'al vōl gnir dèntar, faghénd védar i ducumènt ad Soave. Mira la n s fida briśa e, da drē da 'l spiunsèṅ, la gh diś ch'la 'l vōl véd'r in dal grugn. Chi lò al n fà na piga e al gh tira na sćiuptàda in d'l òć cupànd-la. La Betty però la scapa via da na grada par l'ària cundisiunàda.
Turnàda a teàtar, Betty la cata Marco ch'al gh diś la sò idéa: durànt l'òpra dal dè dòp, lò al mularà lìbri al curnàci ch'i èṅ dal bèsti dimóndi inteligìnti ma anc vindicadìvi e cun dal rancōr dèntar in di cunfrònt dal sasèṅ, i n pōlar minga èsar-s-al daśmindgâ. E lè pròpria acsè: chi uśèi lè, lasâ lìbar ad vulàr in dal teàtar, i càtan 'l óm sintâ in mèś a 'l pùblic e i gh tìran via 'n òć.