![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/5/5b/British_Museum_Flood_Tablet_1.jpg/640px-British_Museum_Flood_Tablet_1.jpg&w=640&q=50)
Meurgan Gilgamech
From Wikipedia, the free encyclopedia
Meurgan Gilgamech zo ur varzhoneg veurzanevellek eus Mezopotamia hag a zo e-mesk an oberennoù lennegezh koshañ anavezet er bed. Soñjal a ra al lenneien e teu eus un heuliad mojennoù ha barzhonegoù sumerian diwar-benn haroz an istor, Gilgamech roue Uruk, a oa kempennet kalz diwezhatoc'h en ur meurgan akkadek. Ar stumm klokañ zo anavezet hiziv an deiz zo bet miret war 12 tablezenn bri eus levraoueg Asourbanipal, ur roue eus Asiria ar VIIvet kantved. E ditl kentañ a oa Hennezh hag a welas an deun (Sha naqba īmuru) pe Dreist an holl rouanez all (Shūtur eli sharrī), a zo ar c'hentañ gerioù eus ar meurgan e stummoù disheñvel.
![Thumb image](http://upload.wikimedia.org/wikipedia/commons/thumb/5/5b/British_Museum_Flood_Tablet_1.jpg/640px-British_Museum_Flood_Tablet_1.jpg)
E-kreiz an danevell e kaver an darempred etre Gilgamech hag e geneil, Enkidu. Enkidu a oa un den gouez krouet gant an doueed da vezañ par Gilgamech, da viret outañ a waskañ keodediz Uruk. Kas a reont da benn asambles kestoù dañjerus hag a laka droug da sevel en doueed. Da gentañ e veajont o-daou betek Menez ar Sedrenn da faezhañ Humbaba, e euzhvil a ward. Diwezhatoc'h e lazhont Tarv ar Baradoz kaset gant an doueez Ichtar da gastizañ Gilgamech da vezañ graet fae warni.
Lodenn ziwezhañ ar meurgan a zanevell ar gest evit an divarvelezh boulc'het gant Gilgamech da-heul marv Enkidu. Gilgamesh a glask deskiñ sekred ar vuhez peurbadus oc'h ober ur veaj hir hag arvarus da gejañ gant haroz divarvel al Liñvadenn Veur, Utnapishtim. En diwezh, ar gerioù lâret da C'hilgamech e-kreiz e gest a ziougan disoc'h e veaj : "Ar vuhez emaoc'h o klask ne gavot nepred. Pa oa krouet Mab-Den gant an doueed e rojont dezhañ ar marv da lod, met ar vuhez a zalc'hjont en o c'herz." Gilgamech, koulskoude, a oa meulet a-c'houdevezh abalamour d'ar savadurioù savet gantañ, hag abalamour m'en doa degaset da Uruk anaoudegezhioù diwar-benn an azeulerezh a oa kollet abaoe pell, a-drugarez d'e gejadenn gant Utnapishtim. Troet eo bet ar meurgan e meur a yezh hag an haroz, Gilgamech, zo deuet da vezañ un haroz eus ar sevenadur poblek.