Гіпэрдактылічная рыфма

Гіпэрдактылі́чная ры́фма — такі від рыфмы, калі націск у сугучных словах падае далей чым на трэці склад ад канца. У беларускай паэзіі сустракаецца вельмі рэдка і толькі на чацьвёртым ад канца складзе. Вось прыклад гіпэрдактылічнай рыфмы з народнай песьні:

Ты бярозка не цярэ́бленая,

Твае сучайкі сярэ́браныя,

Маковачка пазало́чывана,

Чорным шоўкам перастро́чывана.

У сучаснай паэзіі гіпэрдактылічная рыфма ўжываецца ў спалучэньні з мужчынскай і жаночай рыфмамі ў вершах розных жанраў. Вялікі мастацкі эфэкт дасягаецца раптоўным зьяўленьнем рэдкай гіпэрдактылічнай рыфмы на фоне іншых, больш прывычных, рыфмаў.

Літаратура

• Рагойша В. П. Паэтычны слоўнік. — 3-е выд., дапрац. і дапоўн. — Менск: Беларуская навука, 2004. — 576 с. — 2000 ас. — ISBN 985-08-0598-6
• Рагойша В. П. Тэорыя літаратуры ў тэрмінах. — Менск: Беларуская энцыклапедыя, 2001. — 384 с. — 1000 ас. — ISBN 985-11-0197-4