Вадзім Анатолевіч Дзевятоўскі

Вадзі́м Анато́левіч Дзевято́ўскі (20 сакавіка 1977, Наваполацк, Віцебская вобласць) — беларускі лёгкаатлет (кіданне молата), палітык. Майстар спорту Беларусі міжнароднага класа (1998). Дэпутат Палаты прадстаўнікоў Нацыянальнага сходу Рэспублікі Беларусь V і VI скліканняў.

Вадзім Анатольевіч Дзевятоўскі
Дэпутат Палаты прадстаўнікоў Нацыянальнага сходу Рэспублікі Беларусь V склікання 18 кастрычніка 2012 — 2016
Прэзідэнт	Аляксандр Лукашэнка
Кіраўнік урада	Міхаіл Мясніковіч Андрэй Кабякоў
Дэпутат Палаты прадстаўнікоў Нацыянальнага сходу Рэспублікі Беларусь VI склікання з 11 кастрычніка 2016
Прэзідэнт	Аляксандр Лукашэнка
Кіраўнік урада	Андрэй Кабякоў
Нараджэнне	20 сакавіка 1977(1977-03-20) (47 гадоў) г. Наваполацк, Віцебская вобласць
Член у	Беларуская партыя «Белая Русь» Беларуская федэрацыя лёгкай атлетыкі
Адукацыя	Полацкі дзяржаўны ўніверсітэт імя Ефрасінні Полацкай
Узнагароды	Медаль «За працоўныя заслугі»
Медыяфайлы на Вікісховішчы

Алімпійскія ўзнагароды
Лёгкая атлетыка (мужчыны)
Срэбра	Пекін 2008	Кіданне молата

Спартыўныя ўзнагароды
Чэмпіянаты свету
Золата	Хельсінкі 2005	Кіданне молата
Чэмпіянаты Еўропы
Бронза	Гётэбарг 2006	Кіданне молата

У Вікіпедыі ёсць артыкулы пра іншых асоб з прозвішчам Дзевятоўскі.

Біяграфія

Нарадзіўся 20 сакавіка 1977 года ў г. Наваполацку Віцебскай вобласці.

Скончыў юрыдычны факультэт Полацкага дзяржаўнага ўніверсітэта.

Лёгкай атлетыкай пачаў займацца з сямі гадоў. Заслужаны майстр спорту Рэспублікі Беларусь па лёгкай атлетыцы, прызёр Алімпійскіх гульняў.

Працаваў інструктарам па спорце ў вайсковай часці Міністэрства ўнутраных спраў Рэспублікі Беларусь. З 2009 года — старшыня Наваполацкай гарадской арганізацыі РГА «Белая Русь» (на грамадскіх пачатках).

Быў дэпутатам Наваполацкага гарадскога Савета дэпутатаў дваццаць чацвёртага і дваццаць пятага скліканняў. Быў дэлегатам другога, трэцяга і чацвёртага Усебеларускіх народных сходаў.

У 2012—2016 гадах дэпутат Палаты прадстаўнікоў Нацыянальнага сходу Рэспублікі Беларусь V склікання.

Член Рэспубліканскага Савета РГА «Белая Русь».^[1]

З 2016 года дэпутат Палаты прадстаўнікоў Нацыянальнага сходу Рэспублікі Беларусь VI склікання, намеснік старшыні Пастаяннай камісіі па ахове здароўя, фізічнай культуры, сямейнай і маладзёжнай палітыцы.

25 верасня 2014 года абраны старшынёй Беларускай федэрацыі лёгкай атлетыкі, 28 верасня 2018 года пераабраны на новы тэрмін. 24 верасня 2020 года пакінуў пасаду.

Як паведаміла выданне Tribuna.com, братоў Алега і Вадзіма Дзевятоўскіх беспадстаўна затрымалі ў жніўні 2020 года ў кавярні ў цэнтры Мінска і адвезлі на Акрэсціна, дзе працягнулі здзекі^[2]. Пасля адзін з братоў-спартоўцаў парэзаў сабе вены, а другі публічна адрокся ад А. Лукашэнкі^[3].

Спартыўная кар’ера

Сярэбраны прызёр чэмпіяната свету сярод юніёраў да 20 гадоў (1996 г., Сідней, Аўстралія). Сярэбраны прызёр міжнароднага турніра (2000 г.). Напярэдадні Летніх Алімпійскіх гульняў 2000 ў Сіднеі В. Дзевятоўскі быў дыскваліфікаваны на 2 гады за ўжыванне нандролона.

Займаў 4-е месца на XVIII Алімпійскіх гульнях (2004 г., Афіны), 7-е месца на IX чэмпіянаце свету (2003 г., Парыж).

На Летніх Алімпійскіх гульнях у Пекіне (2008) Вадзім Дзевятоўскі паказаў другі вынік і быў узнагароджаны сярэбраным медалём. Аднак допінг-пробы В. Дзевятоўскага і бронзавага прызёра спаборніцтваў Івана Ціхана, якія яны здалі 17 жніўня адразу пасля алімпійскага фіналу, далі станоўчы вынік на тэстастэрон. Ціхан і Дзевятоўскі за прымяненне допінгу былі дыскваліфікаваны, а заваяваныя імі медалі перададзены іншым спартсменам. Гэта рашэнне было аб’яўлена 11 снежня, пасля пасяджэння выканкама Міжнароднага алімпійскага камітэта. Ва ўжавнні допінгу Вадзім Дзевятоўскі быў абвінавачыны ў другі раз, і гэта рабіла немагчымым яго далейшы ўдзел у Алімпіядах. Аднак 10 чэрвеня 2010 Спартыўны арбітражны суд (САS) вынес рашэнне аб тым, што допінг-пробы І. Ціхана і В. Дзевятоўскага былі ўзяты з парушэннем правілаў. Такім чынам, спартсменам вернуты тытулы прызёраў Алімпіяды-2008.

Трэнеры: А. Дупін, П. Зайцаў.

Узнагароды

Узнагароджаны медалём «За працоўныя заслугі», юбілейнымі медалямі, медалём Міжпарламенцкай Асамблеі дзяржаў — удзельніц Садружнасці Незалежных Дзяржаў «За ўмацаванне парламенцкага супрацоўніцтва», ганаровымі граматамі Нацыянальнага сходу Рэспублікі Беларусь, Савета Міністраў Рэспублікі Беларусь, Савета Міжпарламенцкай Асамблеі дзяржаў — удзельніц Садружнасці Незалежных Дзяржаў, Міністэрства спорту і турызму Рэспублікі Беларусь. Удастоены званняў «Ганаровы жыхар Наваполацка», «Чалавек года Віцебшчыны — 2009».

Сям'я

Брат вадналыжніка Алега Дзевятоўскага (нар. 1973), заслужанага майстра спорту Рэспублікі Беларусь.

Жанаты, мае сына Льва.

Зноскі

1. http://www.belayarus.by/today/organ/
2. Tribuna.com (нявызн.)(недаступная спасылка). Архівавана з першакрыніцы 24 чэрвеня 2021. Праверана 22 чэрвеня 2021.
3. Радыё Свабода Архівавана 24 чэрвеня 2021.

Спасылкі

• Дасье на сайце Палаты прадстаўнікоў Нацыянальнага сходу Рэспублікі Беларусь (бел.)
• Старонка аб Дзевятоўскім на афіцыйным сайце Летніх Алімпійскіх гульняў 2008 у Пекіне
• Вадзім Дзевятоўскі — профіль на сайце IAAF (англ.)
• Інтэрв’ю газеце «Беларусь Сёння» Архівавана 27 верасня 2007.
• Інтэрв’ю газеце «Спартыўная панарама» Архівавана 14 сакавіка 2007.