Торт
From Wikipedia, the free encyclopedia
From Wikipedia, the free encyclopedia
Торт (ад італ.: torta, раней ад лац.: tōrta, круглы хлеб) — дэсерт, разнавіднасць пірага, які складаецца з аднаго або некалькіх каржоў, прамочаных крэмам або джэмам. Зверху торт звычайна ўпрыгожваецца крэмам, глазурай і/або фруктамі.
Існуюць таксама несалодкія разнавіднасці тартоў (напрыклад, пячоначны торт), пры гэтым назва «торт» указвае хутчэй на афармленне стравы: укладванне інгрэдыентаў слаямі з магчымым наступным упрыгожваннем верхняга слоя. У прыкладзе з пячоначным тортам: падсмажаныя ляпёшкі з пячоначнага фаршу з праслойкай з маянэзу, упрыгожаныя зверху зелянінай.
Каржы для большасці тартоў вырабляюцца з бісквітнага або пясочнага цеста, класічныя тарты ўяўляюць сабой камбінацыю з тонкага пясочнага каржа (для болей стабільнае асновы) і аднаго альбо некалькіх бісквітных каржоў. Таксама для тартоў часам выкарыстоўваюць слоенае цеста або вафельныя каржы. Для змазвання каржоў звычайна выкарыстоўваюць павідла, крэм з масла або вяршкоў з цукрам, згушчанае малако. Таксама паміж каржамі можна ўкласці слой фруктаў, ягад, арэхаў, змачыць каржы невялікай колькасцю алкаголю (ром, лікёр). Як у цеста, так і ў крэм можна дадаць розныя смакавыя і араматычныя дабаўкі: парашок какавы, ваніль; харчовыя фарбавальнікі.
Традыцыйна тарты маюць акругленую форму, аднак некаторыя разнавіднасці, а таксама тарты прамысловай вытворчасці, выпякаюцца ў прамавугольных формах. Такія тарты часта разразаюць на кавалачкі і прадаюць у выглядзе пірожных (напрыклад, торт «Напалеон» і аднайменнае пірожнае). У Італіі папулярныя тарты ў выглядзе паўсферы. У апошні час сталі папулярныя незвычайныя формы тартоў, напрыклад, у выглядзе зоркі або сэрца — гэтыя тарты найчасцей робяць да асаблівых выпадкаў.
Выпечкай і афармленнем тартоў займаецца навучаны повар-кандытар.
Для дэкору тартоў звычайна выкарыстоўваюць крэм (галоўным чынам, той жа самы, што выкарыстоўваецца для праслойкі каржоў), выціскаючы яго пры дапамозе кандытарскага шпрыца на верхні слой торта і яго бакавіны. Таксама торт можна пакрыць глазурай альбо ганашам. Шырокае распаўсюджванне атрымала эластычная цукровая масціка маршмелау, якую можна выкарыстоўваць не толькі ў якасці пакрыцця торта, але і для лепкі дэкаратыўных фігурак для ўпрыгожвання кандытарскіх вырабаў. Акрамя гэтага, у якасці ўпрыгожванняў для тартоў выкарыстоўваюць фрукты, ягады, арэхі, фігуркі з марцыпану, шакаладную і какосавую стружку, узбітыя вяршкі.
Торт з’яўляецца традыцыйнай святочнай стравай на вяселлях, днях нараджэння і іншых урачыстых падзеях. Вясельны торт звычайна выконваюць ў некалькі ярусаў і часам упрыгожваюць зверху фігуркамі маладых. На дзень нараджэння імянінны торт могуць упрыгожваць свечкамі ў колькасці, роўнай узросту імянінніка.
Тарты часта выкарыстоўваюць у якасці кідальнай зброі для дэманстрацыі грамадскага недаверу або пагарды да вядомых людзей. Традыцыю кідаць у вядомых асоб тартамі заснаваў бельгіец Наэль Гадэн — лідар руху «Міжнародныя пірожныя брыгады», ад актывістаў якога пацярпелі такія людзі, як Біл Гейтс, Мішэль Камдэсю, Жан-Люк Гадар і іншыя.
Бессэнсоўнае кіданне тартоў дзеля забавы з’яўляецца складовай часткай шэрага кінакамедый.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.