فیلمێکی ٢٠٢٢ی ئەمریکییە From Wikipedia, the free encyclopedia
فەرمانڕەوایەتیی جیھانی جوراسی (بە ئینگلیزی: Jurassic World Dominion) فیلمێکی خەیاڵی زانستی ئەکشنی ساڵی ٢٠٢٢ی ئەمریکییە. لە دەرھێنانی کۆڵین ترێڤۆرۆ، کە ھاوبەشی سیناریۆی فیلمەکەی لەگەڵ ئێمیلی کارمایکل لە چیرۆکێکی دێریک کۆنۆلی و ترێڤۆرۆ نووسیوە. ئەم فیلمە پاشکۆیەکە بۆ فیلمی جیھانی جوراسی: شانشینی کەوتوو (٢٠١٨)، سێیەم و کۆتا قۆناغە لە بەشەکانی جیھانی جوراسی و شەشەم قۆناغە بە گشتی لە زنجیرە فیلمەکانی پارکی جوراسی، و کۆتایی بەو ھێڵی چیرۆکە ھێنا کە لە پارکی جوراسی (١٩٩٣) دەستی پێکرد. فیلمەکە چەند ڕۆڵگێڕێکی پڕ ئەستێرەی ھەیە کە بریتیین لە: کریس پرات، بڕایس داڵاس ھاوارد، لاورا دێرت، جێف گۆڵدبڵوم، سام نێڵ، دیواندا وایس، عومەر سی. دێرن و گۆڵدبلوم و نیل ڕۆڵی خۆیان لە بەشەکانی پارکی جوراسی دووبارە دەکەنەوە، بۆ یەکەمجار لە دوای فیلمە ڕەسەنەکەوە پێکەوە دەردەکەون. فیلمی جیھانی جوراسی: فەرمانڕەوایەتی گشتی چوار ساڵ دوای ڕووداوەکانی فیلمی جیھانی جوراسی: شانشینی کەوتوو دانراوە، لەگەڵ دایناسۆرەکان کە ئێستا شانبەشانی مرۆڤەکان لە سەرانسەری جیھاندا دەژین. فیلمەکە بەدوای ئۆین گرادی و کلێر دیرینگدا دەسووڕێتەوە کە دەست دەکەن بە ئەرکێکی ڕزگارکردن، لەکاتێکدا ئالان گرانت و ئیلی ساتلەر لەگەڵ ئیان مالکۆم یەکدەگرن بۆ ئاشکراکردنی پیلانێکی کۆمپانیای جینۆمیکی بایۆسین کە ڕکابەری یەکجارەکی پارکی جوراسییە. پلاندانان بۆ فیلمەکە لە ساڵی ٢٠١٤ دەستی پێکرد، پێش بڵاوکردنەوەی یەکەم بەشی جیھانی جوراسی. وێنەگرتنی فیلمەکە لە مانگی شوبات تا تشرینی دووەمی ٢٠٢٠ لە ڤانکۆڤەری کەنەدا، سویس، ماڵتا ئەنجامدرا. کۆمپانیای لێجێندەری پیکچەرز بەھۆی کۆتایی ھاتنی ھاوبەشی چوار ساڵەی لەگەڵ یونێڤێرساڵ بەشداری بەرھەمھێنانی فیلمەکە نەبوو. جیھانی جوراسی: فەرمانڕەوایەتی گشتی بۆ یەکەمجار لە مەکسیکۆ سیتی لە ڕێکەوتی ٢٣ی ئایاری ٢٠٢٢ نمایش کرا، و لە ١٠ی حوزەیرانی ٢٠٢٢ لە ئەمریکا لەلایەن کۆمپانیای یوونیڤەرساڵ پیکچەرز بڵاوکرایەوە.[1] فیلمەکە ھاوشێوەی فیلمە دەستبەجێیەکانی پێش خۆی، سەرکەوتنێکی دارایی بەدەستھێنا و داھاتی یەک ملیار دۆلاری لە سەرانسەری جیھاندا بەدەستھێنا، بەمەش بووە سێیەم فیلمی زۆرترین داھاتی ساڵی ٢٠٢٢، و سێیەم فیلم کە لە دوای پەتای کۆڤید-١٩ بڵاوکرایەوە و داھاتی یەک ملیار دۆلاری بەدەستھێنا، و چوارەم فیلمە لەم زنجیرەفیلمەدا کە داھاتی یەک ملیار دۆلاریی بەدەستھێناوە. بەگشتی لەلایەن ڕەخنەگرانەوە پێداچوونەوەی نەرێنی لێکرا.
فەرمانڕەوایەتیی جیھانی جوراسی Jurassic World Dominion | |
![]() | |
دەرھێنەر | کۆلین ترێڤۆرۆ |
---|---|
بەرھەمھێنەر | فرانک مارشال پاتریک کرۆلی |
سەرچاوەی چیڕۆک | دێرێک کۆنۆلی کۆلین ترێڤۆرۆ |
چەشنی فیلم | خەیاڵی زانستی ئەکشن |
کاست | کریس پرات بڕایس داڵاس ھاوارد لاورا دێرت جێف گۆڵدبڵوم سام نێڵ دیواندا وایس عومەر سی |
مۆسیقا | مایکل جیاکینۆ |
وێنەگری سینەمایی | جۆن شوارتزمان |
دەستکاری | مارک سانگەر |
کۆمپانیای بڵاوکەرەوە | یوونیڤەرساڵ پیکچەرز |
ڕێکەوتی دەرچوون | ٢٣ی ئازاری ٢٠٢٢ (مەکسیکۆ سیتی) ١٠ی حوزەیرانی ٢٠٢٢ (ئەمریکا) |
ماوەی فیلم | ١٤٦ خولەک |
وڵات | ویلایەتە یەکگرتووەکانی ئەمریکا |
زمان | ئینگلیزی |
بەشێکە لە زنجیرەی | جیھانی جوراسی |
تێچوون | ١٦٥–١٨٥ ملیۆن دۆلار |
داھات | ١٫٠٠٤ ملیار دۆلار |
دوای چوار ساڵ لە وێرانکاری «ئایزلا نوبلار»ی جیھانی جوراسی: شانشینی کەوتوو، ئێستا دایناسۆرەکان لە ھەموو جیھاندا شانبەشانی مرۆڤ دەژین و ڕاو دەکەن. ئەم تێکچوونی ھاوسەنگییە چارەنووسی داھاتوو دیاری دەکات کە ئایا مرۆڤەکان لە لووتکەی ڕاوچییەکان دەمێننەوە لەسەر ھەسارەیەک کە ئێستا لەگەڵ ترسناکترین بوونەوەرەکانی مێژوودان
لە کاتی گفتوگۆ سەرەتایییەکان سەبارەت بە جیھانی جوراسی (٢٠١٥)، بەرھەمھێنەری جێبەجێکار ستێڤن سپیلبێرگ بە دەرھێنەر کۆڵین ترێڤۆرۆی ڕاگەیاندووە کە حەز دەکات فیلمی زیاتر دروست بکرێت سەبارەت بەم زنجیرەفیلمە.[11] لە نیسانی ٢٠١٤، ترێڤۆرۆ ڕای گەیاند کە ھەموو بەش بەدواداچوونەکانی زنجیرەفیلمی جیھانی جوراسی باس کراوە. ھەروەھا وتی کە دەیانەوێت شتێکی «کەمتر ئارەزوومەندانە و ئەڵقەیی» دروست بکەن، بە شێوەیەک کە دەتوانێت «بە ئەگەرێکی زۆرەوە ببێتە زنجیرەیەک کە ھەست بە چیرۆکێکی تەواوی بکرێت».[12] ترێڤۆرۆ، دواتر پرسیاری ئەوەی لێکرد کە چەندە نەخشەی داناوە کاتێک فیلمی جیھانی جوراسی لەم ساڵی ٢٠١٤یەدا وێنە دەگرێت، لە بەرامبەردا وەڵامی دایەوە و وتی: کە دەزانم چیرۆکەکە لە کوێ کۆتایی پێ دێت. ئاماژەی بەوەشکردووە، نەخشەدانان بۆ سەرەتا و ناوەڕاست و کۆتایی بەشەکان پێشوەختە «زۆر گرنگە بۆ زنجیرەفیلمێکی وەک ئەمە، و ئەگەر بەڕاستی بتەوێت خەڵکی بھێنیتە نێو فیلمێکەوە، ئەوا دڵنیابە ئارەزووی مانەوەیان دەبێت». پێویستە لەو ئاستەدا بیری لێبکرێتەوە و ھەروەھا فیلمەکانی پێشووتری پارکی جوراسی زیاتر ئەڵقەیی بوون و بەباشی تێپەڕبوونە.[13] ترێڤۆرۆ لە مانگی ئایاری ٢٠١٥ خواستی خۆی دەربڕی کە دەرھێنەری جیاواز کار لەسەر فیلمەکانی داھاتوو بکەن.[14] بەو باوەڕەی کە کەسانی دیکە دەتوانن تایبەتمەندی جیاواز بھێنن بۆ زنجیرەفیلمەکە، ھەروەھا ڕای گەیاند: «پێموایە ئەم زنجیرەفیلمە وەک زنجیرەفیلمەکانی میسیۆن ئیمپۆسیبڵ و جەنگی ئەستێرەکان دەنگ و دیدگای نوێ وەردەگرێت و پێویستە لە داھاتوودا ئەم زنجیرەفیلمە بمێنێتەوە و پەرە بسێنێتو باشتر بکرێت».[15]
ھەروەھا ئاماژەی بەوەشکردووە، زنجیرەکە ھەمیشە باس لە پارکێکی گەشتیاریی بۆ دایناسۆرەکان ناکات و فیلمەکانی داھاتوو دەتوانن لە چەمکی پێکەوەژیانی دایناسۆرەکان و مرۆڤەکان بکۆڵنەوە. فرانک مارشال بەرھەمھێنەری فیلمی جیھانی جوراسی نەخشەکانی بۆ سێیەم فیلمی جیھانی جوراسی لە کۆتایی ساڵی ٢٠١٥ پشتڕاستکردەوە، و دۆنا لانگلی سەرۆکی کۆمپانیای یونێڤێرساڵ پیکچەرز ڕای گەیاندووە کە ترێڤۆرۆ و سپیلبێرگ بیرۆکەیەکی چیرۆکییان بۆ فیلمەکە ھەبووە.[16] کریس پرات کە ڕۆڵی ئۆون دەگێڕێت لە فیلمەکەی ٢٠١٤، دڵنیایی دا کە لە فیلمەکانی داھاتوو ڕۆڵەکانی خۆی دووبارە دەکاتەوە.[17] ترێڤۆرو ئاماژەی بەوەشکردووە، ھاوڕێیەتی لە فیلمی جیھانی جوراسی لە نێوان ئۆون و باری (کە عومەر سی ڕۆڵی تێدا دەگێڕێت) دەتوانێت تا درێژەی فیلمەکان داھاتووش بەردەوام بێت.[18] ھەروەھا ئاماژەی بەوەشکردووە، کەسایەتی بڕایس داڵاس ھاوارد، کلێر، زۆرترین دەرکەوتنی دەبێت لە کاتی پێشکەشکردنی فیلمەکانی تری جیھانی جوراسیدا.[19]
یوونیڤەرساڵ پیکچەرز لە شوباتی ٢٠١٨ ڕای گەیاند کە ئەو فیلمە بێ ناونیشانە کە ئەوکات بە (جیھانی جوراسی ٣ - Jurassic World 3) ناسرابوو، لە ١١ی حوزەیرانی ٢٠٢١ نمایش دەکرێت.[20][21] ھەروەھا ڕاگەیەندرا کە ترێڤۆرۆ لەگەڵ ئیمیلی کارمایکلی تەمەن ٢٠ ساڵ سیناریۆی فیلمەکە دەنووسێت لەسەر بنەمای چیرۆکێکی ترێڤۆرۆ و ھاوبەشی نووسین، دێریک کۆنۆلی (کە لەگەڵیدا کاریان لەسەر سیناریۆی فیلمەکانی پێشووی جیھانی جوراسی کردووە).[22][23][24] ھاوشێوەی فیلمەکانی پێشوو، مارشال و پاتریک کرۆلی بەرھەمھێنەر دەبوون و ترێڤۆر و سپیلبێرگ وەک بەرھەمھێنەری جێبەجێکار دەگەڕێنەوە.[25] دوای مانگێک لە ڕاگەیاندنەکە، ترێڤۆرۆی وەک دەرھێنەریش پشتڕاستکرایەوە. جەی ئەی بایۆنا دەرھێنەری فیلمەکەی پێشوو بوو، بەناوی جیھانی جوراسی: شانشینی کەوتوو؛[26] ترێڤۆرۆ وتی: کە ئیلھامێکی زۆری لە کارەکانی بایۆنا وەرگرتووە بۆ فیلمەکە و دەڵێت «ئەوە وای لێکردم حەزم لێیە ئەم کارە تەواو بکەم کە دەستمان پێکردووە».[2] ھەروەھا سپیلبێرگ داوای لە ترێڤۆرۆ کردبوو وەک دەرھێنەر بگەڕێتەوە. ترێڤۆرۆ بڕیار بوو دەرھێنەری فیلمێکی نوێی جەنگی ئەستێرەکان ببێت بەناوی «جەنگی ئەستێرەکان: سەرھەڵدانی سکای واکەر»، پێش ئەوەی لە مانگی ئەیلوولی ٢٠١٧ پڕۆژەکە بەجێبھێڵێت، ھەربۆیە ئەو ئەزموونەی لە فیلمی جەنگی ئەستێرەکاندا ھەیبوو، بۆ سێیەم و کۆتا فیلمی فەرمانڕەوایەتی جیھانی جوراسی وەک ڕێبەرێکی پراکتیکی بەکارھێنا.[27] ھەروەھا ئەو کەسانەی کە لەگەڵ ترێڤۆرۆ لە جەنگی ئەستێرەکان کاریان کردووە، دواتر پەیوەندییان پێوەی کرد بۆ فیلمی فەرمانڕەوایەتی جیھانی جوراسی. کۆمپانیای لێجێندەری ئینتەرتەینمەنت ھاوبەشی دارایی دوو فیلمی پێشووی کردووە بەڵام پەیوەندی بە فیلمی سێیەمەوە نەبووە، بەو پێیەی گرێبەستی پێنج ساڵەی لەگەڵ یوونیڤەرساڵ پیکچەرز لە ساڵی ٢٠١٨ کۆتایی ھات.[28]
لە ١٩ی شوباتی ٢٠٢٠، یەکەیەکی بەرھەمھێنانی فڕۆکەی بێفڕۆکەوان بەکارھێنا بۆ وێنەگرتنی دیمەنە ئاسمانییەکان لە "کاتدراڵ گرۆڤ" لە دوورگەی ڤانکۆڤەری کەنەدا.[29][30] فۆتۆگرافی سەرەکی لە ٢٤ی شوبات لە بریتش کۆلۆمبیا دەستیپێکرد و ڕۆژی دواتر ناونیشانی فیلمەکە بە ناوی (فەرمانڕەوایەتی جیھانی جوراسی - Jurassic World Dominion) ڕاگەیەندرا.[31][32] وێنەگرتن لە کەنەدا لە سەرەتای مانگی ئازاری ٢٠٢٠ کۆتایی ھات.[33][34] بەرھەمھێنان گواسترایەوە بۆ ئینگلتەرا، شوێنێکی سەرەکی لەوێ ستۆدیۆی پاینوود بوو (ئەو دامەزراوەیەی کە بۆ جیھانی جوراسی: شانشینی کەوتوو بەکاردەھێنرا). ھەروەھا دواتر وێنەگرتن لە ماڵتا ئەنجامدرا. بوودجەی فیلمەکە لە نێوان ١٦٥ بۆ ١٨٥ ملیۆن دۆلار بووە.[35][36] «جۆن شوارتزمان» کە سینەماکار بوو، دوای ئەوەی لەگەڵ ترێڤۆرۆ کاریان لەسەر یەکەم فیلمی جیھانی جوراسی کرد و لە پرۆسەکەدا بوو بە یەکەم کەس کە وەک دەرھێنەری وێنەگری سینەمایی لە دوو فیلمی جوراسی پارکدا کاری کرد.[37] شوارتزمان فیلمەکە بە فیلمی ٣٥ ملم و فیلمی ٦٥ ملم و ڤیستاڤیژن وێنەگرتووە.[38] ھەندێک دیمەنی شەوانە بە شێوەی دیجیتاڵی وێنەگیرا بۆ یارمەتیدانی تیمی کاریگەرییە بینراوەکان لە کاتی پۆست-پرۆدەکشندا.[39]
وێنەگرتن لە مانگی ئازاری ٢٠٢٠ وەک ڕێکارێکی سەلامەتی بەھۆی پەتای کۆڤید ١٩ وەستان و لە سەرەتادا چاوەڕوان دەکرا لە ماوەی چەند ھەفتەیەکدا بڕیار لەبارەی دەستپێکردنەوەی بەرھەمھێنانەوە بدرێت.[40][41] لە کاتی دواکەوتنەکەدا، سینەماکاران کاتیان پاشەکەوت کرد بە ئەنجامدانی کاری پۆست-پرۆدەکشن لەسەر ئەو گرتە ڤیدیۆییانەی کە پێشتر گیراوە.[42][43] زۆربەی ئەم دیمەنانە دایناسۆرەکانیان تێدابوو، ئەمەش ڕێگەی بە تیمی کاریگەرییە بینراوەکان داوە دەست بکەن بە دروستکردنی ئەو بوونەوەرانە بۆ فیلمەکە.[44] لە کۆتاییدا یونێڤێرساڵ پشتڕاستی کردەوە کە وێنەگرتن لە مانگی تەممووزی ٢٠٢٠ لە ستۆدیۆی پاینوود دەست پێدەکاتەوە. کۆمپانیاکە نەخشەی دانابوو نزیکەی ٥ ملیۆن دۆلار بۆ پرۆتۆکۆڵی سەلامەتی خەرج بکات، لەوانە ھەزاران پشکنینی کۆڤید-١٩ بۆ ھەر کاست و ئەندامێکی تیمی فیلمەکە (کە پێش دەستپێکردنەوەی بەرھەمھێنان و چەند جارێک لە کاتی وێنەگرتندا پشکنینیان بۆ دەکرێت). دامەزراوەیەکی پزیشکی ڕاسپێردرا بۆ ئەنجامدانی پشکنینەکان و پزیشک و پەرستاران لە کاتی وێنەگرتندا لە شوێنی ڕووداوەکە بوون. کاست و تیمی فیلمەکە ڕاھێنانی کۆڤید-١٩یان پێدەکرا، سێتی پاینوودیش ١٥٠ وێستگەی پاککەرەوەی دەست و ١٨٠٠ ھێمای سەلامەتی لەخۆدەگرت بۆ ئەوەی ڕێوشوێنی سەلامەتی وەک دووری کۆمەڵایەتییان بیربخاتەوە. کاستەکە بەڵگەنامەیەکی ١٠٩ لاپەڕەیی وەرگرت کە پرۆتۆکۆڵەکانی سەلامەتیان تێدابوو.[45] تیمی بەرھەمھێنانی ٧٥٠ کەسی دابەشکرابوون بەسەر دوو گرووپدا، گرووپە گەورەکە پێکھاتبوو لە ئەندامانی تیم کە بەشداربوون لە بیناسازی و پاڵپشتی و چالاکییەکانی دیکەی پێش وێنەگرتن.[46]
گرووپە بچووکەکە پێکھاتبوو لە ترێڤۆرو و کاستەکە و ئەندامانی سەرەکی تیمەکە. لە ٦ی تەممووزی ٢٠٢٠ وێنەگرتن دەستی پێکردەوە.[47] ھۆتێلێکی ئینگلیزی لەلایەن کۆمپانیای یونێڤێرساڵەوە بەکرێ گیرا بۆ ماوەی وێنەگرتنەکە، ئەمەش ڕێگەی بە کاست و تیمی فیلمەکە دا بۆ ماوەی دوو ھەفتە کەرەنتینە بکەن پێش ئەوەی وێنەگرتن دەست پێبکاتەوە. دوای کەرەنتینەکردن ڕێگەیان پێدرا بەبێ دووری کۆمەڵایەتی و دەمامک لەبەرکردن لە ھۆتێلەکەدا بگەڕێن. کاست و کارمەندانی ھۆتێلەکە ھەفتەی سێ جار پشکنینیان بۆ دەکرا. بەکرێدانی ھۆتێلەکە، لەگەڵ ڕێکارەکانی خۆپارێزی کۆڤید-١٩، باوەڕی بە کاستەکە ھێنا کە دەستپێکردنەوەی وێنەگرتن سەلامەت دەبێت، چونکە ھۆتێلەکە «شوێنێک»ی پارێزەر بوو بۆ کاست و تیمی فیلمەکە. ترێڤۆرۆ ھانی کاستەکەی دا کە پێشنیار بکەن سەبارەت بە ڕۆڵی کەسایەتییەکانیان. ترێڤۆرۆ وتی: من و کاستەکە پەیوەندییەکی نزیکمان دروست کرد لەکاتێکدا چوار مانگ پێکەوە بووین، ئەمەش ڕێگەی پێداین کە کەسایەتییەکان ڕێکبخەین بە شێوەیەک کە ھەرگیز دەرفەتی ئەوەم نەدەبوو بەتەنیا بیکەم ئەگەر کات و ساتەکانی ئەم پەتایە نەبووایە. ڕێوشوێنی سەلامەتی نزیکەی ٩ ملیۆن دۆلاری تێچووە، بە ھۆتێلەکەشەوە. فیلمی «فەرمانڕەوایەتی جیھانی جوراسی»یەکێک بوو لە یەکەم فیلمە گەورەکان کە لە کاتی پەتاکەدا دەستی بە بەرھەمھێنان کردەوە، ھەروەھا نموونەیەک بوو بۆ بەرھەمە گەورەکانی دیکە لەسەر چۆنییەتی دەستپێکردنەوەی بەرھەمھێنان. یوونیڤەرساڵ فیلمەکەی بە بیرکەرەوە زانی بۆ دەستپێکردنەوە، پێویستی بە چەند شوێنێکی ڕاستەقینە ھەبوو لە دەرەوەی سێتی ستۆدیۆکان، و کاستێکی تاڕادەیەک بچووک و کەمی زیادەی ھەبوو. ھەروەھا دەستپێکردنی زووتری وێنەگرتن لە ئینگلتەرا ئاسانکاری کرد بۆ دەستپێکردنەوەی وێنەگرتنی ئەم فیلمە. نیل و دێرن و گۆڵدبلوم لە سەرەتای مانگی ئاب دەستیان بە وێنەگرتنی کردووە. لەو کاتەدا چوار ئەندامی تیمی وێنەگرتنی نێو کەشتییەکەی فیلمەکە لە ئینگلتەرا تووشی کۆڤید-١٩ بوون؛ چوارەکەی تر دوای گەیشتنیان بۆ ئەوێ پێش بەرھەمھێنان لە ماڵتا پشکنینیان ئەرێنی بووە. بڕیار بوو تیمی سەرەکی لە ماڵتا لەگەڵ پرات، ھاوارد و نیل وێنە بگرن، ھەرچەندە ئەم نەخشانە دوای زۆربوونی بارودۆخەکانی کۆڤید-١٩ ھەڵوەشایەوە. لە ئەنجامی ئەو زیادبوونەدا، شانشینی یەکگرتوو ماڵتای خستە ناو لیستی ئەو وڵاتانەی کە دەبێت ھاتنی لێوە بۆ ماوەی ١٤ ڕۆژ کەرەنتینە بکرێن.[48][49][50]
ترێڤۆرۆ دەیویست فیلمەکە لەو شوێنانەدا ئەنجام بدرێت کە پێشتر لە زنجیرەکەدا بوونیان نەبووە، لەوانە ماڵتا. وێنەگرتنی شوێن لە ئامێرەکان باشتر بوو و شاشەی شین (بلو سکرین) بە دەگمەن بەکاردەھێنرا لە فیلمەکەدا. فیلمی حوکمڕانی جیھانی جوراسی یەکەم فیلمە لەم زنجیرەفیلمەدا کە دایناسۆرەکانی لە ژینگەیەکی بەفراویدا تێدایە. ھەندێک دیمەن، کە لە سیرا نیڤادا دانراون، لە بریتیش کۆلۆمبیا لە زستانێکی بەفراویدا وێنەیان گیراوە. بەزۆری لەنێو شوێنەکانی بریتیش کۆڵۆمبیا بوو، کە ناوەندی شارەکەی و ناوچەیەکی داراویی لەخۆگرتبوو. لە دیمەنێکی سەرەتاییدا، ئۆون و چەند کەسانێکی دیکە سواری ئەسپ دەبن بۆ ئەوەی کۆمەڵێک لە لە جۆری دایناسۆڕەکان بگرن و بیانپارێزن. ئەم فیلمە لەژێر کاریگەری فیلمی دۆڵی گوانگی ساڵی ١٩٦٩ و فیلمە ڕۆژاوایییەکانی دەیەی شەست و حەفتاکان بوو کە لە دیمەنە بەفراوییەکاندا جێگیرکراون. وێنەگرتن لە ستۆدیۆکانی پاینوود بریتی بوو لە شانۆی ٠٠٧ کە ئامێری گەورە تێیدا کۆدەکرانەوە. بە گشتی ١١٢ ئامێر بۆ فیلمەکە دروست کرا، لەنێویاندا بازاڕی ڕەشی تێدابوو.
ئاوازی فیلمەکە لەلایەن مایکل جیاکینۆوە دانراوە کە فیلمەکانی پێشووی جیھانی جوراسیی تۆمارکردووە.[51] لە ستۆدیۆکانی دەبی ڕۆد لە ئینگلتەرا لە ماوەی ١٠ ڕۆژدا تۆمارکراوە کە لە مانگی ئایاری ٢٠٢١ کۆتاییان پێ ھاتووە.[52][53][54] جیاکینۆ وەک گۆرانییەکانی پێشووی جیھانی جوراسی، دووبارە تەوەرەکانی گۆرانییەکانی پێشووی جۆراسی پارکی جۆن ویلیامس پێشکەش کردووەتەوە. نمرەکە لەلایەن کۆمپانیای باک لۆت میوزیک دابەشکراوە و لە ٣ی حوزەیرانی ٢٠٢٢ بە شێوەیەکی دیجیتاڵی بڵاوکرایەوە و دوای سێ ھەفتە بە شێوەیەکی فیزیکی بڵاوکرایەوە.
پێشبینییەکی پێنج خولەکی فیلمەکە لە مانگی حوزەیرانی ٢٠٢١ بە نمایشکردنی فیلمی "خێرا و توورە ٩" لە ئایماکسدا بڵاوکرایەوە.[55][56] ترێڤۆرو دەیویست دیمەنەکە پێنج خولەکی یەکەمی فیلمەکە بێت پێش ئەوەی لە شانۆکەدا دەربھێنێت.[57] ئەو گرتە ڤیدیۆیییە لە ٢٣ی تشرینی دووەمی ٢٠٢١ بە شێوەی ئۆنلاین بڵاوکرایەوە، وەک کورتە فیلمێکی سەربەخۆ و پێشەکی بۆ فیلمی حوکمڕانی جیھانی جوراسی. یەکەم ترەیلەر لە ١٠ی شوباتی ٢٠٢٢.[58]
فیلمی حوکمڕانی جیھانی جوراسی لە ٢٣ی ئایاری ٢٠٢٢ بۆ یەکەمجار لە مەکسیکۆ سیتی نمایشکرا و لە یەکەمی حوزەیران لە مەکسیک و کۆریای باشوور دەستی بە نمایشکردنی شانۆیی کرد.[59][60][61] لە ئەمریکا فیلمی حوکمڕانی جیھانی جوراسی لە ١٠ی حوزەیران لەلایەن کۆمپانیای یوونیڤەرساڵ پیکچەرز بە شێوەی شانۆیی نمایشکرا؛ بڕیار بوو لە ١١ی حوزەیرانی ٢٠٢١ بڵاوبکرێتەوە، بەھۆی پەتاکە دواکەوت.[62] فیلمەکە لە ١٤ی تەممووزی ٢٠٢٢ بۆ کڕین و کرێی دیجیتاڵی بڵاوکرایەوە و لە ١٦ی ئابدا لەسەر «فۆڕکەی ئاڵترا ئێچ دی» و «بلو ڕەی» و دی ڤی دی نمایشکرا.[63][64][65][66] بڵاوکردنەوەی ڤیدیۆی ماڵەوەی وەشانی درێژکراوەی حوکمڕانی جیھانی جوراسی لەخۆدەگرێت کە ١٤ خولەکی گرتە بڕاوەکانی تێدا نۆژەن کراوەتەوە، بەمەش کۆی کاتی نمایشکردنەکە دەگاتە ١٦٠ خولەک. لە ئەمریکا، وەشانی شانۆیی و درێژکراوە لە ٢ی ئەیلوولی ٢٠٢٢ لە ماڵپەڕی پیکۆکی کۆمپانیای یونێڤێرساڵ نمایشکرا، ئەمەش لە چوارچێوەی گرێبەستێکی ١٨ مانگەدا کە تێیدا فیلمەکە بۆ ماوەی ١٠ مانگ دەچێتە ئەمازۆن ڤیدیۆ پێش ئەوەی بگەڕێتەوە بۆ پیکۆک بۆ چوار مانگی کۆتایی.[67][68]
فیلمی حوکمڕانی جیھانی جوراسی لە ئەمریکا و کەنەدا ٣٧٦٫٩ ملیۆن دۆلاری بەدەستھێناوە، لە ناوچەکانی دیکەشدا ٦٢٦٫٩ ملیۆن دۆلار بووە، کە کۆی گشتی داھاتی جیھانی ١٫٠٠٤ ملیار دۆلار بووە. ئەم فیلمە سێیەم فیلمە کە زۆرترین داھاتی ساڵی ٢٠٢٢ی بەدەستھێناوە، ھەروەھا ٥٠مین فیلم بوو کە ڕێژەی ملیار دۆلاریی تێپەڕاندووە، چوارەمین فیلمی جوراسییە، و ھەروەھا سێیەم فیلمە کە لە سەردەمی پەتای کۆڤید-١٩دا بڵاوکرایەوە (دوای فیلمی پیاوی جاڵجاڵۆکە: ھیچ ڕێگەیەک نییە بۆ نیشتیمان و تۆپ گەن: ماڤێریک).[69][70][71][72] دێدلاین ھۆڵیوود قازانجی فیلمەکەی بە ٢٢٩٫٧ ملیۆن دۆلار بە ژمێریاری بوودجەی بەرھەمھێنان، بازاڕکردن، بەشداریکردنی بەھرەمەندەکان، و تێچوونەکانی تر ھەژمار کردووە. لە ئەمریکا و کەنەدا، پێشبینی دەکرا فیلمەکە لە کۆتایی ھەفتەی یەکەمی فیلمەکەدا نزیکەی ١٢٥ ملیۆن دۆلار لە ٤٦٧٦ سینەما بەدەستبھێنێت.[73] دوای ئەوەی لە یەکەم ڕۆژیدا ٥٩٫٥٥ ملیۆن دۆلاری بەدەستھێنا (لەوانەش ١٨ ملیۆن دۆلار لە پێشبینییەکانی شەوی پێنجشەممە، کەمێک لە خوار ١٨٫٥ ملیۆن دۆلاری یەکەمی جیھانی جوراسی ١ و لە سەرووی ١٥٫٣ ملیۆن دۆلاری شانشینی کەوتووەوە)، خەمڵاندنی کۆتایی ھەفتە بۆ ١٤٢ ملیۆن دۆلار بەرزکرایەوە. باشترین کۆتا کردنەوەی فیلمێکی ناسووپەرھیرۆ بوو، بە لەبەرچاوگرتنی پێشوازییە نالەبارەکانی ڕەخنەگران و نمرەی مامناوەندی دەرچوونی بینەران، دێدڵاین ھۆڵیوود نمایشەکەی بە «سەرسوڕھێنەر» ناوبرد. ئەمە چوارەم بەرزترین کۆتایی ھەفتەی کردنەوەی فیلمی یوونیڤەرساڵ پیکچەرز بوو، لە دوای دوو فیلمەکەی پێش خۆی و فیلمی خێرا و تووڕە ٧ی ٢٠١٥.[74]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.