![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/a/aa/Pluvialis_squatarola_%2528summer_plumage%2529.jpg/640px-Pluvialis_squatarola_%2528summer_plumage%2529.jpg&w=640&q=50)
Cwtiad llwyd
rhywogaeth o adar / From Wikipedia, the free encyclopedia
Mae'r Cwtiad llwyd (Pluvialis squatarola) yn aelod o deulu'r rhydyddion.
Cwtiad llwyd | |
---|---|
![]() | |
Dosbarthiad gwyddonol | |
Teyrnas: | Animalia |
Ffylwm: | Chordata |
Dosbarth: | Aves |
Urdd: | Charadriiformes |
Teulu: | Charadriidae |
Genws: | Pluvialis |
Rhywogaeth: | P. squatarola |
Enw deuenwol | |
Pluvialis squatarola (Linnaeus, 1758) | |
Yn y tymor nythu mae'n aderyn tarawiadol dros ben, gyda smotiau du a gwyn ar y cefn a rhan uchaf yr adenydd a'r wyneb, y fron a'r bol yn ddu. Yn y gaeaf mae'r fron a'r bol yn troi'n wyn ac mae'n haws ei gymysgu gyda'r Cwtiad aur, ond mae pig y Cwtiad aur yn llai ac hyd yn oed yn y gaeaf mae rhywfaint o liw aur ar y cefn, sy'n absennol yn y Cwtiad llwyd. Os oes amheuaeth y peth gorau i'w wneud yw disgwyl i'r aderyn hedfan. Mae gan y Cwtiad llwyd ddarn du amlwg ar ei gesail tra mae'r Cwtiad aur yn wyn yma.
![Thumb image](http://upload.wikimedia.org/wikipedia/commons/thumb/3/34/Pluvialis_squaterola_jcwf3.jpg/640px-Pluvialis_squaterola_jcwf3.jpg)
![Thumb image](http://upload.wikimedia.org/wikipedia/commons/thumb/a/ab/Pluvialis_squatarola_MHNT.jpg/640px-Pluvialis_squatarola_MHNT.jpg)
Mae'n nythu ar rostir agored ar ynysoedd yn yr Arctig o ogledd Canada i ogledd-ddwyrain Rwsia. Adeiledir y nyth ar lawr. Mae'n aderyn mudol, yn symud tua'r de yn y gaeaf cyn belled a de Ewrop a gogledd Affrica, De America cyn belled i'r de a'r Ariannin ac Awstralia.
Yn wahanol i lawer o rydyddion, nid ydynt yn gwthio'r pig i'r mwd i chwilio am fwyd, yn hytrach maent yn cerdded o gwmpas i chwilio am unrhyw pryfed neu anifeiliaid bach sydd i'w gweld ar yr wyneb. Maent yn bwydo ar fwd ger glan y môr fel rheol.
Nid yw'r Cwtiad llwyd yn nythu yng Nghymru, ond mae cryn nifer yn treulio'r gaeaf yma.