Pflegekompetenzzentrum Wepperschduaf

Es Pflegekompetenzzentrum vu Wepperschduaf (dt. Pflegekompetenzzentrum Weppersdorf) is a Pflegeeirichtung vom Samariterbund in Wepperschduaf im Burgnlaund. De Leit, de wo do drin wohna, wean rund um de Uah betreit. De Baundbroadn reicht vom betreitn Wohna bis zua Laungzeitpfleg.

Braundschutzplan vom Pflegekompetenzzentrum Wepperschduaf (Erdgeschoß)

Es liegt an da Hauptstrossn, gegenüwa vom Gradwohl, wo aa a Bushoitestöö is. Des Heim is ois oageschoßiga Flochbau mit an Untagschoß ausgfiaht, des vom Architektnbüro Taschner-Kinger aus Buinduaf plaunt und aum 21. September 2008 eaeffnat wuan is.

Waunst eine kummst, kannst rechts oda links gehn, des is wuascht, de Weg fian wieda zamm im großn Speisesoi. Dazwischn liegt da Schwestanstitzpunkt, da Haislaunlogn, Pfegemittlloga, Fäkalraum unds Pflegebod. Glei rechts neman Eigaung is de Kaunzlei, wo de beidn Damen vo da Vawoitung oawadn; glei links davau is da Peasonäuraum mit ana Teekuchl. Im rechtn Täu is a Meahzweckraum untabrocht, dea ois Bastlraum, Weakstott, Konferenzraum und fia Vaaunstoitungan gnutzt wean kau. Dane'm is' Büro vo da Wohnbereichsleitarin Doris Kremsner situiat, wo ursprüngli a Therapieraum vuagsehn woa. Auf da hintan Seitn vom Speisesoi do is de Kuchl, do oawadn de drei Damen vom Service. Dahinta und danebm san de 23 Zimma vo de Bewohna (17 Oanzlzimma und 6 Dopplzimma). An Lift sowia a Stiagn gibt's aa, da kummst in Kölla owe, duat is de Rettung untn. Weitas san fünf Betreie Wohnungan, Köllaobtäu zua de Wohnungan, Haustechnikraime, Lebnsmittl- und Pallettnloga, Peasonäugardarobm, Wosch- und Büglraime sowia da Wäschacontainaraum im Untagschoß untabrocht.

Des Peasonäu setzt se zaum aus da Wohnbereichsleitarin, den Schwestan (DGKS und Pflegehööfa), Servicekräftn, de fia'd Wäsch und fia'd Kuchl zuaständig san, da Animateurin, de wos mit de Bewohna bastln und so weida duad, an Haustechnika, Zivüüdienan und den Vawoitungsmitoawadan. Es wean via Moihzeitn aum Tog seaviat, davau wiads Mittogessn aus Lacknboch augliefat. De Reinigung is aun de Firma ISS vage'm.

Im Netz

• Auf da Seitn vom Samaritabund