کەسایەتی خەیاڵی نێو جیھانی ئەڤەتار From Wikipedia, the free encyclopedia
تۆف بیفۆنگ (بە چینی: 北方拓芙؛ Běifāng Tuòfú) یان بە تەنھا تۆف، کارەکتەری خەیاڵییە لە زنجیرەی تەلەڤیزیۆنی ئەنیمەیشنیی ئەڤەتار: دوایین ملکەچپێکەری ھەوا و ئەفسانەی کۆرا، لەسەر پەخشی نیکلۆدیۆن.
تۆف بیفۆنگ | |
---|---|
کەسایەتی ئەڤەتار: دوایین ملکەچپێکەری ھەوا | |
یەکەم دەرکەوتن | وەرزی دووەم |
کۆتا دەرکەوتن | ئەفسانەی کۆرا و کۆمیکەکانی دواتر |
دروستکەر | مایکڵ دانتێ دیمارتینۆ، برایان کۆنێتزکۆ |
زانیاری | |
ناسناو(ەکان) | باشترین ملکەچپێکەری زەوی |
خێزان | خێزانی بیفۆنگ |
مناڵەکان | لین بیفۆنگ، سوین بیفۆنگ |
نەتەوە | شانشینی زەوی ![]() |
ملکەچپێکردنەکان | زەوی، کانزا (ئاسن) |
تۆف کچێکی زەوی ملکەچپێکەری ناسراوە لە جیھانی ئەڤەتاردا، کە توانای دەستکاری کردن و شێوە گۆڕین و جڵەوگرتنی بەرد، خۆڵ، چڵک و کانزاکانی وەک ئاسنی ھەیە.[1] لەبەر ئەوەی بە کوێری لەدایک بووە و دایک و باوکی پێیان وابووە توانای فێربوون و بەکارھێنانی توخمەکان و ملکەچپێکردنی سنووردارە و توانایەکی باشی نییە، بەڵام تۆف بە شێوەیەکی نھێنی و دوور لە خێزانەکەی فێری ملکەچپێکردنی زەوی و خاک بووە لە مشکە کوێرەکانی ژێر زەوی (Badgermole)، لە کۆتاییدا دەبێتە یەکەم کەس کە توانای ملکەچپێکردنی کانزاکانیشی ھەبێت لە چیرۆکی زنجیرەکەدا.
تۆف کەسێکی سەربەخۆ، ڕاستەوخۆ، شەڕانگێز، توند، نوکتە گێڕەوە و گاڵتەچییە. لە چەندین دیمەنی زنجیرەکەدا تۆف ھەندێک ڕەفتاری پیاوانەی لێ بەدی دەکرێت لەوانە قسەکردن بە دەنگی بەرز و تفکردن. زۆریش کەسێکی پاک نییە و حەز بە چڵکی و خۆ ڕووپۆش کردن بە تۆز دەکات.[2][3]
دایک و باوکی بە کوێری لەدایکبوونی تۆف وەک کەمئەندامییەک سەیر دەکەن و بۆیە چوونە دەرەوەی تۆف سنووردار دەکەن. سەرەڕای کەمئەندامییەکەی، تۆف پەرەی بە کارامەیی تایبەتی داوە بە ھاوبەشیکردن لەگەڵ ئەو مشکە کوێرانەی[kurdish-alpha 1] کە لە ئەشکەوتەکان نیشتەجێن.[4] تۆف بە لاسایی کردنەوەی جووڵەکانیان، بوو بە مامۆستای ھونەری جەنگی ملکەچپێکردنی زەوی، بەڵام تواناکانی خۆی لە خێزانەکەی بە نھێنی ھێشتەوە. تۆف زۆرجار لە پاڵەوانێتییەکانی Earth Rumble[kurdish-alpha 2] بەشداری کردووە. تا ئەو کاتەی ئانگ و ھاوڕێکانی تۆفیان لە پاڵەوانێتییەکدا بینی، ئانگ دەیویست تۆف ببێتە مامۆستای و فێری ملکەچپێکردنی زەوی بکات و شارەزایی لەو توخمەدا پەیدا بکات تا خۆی ئامادە بکات بۆ بەزاندنی پاشای ئاگر، کاتێک دایک و باوکی ئەم بابەتە دەزانن، تۆف زیاتر زیندانی دەکەن، بۆیە تۆف ڕادەکات بۆ ئەوەی یاوەری ئانگ و ھاوڕێکانی بکات وەک ڕاھێنەری زەوی ملکەچپێکردنی ئانگ، دایک و باوکی تۆف پێیان وایە ئەڤەتار ئانگ تۆفی ڕفاندووە. تۆف بە سەرکەوتوویی دەست دەکات بە فێرکردنی ئانگ بۆ ملکەچپێکردنی زەوی، ھەروەھا لە ھەمان وەرزی زنجیرەکە تۆف دەتوانێت کانزا ملکەچ پێبکات دوای ئەوەی لەناو بەربەستێکی ئاسنین دەستگیر دەکرێت و لەوێوە دەتوانێت فێری ئەو شێوازی ملکەچپێکردنەش ببێت.[5][6]
دوای ڕووداوەکانی کۆتایی وەرزی دووەم، تۆف لەگەڵ سۆکا و کاتارا و ھۆزی ئاوی باشوور دەست دەگرن بەسەر کەشتییەکی نەتەوەی ئاگر. تیمی ئەڤەتار گەشتەکەیان بەرەو شانشینی ئاگر بەڕێ دەکەن، لە شانشینی ئاگردا، تۆف لەڕێگەی توانا بەھێزەکەی کە دەتوانێت بچووکترین کاردانەوەی بەرامبەر و جووڵەکانیان بزانێت پارەیەکی زۆر بەدەست دەھێنێت بە یارییەکانی قومار و یارییە کلاسیکییەکان، تا دواتر ڕووبەڕووی پیاوی یەک چاو[kurdish-alpha 3] دەبنەوە و دەتوانن بەربەستەکەی تێپەڕێنن.[7]
کاتێک تیمی ئەڤەتار لە ھێرشکردنە سەر شانشینی ئاگر شکست دەھێنن، بەرەو پەرستگای ھەوای ڕۆژاوا دەڕۆن تا لەوێ بمێننەوە، لەوێدا زوکۆ دەیەوێت بچێتە تیمی ئەڤەتارەوە و دژی پاشای ئاگر بوەستنەوە، تۆف تاکە کەسە باوەڕی پێی ھەیە و دەیەوێت زوکۆ بچێتە تیمەکەوە، تا دوایی زوکۆ دەچێتە تیمی ئەڤەتارەوە و دەبێتە مامۆستای ئاگر ملکەچپێکردنی ئانگ.[8]
تۆف ئەکادیمیای ملکەچپێکردنی کانزای دامەزراندووە، کە دامەزراوەیەکی فێرکارییە بۆ یارمەتیدانی ملکەچپێکەرانی زەوی بۆ فێربوونی کانزا ملکەچپێکردن، پێنگە، تاریکەکە و ھۆ توون سێ قوتابی سەرەتایی ئەکادیمیاکەن.[9][10]
لێرەدا تۆف دووبارە ڕووبەڕووی باوکی دەبێتەوە، ھەرچەندە باوکی ڕەتیدەکاتەوە تۆف بە کچی خۆی بزانێت؛ تۆف بۆی دەردەکەوێت کە دایک و باوکی لەیەکتری جیابوونەتەوە، تا دوای چەند سەرکێشییەک باوکی لەگەڵیدا ئاشت دەبێتەوە.[11]
لە زنجیرەی تەلەڤیزیۆنی ئەنیمەیشنیی ئەفسانەی کۆرادا، دەردەکەوێت کە تۆف ھێزی پۆلیسی شاری کۆماری دامەزراندووە و ھونەری ملکەچپێکردنی کانزای ئەکادیمیاکەی پەرە پێداوە.[12] دوو لە خوێندکارەکانی کچەکانی خۆی بوون بە ناوی لین و سوین[kurdish-alpha 4].[13] بەھۆی کاروباری پۆلیسی شاری کۆمار تۆف کەمتر گرنگی بە منداڵەکانی دەدات، لین کە کچی گەورەی تۆفە ھەمان پیشەی دایکی دووبارە دەکاتەوە و دەبێتە ئەفسەری پۆلیسی شاری کۆمار، سوین کە کچی بچووکی تۆفە، شارێک لە کانزا و ملکەچپێکەرانی کانزا دروست دەکات لە نێو شانشینی زەوی.[14][15]
لە وەرزی چوارەمی زنجیرەی ئەفسانەی کۆرا، تۆف لە ماڵێکی کێویانەی ڕۆحییدا دەژیت، لەوێ ژەھری جەستەی ئەڤەتار کۆرا دەردەھێنێت، پاشان لە ئەڵقەکانی دواتردا یارمەتی ئازادکردنی سوین و خێزانەکەی دەدات لە ھێزی داگیرکاری شانشینی زەوی کە کوڤیرا سەرکردایەتی دەکات.[16][17]
تۆف توانایەکی میکانیکی سەرسووڕھێنەری ھەیە کە دەتوانێت ھەست بە لەرزینەکانی زەوی بکات بە مەودایەکی زۆر دووریش تەنیا لەڕێگەی قاچ و دەستەکانی یاخود لەڕێگەی ھەواوە، ئەمەش بەھۆی کوێربوونییەوەیە، کە وایلێکردوە ھەستەوەرەکانی جەستەی زیاتر و چالاکتر بن.
لە تەواوی جیھانی ئەڤەتاردا، تۆف یەکەم ملکەچپێکەری زەوییە کە بتوانێت کانزای ملکەچ پێبکات. کاتێک تۆف لە بەربەستێکی کانزایی ئاسن زیندانی دەکرێت، تۆف لەڕێگەی ھەستەوەرەکانییەوە شوێنی لاوازی ئاسنەکە دەدۆزێتەوە و دەستکارییان دەکات بۆ ئەوەی بەشی کانزاکە ملکەچ پێبکات. ھەروەھا بە درێژایی چیرۆکی زنجیرەکە، تۆف زیاتر فێری ملکەچپێکردنی کانزا دەبێت و خۆی بەرەو پێش دەبات.[18][19][20][21]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.