capitale di u Messicu From Wikipedia, the free encyclopedia
Cità di u Messicu (in spagnolu: Ciudad de México, abbreviatu CDMX; in nahuatl: Āltepētl Mēxihco) hè a capitale di u Messicu.
|
Cità di u Messicu Ciudad de México | |
 | |
| Paese | Messicu |
| Superficia | 1.485 km² |
| Populazione | 9.209.944 (2020) |
| Latitudine | 19° 25′ 10″ N |
| Lungitudine | 99° 08′ 44″ O |
| altitudine | 2.400 m |
| Situ ufficiali | https://www.cdmx.gob.mx/ |
Conta 9 209 944 abitanti (2020), cù una densità di pupulazione di 6 202 abitanti per km². L'abitanti sò chjamati i capitalinos.
Sicondu a custituzione messicana, hè una entità federative. Ùn hè micca una cità è ùn hè micca un statu, malgradu u so nome Ciudad de México (Cità di u Messicu).[1]
A cità hè un centru finanziriu, ecunomicu, puliticu è cultare impurtante.
A Cità di u Messicu si trova a u centru di u paese, à una altitudine di 2400 metri. A so superficia hè di 1 485 km².
.jpg)
L'Aztèchi si sò stallati in a valle di u Messicu in u XIIIu seculu. Sicondu certi miti, anu fundatu a capitale Tenochtitlán in u 1325, dopu à una longa migrazione da u nordu. Arrivatu à u lavu Texcoco, anu vistu un àcula pusatu nantu à una fica d'india, è manghjendu un anguì. Ma a listessa scena era stata discritta da u diu di u Sole è di a Guerra Huitzilopochtli. Anu vistu cusì un segnu attraversu stu avvenimentu, è anu dicisu di si appancà in stu locu. Custrusenu un paese nantu à un'isula, à u centru di u lavu. Poi l'Aztèchi spiananu u paese in e padule circundanti è sviluppanu l'agricultura in a valle. I culturi intensivi sò drenati da canali. In u paese, l'Aztechi custruiscenu scole, templi è altri edifizii. L'isula hè culligata à a terra da argini situati nantu à u lavu.[2] A pupulazione in u 1519 era stimata à circa 400 000 persone, a più grande concentrazione residenziale in a storia mesoamericana.[3] Sicondu l'etnologu francese Jacques Soustelle, l'Aztèchi si sò stallati in stu locu perchì tutti l'altri eranu occupati da tribù più putenti.[4]
In u 1519, u cunquistador Hernan Cortés hè statu incaricatu da u guvernatore di Cuba per viaghjà in u Messicu è appurtunà u cuntattu cù e pupulazioni lucali. Ghjuntu nantu à e coste messicane, crea a cità di Veracruz in lugliu, poi marchja cù 300 Spagnoli è 800 Totonachi, un populu stancu di a duminazione azteca. Ghjunghjenu in Tenochtitlan à u mese di nuvembri. Moctezuma II accoglie i Spagnoli in boni condizioni. Ma a tensione aumenta rapidamente, è questu porta à massacri, cum'è durante u massacru di Toxcatl, urganizatu da Pedro de Alvarado in u 1520. In questu clima di viulenza orchestratu da i culoni spagnoli, a pupulazione azteca dicide d'infarrassi è urganiza a Noche Triste. L'auropeani sò custretti à lascià, ma vultanu à u mese di maghju di u 1521 per assedià a cità di Tenochtitlan. A cità cascò u 13 d'aostu di u 1521.[5]
Dopu à a conquista di l'imperu aztecu da l'Auropeani, a cità divinta a capitale di a Nova-Spagna. L'edifizii aztechi sò distrutti salvu u palazzu di Moctezuma chì diventò a residenza di Hernan Cortés. A cità di Messicu hè stata spartuta in quartieri. Un prucessu d'assimilazione culturale è d'educazione di i populi autoctoni si face in e scole situate in cunventi religiosi. Ma a situazione giugrafica di a cità face ch'ella cunosce spessu inundazione. A cità di Messicu hè in espansione è u lavu hè asseccatu per riduce u riscu d'inundazioni. Duranti a notte di u 15 à u 16 di settembre di u 1810, Miguel Hidalgo hà lanciatu u "cridu per l'indipendenza" ancu cunnusciutu cumè "el Grito".[6]
Dopu à l'inipendenza, a Cità di Messicu diventa a capitale di u statu di Messicu. Ma u 18 di nuvembre di u 1824, u Cungressu messicanu hà decisu di a criazione d'un distrittu federale, una entità chì accoglie i puteri federali.[7] Duranti a Guerra di a Riforma (1858-1861), chì oppone liberali è cunsirvaturi, tutti i monasteri di a cità sò stati demoliti. A cità s'allarga in u 1865, quandu Massimilianu d'Austria, imperatore di u Messicu, hà custruitu u Paseo del Emperador (oghje, Paseo de la Reforma), chì cunghjunta u so palazzu à u castellu di Chapultepec. A cità cresce. L'uffiziu postale è u Palazzu di i Belli Arti dimustranu l'influenza architetturale francese. In u 1913, durante a “Decena Trágica”, un colpu di statu guidatu da Victoriano Huerta è una parte di l'armata messicana hà sbulicatu Francisco Madero.
In u 1968, u mondu era attraversatu da manifestazioni studianti. Quist'annu, a Città di Messicu era rispunsevuli di l'ospitu di i Ghjochi Olimpichi. U 28 di lugliu, manifestazioni viulenti sò state ripresse da a pulizza è lascianu 10 morti. U 2 d'ottobre, una nova manifestazione hà fattu in Tlatelolco. L'armata spara à a folla. Ci sò 300 morti. Questu avvenimentu hè cunnisciutu cum'è u massacru di Tlatelolco. U 19 di settembre di u 1985, a Cità di Messicu hè stata scuzzulata da un terramotu chì hà tombu 10 000 persone. À a fine di l'anni 90 principia a custruzzione di a Torre Mayor. Diventa a torre più alta di a cità.
A Cità di u Messicu si trova a u centru di u paese, à una altitudine di 2400 metri. À u nordu, u punente è u livante si trova u Statu di Messicu è à u sudu u Statu di Morelos. A cità hè situata à 106 km da Puebla è à 387 km da Oaxaca de Juárez.
Cità di Messicu si trova in a valle di listessu nome. Intornu à a valle ci sò parechji munti è vulcani. A u punente, ci hè a Sierra de las Cruces, à u sudu a Sierra de Ajusco-Chichinauhtzin è à u nordu a Sierra de Guadalupe. U più famose volcanu hè certamenti u Popocatepetl.
Anticamenti, in u locu di l'attuale cità, ci era u lavu Texcoco. Ma stu lavu hè statu asseccatu da i conquistadors spagnoli. Oghje, l'ultimi tracci di stu lavu sò situati in Xochimilco. Ci sò sempri canali.
U sottutarra di a cità hè cumpostu d'arzilla, di cenara è d'uni pochi di stacche d'acqua. Questu favurizeghja e svangarunate di terrenu. A Cità di Messicu s'addentra di qualchì centimetri ogni annu.
Cità di u Messicu pusseda un guvernu. Hè scumpartuta in 16 circundarii administrativi. Sti circundarii sò spartuti in quartieri. Ci sò 400 quartieri in a Cità di u Messicu.
| Circundariu | Populazione | Superficia |
| Álvaro Obregón | 759 137 | 96,17 |
| Azcapotzalco | 432 205 | 33,66 |
| Benito Juárez | 434 153 | 26,63 |
| Coyoacán | 614 447 | 54,4 |
| Cuajimalpa | 217 686 | 80.95 |
| Cuauhtémoc | 545 884 | 32,4 |
| Gustavo A. Madero | 1 173 351 | 94,07 |
| Iztacalco | 404 695 | 23,3 |
| Iztapalapa | 1 835 486 | 117 |
| Magdalena Contreras | 247 622 | 74,58 |
| Miguel Hidalgo | 414 470 | 46,99 |
| Milpa Alta | 152 685 | 228,41 |
| Tláhuac | 392 313 | 85,34 |
| Tlalpan | 699 928 | 312 |
| Venustiano Carranza | 443 704 | 33,4 |
| Xochimilco | 442 178 | 122 |
U centru storicu di a Cità di Messicu hè situatu à u centru di a cità. Hè statu custruttu annantu à l'antica cità di Tenochtitlan. Ci sò parechji edifizii chì datanu di l'epica culuniale.
A cità hà un aeroportu internaziunale, l'Aeropuerto Internacional Benito Juárez.
A Cità di u Messicu hà a più longa reta di metropolitanu di latinoamerica, cù 12 linee, 200 chilometri di longu è 195 stazioni. In u 2019, 4,5 milioni persone anu utilizatu u metro ogni ghjornu.
Ci sò ancu linee d'autobus ind'a cità.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
