象棋

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

---

象棋未行辰候其排法

象棋是中國傳統其蜀種棋類遊戲，有其辰候卜想共國際象棋區別開來，特零意告伊中國象棋。中國、越南、琉球客佻這棋其儂比較価。

象棋由兩隻儂行，蜀隻儂拈紅其子，蜀隻儂拈烏其。一般來講，拈紅其着先行。每蜀方都有1粒將、2粒士、2粒田、2頭馬、2粒車、2粒炮、5粒卒。拍將號𡅏將軍，僅是將軍以後無塊走就號𡅏殺棋或者完棋，乞儂殺棋其許蜀方就輸了。僅是夫儂都無辦法將對方其將刣囇，就號𡅏和棋。

棋盤臺中有蜀橫空其地方，懸頂寫“河界”兩字，這地方一般乞儂號𡅏河。每蜀方最後蜀橫都有蜀隻共漢字“米”字嘢像其地方，嚽號𡅏宮。田𣍐使過河；卒囝過河以後會使橫行；將共士𣍐使出宮。

象棋子共行法

棋其樣式	名字	平話字	行法
	將	Chióng	也號𡅏將軍。會使橫𡅏或者直直𡅏行蜀格，𣍐使出宮。𣍐使乞儂食囇，𣍐使共對方其將正正式對𡅏（嚽號𡅏對將）。僅是自家其將蜀死就輸了。
	士	Sê̤ṳ	僅中着宮裡勢斜𡅏行，每蜀回行蜀格。大部分其辰候這棋是掏𡅏保護將其。行士也號𡅏“蹩士”。
	田	Dièng	行田字格，故此號𡅏“田”。田字格其臺中號𡅏田眼，𣍐使有子，僅無行𣍐過。田𣍐使過河。
	車	Gṳ̆	橫、直都會行，僅是無子堵着墿臺中，愛行幾步行幾步，故此是象棋臺中其蜀種嘢重要其棋。
	馬	Mā	行日字格：就是等先行前蜀步，再斜𡅏行蜀步，茲兩步合蜀堆。前斗夫塊號𡅏馬骹，𣍐使有子，僅無𣍐行。嚽嘢好理解：馬其行法等是頭先講其兩步合蜀步，僅是頭蜀步都行𣍐來，就伓使講第2步了。馬是象棋裡勢最倫活其蜀子。
	炮	Páu	行墿其辰候共車蜀樣；食子其辰候着隔蜀子拍過去，隨便幾格都會使。
	卒	Cók	也號𡅏“卒囝”。每蜀步行蜀格；未過河其辰候僅中向前斗直直式行蜀格；過河以後也會橫𡅏行。𣍐使後退。

維基共享裡勢有共象棋有干過其內容。