![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/3/31/Grunewald_-_christ.jpg/640px-Grunewald_-_christ.jpg&w=640&q=50)
Kamahalan
From Wikipedia, the free encyclopedia
An Kamahalan o Semana Santa (Latin: Hebdomas Sancta or Hebdomas Maior, "Greater Week"; Greyigo: Ἁγία καὶ Μεγάλη Ἑβδομάς, Hagia kai Megale Hebdomas) iyo an taontaon na pagroromdom kan mga Kristyano kan pagsakit, pagkagadan asin pagkabuhay-liwat ni Hesukristo Nasareno. Minapoon ini nin Domingo de Ramos asin natapos sa Domingong Pasko nin Pagkabuhay-liwat.
![Thumb image](http://upload.wikimedia.org/wikipedia/commons/thumb/3/31/Grunewald_-_christ.jpg/640px-Grunewald_-_christ.jpg)
![Thumb image](http://upload.wikimedia.org/wikipedia/commons/thumb/2/27/Quito_Proc_del_Jesus_del_Gran_Poder_2010_a.jpg/640px-Quito_Proc_del_Jesus_del_Gran_Poder_2010_a.jpg)
![Thumb image](http://upload.wikimedia.org/wikipedia/commons/thumb/5/59/Senakulo_Semana_Santa_Magarao.jpg/320px-Senakulo_Semana_Santa_Magarao.jpg)
![Thumb image](http://upload.wikimedia.org/wikipedia/commons/thumb/3/32/SemanaSanta_sa_Naga_2010.jpg/320px-SemanaSanta_sa_Naga_2010.jpg)
Sa semanang ini sinusunod an paglelehe, an pag-abstenensya asin an hararom na pagpapangadyì, pagsosolsol kan mga Kristyano sa saindang mga pagkakasalà. Kinaugalian kan mga Katoliko na magtiripon sa simbahan, magkumpisal asin mag-Via Crucis, o mag-Bisita Altares. Digdi sa Filipinas uso, alagad pawara na, an gawì na magpa-Pasyon na iyo ini an sarong semana na ikinakanta na pano nin paglogologo an istorya kan enterong buhay ni Hesus. Pag-Biyernes Santo may nagkukulto arog kan pagpàsan nin krus o minapapako na tunay sa krus sa makuring pakikidumamay sa inagihan na sakit ni Hesukristo asin sa paghagad nin kapatawaran sa mga kasàlan. Sa ibang mga banwaan ginigibo an Senakulo, sarong pagsa-drama kan pagpasakit ki Hesus kun saen an sarong deboto napagakot sa itinindog na krus. Sa aldaw man na ini, gawì na gayo sa Filipinas, urog na kan mga Katoliko, na iprusisyon an mga rebultong nagpapahiling kan agi-agi ni Hesus sa huring aldaw kan siya pinasakitan asta pinako sa krus. Pagkabanggi isinusunod an inaapod na Soledad sa palibot kan sentro kun sain sa mga estasyon may pagpangadyì, may pagkantang maludok asin mapùngaw sa pagladawan kan paglogologo ni Santa Maria sa pagkawara kan saiyang Aki na si Hesus.