From Wikipedia, the free encyclopedia
वीगर (अंग्रेजी: Uyghurs) चाहे उइग़ुर, तुर्क मूल के एगो नृजातीय समूह (एथनिक ग्रुप) हवे। एह लोगन के उतपत्ती एशिया के बिचला इलाका (सेंट्रल एशिया) आ आसपास के पूरबी एशिया से भइल मानल जाला आ ई लोग एही संस्कृति से परभावित लोग हवे। इनाहन लोगन के उत्तरी चीन देस के शिंजियांग वीगर ऑटोनॉमस इलाका के मूल निवासी के रूप में चिन्हित कइल जाला। ई चोग चीन के ऑफिशियल रूप से चीन्हल जाए वाला 55 गो नृजातीय (एथनिक) अल्पसंख्यक समूह सभ में शामिल बा। ई वीगर लोग चीन के सरकार द्वारा इलाकाई अलपसंख्यक आ शिंजियांग प्रांत के नामधारी (मने की बस नाँवे भर खातिर) मूल लोग मानल गइल बाटे।
परंपरागत रूप से ई वीगर लोग चीन के तारिम बेसिन नाँव के प्राकृतिक प्रदेश के तकलामकान रेगिस्तान के छोट-छोट नखलिस्तान सभ में निवास करत रहे। इतिहासी जमाना में ई नखलिस्तान सभ अपने आप में आजाद राज्य के रूप में रहलें आ इनहन पर कई गो सभ्यता सभ के कंट्रोल समय-समय प रहल; एह सभ्यता सभ में चीनी, मंगोल, तिब्बती आ तुर्की सभ्यता आ राजशाही सभ रहल बाड़ीं। 10वीं सदी के आसपास के समय में एह वीगर लोगन के मुसलमानी शुरू भइल आ 16वीं सदी ले आवत-आवत अधिकतर वीगर लोग मुसलमान (इस्लाम धर्म के माने वाला) बन गइल। एकरे बाद के समय में एह लोग के संस्कृति आ पहिचान में इस्लाम के बहुत महत्व के भूमिका रहल बाटे।
अनुमान के हिसाबन, वीगर लोग के 80 % आबादी अभिनो ले तारिम बेसिन के प्राकृतिक इलाका एन रहे ला। शिंजियांग के बाकी वीगर लोग जुंगेरिया के इतिहासी इलाका में के शहर उरुम्ची में रहे ला जे शिंजियांग के राजधानी शहर हवे। एकरे अलावा वाला इलाका देखल जाय तब वीगर लोग के सभसे बड़हन समुदाय उत्तरी-मध्य हुनान के ताओयुआन काउंटी में रहे ला। चीन के अलावा, कई तुर्की देस सभ, जइसे कि कजाकिस्तान, किरगीजिस्तान, उज्बेकिस्तान, आ तुर्की में एह वीगर लोग के महत्वपूर्ण आबादी बा जे लोग अपना मूल इलाका से छितरा के एह जगह सभ पर आ गइल। कुछ छोटहन-छोटहन समुदाय की रूप में ई लोग सऊदी अरब, जार्डन, ऑस्ट्रेलिया, रूस आ स्वीडन नियर देसन में बसल बाटे।
2014 के बाद से चीनी सरकार एह लोग के आबादी पर किसिम-किसिम के अत्याचार आ दुरबेह्वार क रहल बाटे। एह सभ में जबरजस्ती नसबंदी कइल, बेगारी करवावल शामिल बाटे। अध्ययन करे वाला लोगन के अनुमान बाटे की कम से कम दस लाख (एक मिलियन) वीगर लोग के शिंजियांग के इंटर्नमेंट कैंप सभ में बँधुआ बना के 2017 से राखल गइल बा। चीनी सरकार के कहनाम ई रहल बा की ई कैंप सभ चीन के कम्युनिस्ट पार्टी के बिचारधारा से जुड़ाव बनावे खाती, अलगाववाद से बचाव, आतंकवाद से लड़ाई आ वीगर लोगन के रोजगारपरक टरेनिंग देवे खातिर शी जिनपिंग के प्रशासन में बनावल गइल हवें।
विकिमीडिया कॉमंस पर संबंधित मीडिया Uyghur people पर मौजूद बा। |
ई चीन-संबंधी लेख एगो आधार बाटे। जानकारी जोड़ के एकरा के बढ़ावे में विकिपीडिया के मदद करीं। |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.