![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/6/60/Palais_d%2527Aix-la-Chapelle.svg/langdsb-640px-Palais_d%2527Aix-la-Chapelle.svg.png&w=640&q=50)
Kralowa pfalca
From Wikipedia, the free encyclopedia
Pfalca (łatyński villa regia [kralojske město] abo curtis regia [kralowy dwór]) jo była w ranem a wusokem srjejźowěku twardnica abo grod, kenž su statkował drogujucemu kraloju abo kejžoroju ako zepěranišćo a nachylna rezidenca. Zapśimjeśe wótwóźujo se wót romskeje górki Palatina, na kótarejž su reziděrowali romske kejžorje.
![Thumb image](http://upload.wikimedia.org/wikipedia/commons/thumb/6/60/Palais_d%27Aix-la-Chapelle.svg/320px-Palais_d%27Aix-la-Chapelle.svg.png)
Srjejźowěkowy kral abo kejžor njejsu měł stolicu ako kněžaŕstwowe sedło, ale jo drogował pó kraju, aby swóju awtoritu we wšych stronach mócnaŕstwa a wósobinski kontakt k wazalam zdźaržał. Pfalcy su namakali se zwětšego we wokolinje biskupskich sedłow a wjelikich kloštarjow abo w lichotnych městach a byli dosć wjelike, krala a jogo družynu góspodowaś a ze žywidłami zastaraś. Wósebnje wažne su byli pfalcy, w kótarychž kral z družynu pśezymował, tak pomjenjowane zymske pfalcy.
Wuznamne pfalcy su namakali se na pśikład w Aachenje, Goslaru a Memlebenje.