Kelc'h

Ar c'helc'h a zo anezhañ ur grommenn blaen serr a c'hoarvez eus kement poent eus ur plaen a zo keitpell diouzh ur poent roet, anvet "kreizenn ar c'helc'h". Ar pellder boutin-se etre ar poentoù eus ur c'helc'h hag e greizenn a vez graet skin anezhañ.

Ur c'helc'h boas

Rannet eo ar plaen e div lodenn gant ar c'helc'h : an diabarzh hag an diavaez (e gwirionez ez eus un trede lodenn : ar vevenn etre an diabarzh hag an diavaez). Er yezh pemdez e c'heller ober "kelc'h" eus ar vevenn (an drolinenn), pe eus an holl figurenn : ar vevenn hag an diabarzh. Hiziv an deiz e matematik e vez graet "kelc'h" eus ar vevenn (ar grommenn), tra ma vez graet "disk" eus an diabarzh (ar c'horreenn).

En ur spas n-ment e vez graet sferenn eus teskad ar poentoù a zo keitpell diouzh ur greizenn. Setu ez eus ur sferenn div-vent eus ar c'helc'h.

Termenadurioù all

Kordenn a reer eus ar segmantoù a zo o daou benn war ar c'helc'h. Gwareg-kelc'h' a reer eus al lodennoù eus ar c'helc'h bonnet gant daou boent. Skin a reer eus ar segmantoù etre ar greizenn hag ur poent eus ar c'helc'h. Diametr a reer eus ar c'herdin a dremen dre ar greizenn. Tañjantenn a reer eus an eeunennoù a stok ouzh ar c'helc'h en ur poent hepken. Kornad a reer eus al lodennoù eus an disk a zo etre daou skin. Segmant kelc'hiek a reer eus al lodennoù eus an disk a zo etre ur gordenn hag ur wareg-kelc'h, dezho ar memes pennoù.

Linennoù stag ouzh ar c'helc'h

Kornad ha segmant kelc'hiek.

Gwelet ivez

Sellit ouzh ar ger kelc'h er
wikeriadur, ar geriadur frank.

• Kelc’h enskrivet
• Kelc’h troskrivet
• Kelc’h Euler
• Kelc’h trigonometrek
• Levr III Elfennoù Euklides
• Skoulmad Napoleon
• Sferenn