Юзаф Чаховіч (фатограф)

У Вікіпедыі ёсць артыкулы пра іншых людзей з прозвішчам Чаховіч.

Юзаф Чаховіч (польск.: Józef Czechowicz, руск.: Иосиф Юстинович Чехович; 1818, Полацкі павет — 1888, Вільня) — фатограф.

Юзаф Чаховіч
Род дзейнасці	фатограф
Дата нараджэння	2 (14) сакавіка 1818[1]
Месца нараджэння	Полацкі павет, Віцебская губерня, Расійская імперыя
Дата смерці	1 (13) студзеня 1888[1] (69 гадоў)
Месца смерці	Вільня, Віленскі павет, Віленская губерня, Расійская імперыя
Месца пахавання	Бернардзінскія могілкі
Грамадзянства	Расійская імперыя
Альма-матар	Віцебская гімназія
Медыяфайлы на Вікісховішчы

Біяграфія

Паходзіў са шляхецкага роду Чаховічаў. Сын Юстына. У 1830—1838 гадах вучыўся ў Віцебскай гімназіі разам са сваім братам Аляксандрам. Працаваў фінансавым інспектарам ва ўстановах Ваеннага міністэрства Расійскай імперыі. У 1848 годзе працаваў бухгалтарам ваеннага шпіталя ў Асаўцы.

Зацікавіўся фатаграфіяй, у 1853 годзе ў Любліне дзейнічала яго фотастудыя. З пачаткам Крымскай вайны вярнуўся на ваенную службу як інспектар паставак для расійскай арміі ў Чарнігаўскай губерні. У 1856 годзе вывучаў фатаграфію ў Парыжы. Вярнуўшыся з-за мяжы, фатаграфаваў у Варшаве, Кіеве і Чарнігаве, у 1861 годзе здымкі планавала апублікаваць выданне «Светописная Русь».^[2]

У 1863—1865 гадах трымаў фотаатэлье ў Віцебску. У 1865 годзе перабраўся ў Вільню. Неўзабаве атрымаў абавязковы дазвол генерал-губернатара фатаграфаваць Вільню і ўвесь Паўночна-Заходні край. У 1866 годзе наведаў Лондан, каб пазнаёміцца з развіццём фатаграфіі. Па вяртанні адкрыў у Вільні фотаатэлье, якое дзейнічала да 1888 года (з перапынкам у 1874—1876 гадах). З 1869 года актыўна здымаў Вільню і ваколіцы. У 1876—1885 гадах — сябра Французскага таварыства фатаграфіі.^[2]

У 1876—1888 гадах фотаатэлье Юзафа Чаховіча было на вул. Батанічнай ва ўласным доме (каля ўваходу у Батанічны сад). Юзаф Чаховіч быў вядомы як выдатны партрэтыст, але яго цікавілі вуліцы і плошчы Вільні і яе ваколіцы. Першым пачаў фатаграфаваць інтэр’еры касцёлаў і палацаў^[2], з чаго пачалося дакументаванне архітэктуры Вільні.

Магіла Юзафа Чаховіча.

Пахаваны на Бернардзінскіх могілках у Вільні.

Юзаф Чаховіч, віленчук, шляхціч, быў адным з першых фатографаў у Вільні, і, здаецца бясспрэчным — першым фатографам-пейзажыстам у Польшчы, які займаўся гэтым маладым мастацтвам з замілаваннем і з пачуццём. (Ян Булгак)^[3].

Зноскі

1. LIMIS

   <a href='https://wikidata.org/wiki/Track:Q101343826'></a>
2. Dainius Junevičius. Juozapo Čechavičiaus Vilnius…
3. Bułhak Jan. O pierwszych fotografach wileńskich z XIX wieku // Fotograf Polski. 1939. No. 3.(недаступная спасылка)

Літаратура

• Dainius Junevičius. Juozapo Čechavičiaus Vilnius. Parodos vadovas. — Vilnius: Lietuvos dailės muziejus, 2015.

Спасылкі

• Андранік Антанян. Вільня Язэпа Чаховіча(нявызн.). Patagrafija (19 студзеня 2016). Праверана 17 студзеня 2024.