Альпійская балада (фільм)

«Альпі́йская бала́да» — чорна-белы шырокаэкранны мастацкі фільм, пастаўлены на кінастудыі «Беларусьфільм» у 1965 годзе рэжысёрам Барысам Сцяпанавым па аднайменнай аповесці Васіля Быкава.

Альпійская балада
Жанр	драматычны фільм
Рэжысёр	Барыс Міхайлавіч Сцяпанаў
Сцэнарыст	Васіль Быкаў
У галоўных ролях	Любоў Рыгораўна Румянцава Станіслаў Андрэевіч Любшын
Аператар	Анатоль Дзмітравіч Забалоцкі
Кінакампанія	Беларусьфільм
Працягласць	86 хв.
Краіна	СССР
Мова	руская
Год	1965
IMDb	ID 0139829

Сюжэт

Падчас Другой сусветнай вайны ў Альпах з двух лагераў для ваеннапалонных і палітвязняў здзяйсняюць ўцёкі савецкі салдат Іван і італьянская дзяўчына Джулія. Іх сустрэча выпадковая і нечаканая. Іван спрабуе пазбавіцца ад яе, але дзяўчына ідзе за ім. Яны праводзяць у Альпах некалькі дзён і начэй, але немцы наганяюць уцекачоў.

Ім трэба будзе перажыць самыя неверагодныя прыгоды ў сваім жыцці. Галодныя, змучаныя, напалоханыя і разгубленыя, яны будуць блукаць у самых прыгожых гарах Еўропы, з цяжкасцю ўсведамляючы, што горы яшчэ могуць быць прыгожымі, а мужчына і жанчына здольныя думаць не толькі пра вайну і небяспеку.

«Альпійская балада» — гэта аповяд пра тры дні жыцця ўцекачоў з палону беларуса Івана і італьянкі Джуліі. Гэта гісторыя пра тры кароткія дні, якія падарылі былым вязням канцлагера бязмежную любоў і надзею на выратаванне.

У галоўных ролях

• Любоў Румянцава — Джулія Навелі
• Станіслаў Любшын — Іван

Прызы і ўзнагароды

• 1966 — Саюз кінематаграфістаў СССР: Дыпломы актрысе (Любоў Румянцава), аператару (Анатоль Забалоцкі)
• 1966 — КФ рэспублік Прыбалтыкі, Беларусі і Малдовы ў Вільні: Прыз «За лепшае выкананне жаночай ролі»
• 1968 — МКФ у Дэлі (Індыя): Прыз за лепшы фільм

Літаратура

• Игорь Авдеев, Лариса Зайцева Все белорусские фильмы : каталог-справочник. Игровое кино (1926—1970). — Минск: Беларуская навука, 2001. — Т. 1. — 240 с. — ISBN 985-08-0023-2