From Wikipedia, the free encyclopedia
Si Julián Reyes Felipe (Enero 28, 1861 – Oktobre 2, 1944), iyo an kag-tokda kan musika kan awit nasyunal nin Filipinas na dati bisto sa pangaran na "Marcha Nacional Magdalo", ngonyan pigngaranan nang "Lupang Hinirang".[1]
Si Julián Felipe namundag sa siyudad nin Cavite, Cavite. Nag'adal siyang elementarya sa Cavite asin Binondo, Manila. Sa hubin pang marhay na edad pinahiling na niya an talento sa musika asin nakanood tolos magkawat sa piyano asin organo, mala ta ngapit nagin na siyang organista sa simbahan kan paroko ni San Pedro kun saen orog na natais niya an saiyang abilidad sa pagtogtog. Dai naghaloy, nagtotokda na siyang mga kanta.
Sa mga komposisyon niya, nababantog an Moteti el Santesisimo, Sintos y Floras Rogodones, Amorita Danza, asin Reina de Cavite (sa pag'onra ki Nuestra Señora de la Soledad de Porta Vaga). Igdi niya pinamalas an saiyang kahusayan sa musika na omaw na gayo kan mga nagmamasid.
Kan matogdas an enot na Republika kan Filipinas, si Emilio Aguinaldo pignombrahan siyang Direktor kan Banda Nasyunal. Siya nagin man kaapil sa Katipunan na siring sa mga kapwa Kabiteno naglaban kontra sa mga Espanyol. Naaresto siya kan mga Kastila asin nakonkon sa Fort San Felipe sa Cavite alagad kan siya pinaluwas nagbali giraray siya sa mga tropang rebolusyonaryo.[2] Dagos siyang nagtokda nin mga kantang pamukaw sa patriotismo kan mga Filipino.
Inulayan siya ni Aguinaldo na maggibo nin komposisyon na angay sa pagproklama kan katalingkasan nin Filipinas duman sa Kawit, Cavite. An saiyang tinokda, an 'Marcha Nacional Filipina' pigtogtog kan Hunyo 12, 1898 sa proklamasyon kan Katalingkasan duman sa Kawit, Cavite asin an awit na ini iyo na an inako na awit nasyunal kan Filipinas kan Septyembre 5, 1938.
Si Felipe asin an agom niyang si Irene Tapia nagkaigwang apat na aking babae asin sarong aking lalake. Nagadan siya sa Manila sa edad na 83.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
