U Mio Paese hè una puesia di Ghjuvan' Petru Lucciardi (1862-1928). Face parte di i Canti Corsi, publicati in u 1921. U Mio Paese O caru, Santu Petru, quant' hè bellu ! Hè spergugliatu è ascostu à tramuntana, Si diceria chì parte in caravana... À u mondu ùn si ne trova cum’ed ellu. Hè di u Nebbiu lu spechju è lu giuiellu, Cun dodeci paesi per cullana ; Si stà cuntentu, espostu à la sulana È accoglie à bracce aperte à questu è à quellu. Quand' u vecu mi ride da luntanu Cume una mamma à li so figliulelli ; Eiu, allegru, l’inviu un basgiamanu ; È corru à salutà vechji è zitelli ; E case, e piazze, e le stradelle appese... L’amu più ch'è à me stessu, u mio paese ! Riferimenti Ghjuvan Petru Lucciardi (1921) Canti Corsi, Castelnaudary, Sucietà d'Edizione Occitane. Da vede dinù Ghjuvan' Petru Lucciardi Santu Petru di Tenda Wikiwand - on Seamless Wikipedia browsing. On steroids.