Christina McHale

Miranduléś

C'l artìcul chè 'l è scrit in Miranduléś

La Christina McHale (Teaneck, 11 ad Maǵ dal 1992) l'è na tenìsta americàna, prufesiunìsta da 'l Avrìl dal 2010. L'è élta 170 cm e la péśa 58 chilo. La dróa al bras dèstar e la tira 'l arvèrs a dū maṅ.

La stà a Englewood Cliffs in dal stat dal New Jersey ma da pìcula l'à pasâ sinc an a Hong Kong parchè sò pàdar al lauràva là. L'è bòna ad dascórar anc in spagnôl e 'n pôc in Cinéś mandarèṅ. A gh piàś scultàr al rap e l'hip-hop.

In dla sò caréra l'è rivàda a èsar la nùmar vint-quàtar dal mónd al 20 'd Agóst dal 2012. L'à vins un turnèo ITF a Róma in dal 2011.

Caréra

In dal 2010 qvéi 'd Indian Wells i gh dànan na carta salvàdga ma lē la pèrd a 'l prim tùran da la Vania King par 5-7 3-6. In Avrìl la pasa al qualificasiòṅ a Charleston baténd la Galina Voskoboeva 6-1 6-3. In dal tablòṅ prinsipàl la bat subìt la rusa Alla Kudrjavceva e pò la s in prufìta dal bandòṅ dla Viktoryja Azaranka ch'la gh dà a muć in dal secónd sét quànd l'éra avànti 6-2 2-2. In dal tèrs tùran la pèrd da la Melanie Oudin 4-6 0-6. A Stanford la céd a la Samantha Stosur a 'l secónd tùran. In Agóst la s fà strada a Cincinnati parchè la bat prima la Nadia Petrova 7-6 5-3 bandòṅ e pò la giapunéśa Ayumi Morita 6-2 6-4. A 'l tèrs tùran la vèṅ batùda nét 6-1 6-1 da la Kim Clijsters. A Quebec City la riva in semifinàl (2-6 2-6 da la Tamira Paszek) e a Tokyo la và fóra subìt par maṅ dla Flavia Pennetta 3-6 1-6. La sèra 'l an a 'l 115śum pòst dla clasìfica dal fémni.

In dal 2011 la pasa 'l qualificasiòṅ a Brisbane ma la pèrd pò a 'l prim tùran da la Roberta Vinci 2-6 6-7. Incóra na vòlta la śōga a Indian Wells par via dna carta salvàdga. Prima ad pèrdar a 'l tèrs tùran da la Nadia Petrova la s cava la sudisfasiòṅ ad bàtar la Svetlana Kuznecova (nùmar trédas dal mónd) par 7-6 7-6. A Charleston la fà méj d'l an prima rivànd a i quàrt baténd la Daniela Hantuchová 7-6 6-1 ma pò la céd a la Jelena Janković 2-6 0-6. A Róma la pasa 'l qualificasiòṅ faghénd arbasàr la crésta a la Coco Vandeweghe mandàda a cà 6-1 6-4 ma pò la léva bandéra biànca cun la Francesca Schiavone (nùmar sinc dal mónd) ch'la vins a 'l secónd tùran 6-3 6-1. La pèrd incóra da n'atra itagliàna, Sara Errani, a 'l prim tùran dal Roland Garros ma chè la pōl pròpria ruśgàr-as gl'ungi parchè l'éra avànti 5-0 in dal tèrs sét, faghénd anc la furba a n sgnand briśa al bucìni nóvi a la bulgnéśa. A Birmingham (èrba) la rumagnōla la la manda incóra a cà, 7-6 4-6 6-2 a 'l secónd tùran. Par lē secónd tùran anc a Wimbledon: dòp avér batû l'Ekaterina Makarova 2-6 6-1 8-6, la pèrd pò da la Tamira Paszek. A Carlsbad (Stat Unî) la cata a 'l tèrs tùran na Agnieszka Radwańska cun al diav'l adòs ch'la la sćiànca 6-1 6-0. A Cincinnati la fà 'l cólp baténd la nùmar òṅ dal mónd Caroline Wozniacki 6-4 7-5 ma pò la céd a la Nadia Petrova. La danéśa la s tōś l'arvìnsida sèg baténd-la in di quàrt a New Haven. La Christina la pasa dū tùran a gl'US Open mandànd a cà Aleksandra Wozniak e Marion Bartoli prima ad lasàr strada a la Marija Kirilenko 2-6 3-6. La finìs la stagiòṅ da nùmar quarànta-dū dal mónd.

La taca al 2012 pardénd a 'l secónd tùran a Auckland (1-6 1-6 da la Svetlana Kuznecova) e a 'l tèrs tùran a gl'Australian Open (2-6 0-6 da la Jelena Janković). In Favràr la pòrta a cà facilmènt i sò dū singulàr ad Fed Cup śugâ cóntar la Rùsia Biànca: 6-0 6-4 a la Nastas'sja Jakimava e 6-0 6-1 a la Dar'ja Kustova. A Doha la ciàpa incóra la paga da l'Agnieszka Radwańska (6-1 6-1 in di quàrt). A Indian Wells la bat l'Elena Vesnina 6-3 7-5 e la Petra Kvitová 2-6 6-2 6-3 ma pò la pèrd p'r un pēl da l'Angelique Kerber 3-6 6-3 6-7. In Avrìl la vins incóra dū punt p'r al sò paéś impgnâ in Ucraìna cóntar Lesja Curenko e Elina Svitolina. In sla tèra ad Madrid e Róma la và fóra a 'l secónd tùran ad òpra dla Samantha Stosur e dla Marija Šarapova. A 'l Roland Garros la vins al prim sét cóntar la campiunésa in carga Na Li ma pò la céd 6-3 2-6 1-6. A Birmingham e Eastbourne i èṅ al rusi Elena Vesnina e Anastasija Pavljučenkova a mandàr-la a cà a 'l secónd tùran. A Wimbledon la pasa dū incóntar prima ad lasàr strada a l'Angelique Kerber 2-6 3-6. La finìs mâl 'l an cun quàtar prim tùran a Cincinnati, US Open, Pechîn e Uśàka.

Al 2013 al taca a 'l arvèrsa par lē pròpria cum 'l éra finî al 2012. L'americàna la fà sù àtar tri pìm tùran a Auckland, Sydney e Australian Open. A Parì la pèrd a 'l secónd tùran da la Marion Bartoli 7-5 6-1. A Doha la taca bèṅ al turnèo vinsénd facilmènt cóntar la Vera Duševina 6-1 6-2 e la Lucie Šafářová 6-4 6-2 ma pò la vèṅ asfaltàda 6-0 6-0 da la nùmar òṅ dal mónd Viktoryja Azaranka. A Indian Wells e Miami la mùcia sù dū secónd tùran (6-4 4-6 1-6 da la Marija Kirilenko e 7-6 1-6 3-6 da la Roberta Vinci), incóra pèś a Charleston in dua la Varvara Lepchenko la la manda fóra subìt 3-6 6-4 2-6. La taca la stagiòṅ in sla tèra rósa a Madrid pasànd p'r al qualificasiòṅ. A 'l prim tùran la bat la Shuai Peng cun al puntéǵ ad 7-5 5-7 6-1 ma pò la n pōl far gnint cun la Marija Šarapova (pò finalìsta) ch'la vins 6-1 6-2. A Róma la fà sua in dū sét la partìda cóntar la Karin Knapp par pò catàr la nùmar siē dal mónd Sara Errani. La bulgnéśa la la bat a fadìga in tri sét 7-5 5-7 6-2 dòp avér butâ a gl'urtìghi sinc match point in dal secónd sét (l'éra avànti 7-5 5-2 e servìsi).

Culegamènt estéran

(EN) La sò schéda in sal sit dla WTA