Noadboarisch

Noadboarisch (dt.: Nordbairisch) is oane vo de drei Haptgruppm (Nordboarisch, Mittlboarisch, Siidboarisch), in dej wou de boarische Sprouch sprouchwissnschaftle atolt wead.

Der Artikl is im Dialekt westlichs Noadboarisch gschriem worn.

Wou mas redt

Da Noadboarische Sprouchraum

Nordboarisch wead haintzatoch gredt in grejsstn Tol vo da Obapfålz (in Sidostn wead Noadmiddlboarisch gredt), in sidestlinga Eck vo Middlfrånkn, in middlestlinga Eck vo Owerfrånkn (Sechsämtaland), in Owerbayern neadli vo da Doana und in Sidvogtlånd (Bundeslond Såchsn). Gschichtle gseang wor es noadboarische Sprouchgebejt grejsser wej haintzatoch, ower iwer d Joarhundert is es Frenkische (sprouchwissnschoftle gnauer: es Owerostfrenkische) nouch Sidn und Westn gwondert und es Middlboarische nouch Noadn. Und aa in Echerlånd is frejers Noadboarisch gredt worn.

Nu in Mittlålter wor Nirmberch a noadboarische (sprouchwissnschoftle gmoant) Stod und hout an groussn Ainfluss af's Umlond ghott und es Noadboarische gfesticht gecha Ainfliss as'n Ostfrenkischn und n Middldeitschn. In da Neizait ower is Middlfrankn mit Nirmberch sölwer a ostfrenkischs Sprouchgebejt worn und es Noadboarische is durt vadrengt worn (asgnumma in sidestlinga Eck), es homse owa etle nordboarische Aignhaitn in de frenkischn Dialekte in estlinga Middlfrankn daholtn. Des daklert aa, warum dass Sprouchkartn (bsunders öltere) des Gebejt nu ols boarischsprouchich oda frenkisch-boarisch gmischt dorstölln.

In middlan Bayern is es Noadboarische vo Middlboarischn asn neadlinga Obabayern, asn neadlinga Niderbayern und as da sidlinga und sidestlinga Owerpfolz verdrengt worn. Ower aa in deane Gechadn zoingse nu mejer oder wenger noadboarische Ainfliss (noadmiddlboarische Mischdialekte). Rengschburch is zwor d Haptstod vo da Owerpfolz, ower dej Stod is seit jeher a middlboarische Sprouchinsl. Dou gült fia Sprouchkartn es gleiche wej grod gschrim, ner holt mittlboarisch-nordboarisch gmischt.

Innere Unterschid

De noadboarischn Dialekte unterschainse tolwais stork vonaranond, in westlinga Eck vo da Owerpfolz baispülswais hout bol a jeder Ort sein ainga Dialekt, walse durt nordboarische (Grundlouch), ostfrenkische (von Noadn und Westn her) und middlboarische Merkmol (von Sidn her) zoing. Waiters han vül noadboarische Dialekte vaglicha min modernern Middlboarischn in sidlinga Bayern (bsunders Minga und Umgebung) urspringlicher und da Dialekt holtse nu (bsunders am Lond) stirker, und da noadboarische Sprouchraum is aa haintzadoch nuniat su dicht bsidlt - und wors frejers eascht recht niat. Dou genga nou aa wenger Unterschid valorn.

A grejssers sprouchlichs Zentrum gits niat (wej Minga fias Westmiddlboarische und Wean fias Ostmiddlboarische), wals koa oanziche Groußstod git, wou noadboarisch gredt wead.

Lautliche Bsunderhaitn

Vaglicha min Middlboarischn waiter in Sidn (in de Baispül untn: Noadboarisch <--> Middlboarisch) han de wichtinga lautlinga Bsunderhaitn:

• es middl- und neihouchdeitsche a wead in Nodboarischn deitlich vadunkelt (d Sprouchwissenschoftler hoissn des: gleichzaitiche Verdumpfung und Hebung), und des hejert se oft enlich o wej a offas o (Wasser = Wåsser/Wòsser, Wagen = Wòòng/Woong, Wald = Wòòld/Woold, warm = wòam). Dej Vadunklung kummt in olle boarischn Dialekte fia, dej is ower in Noadboarischn stirker aspregt wej ba de middlboarischn Dialekte, dej wouse in Sidwestn oschlejssn.
• de middlhouchdeitschn Diphthonge uo, üe und ië hom se ondeascht entwicklt, nemle zeascht zo Monophthonge (u, î), nou wider zo Diphthonge (ou, ej), derawal han d Diphthonge in Middl- und in Sidboarischn blim: Kou <--> Kua, Kej <--> Kia, Brejf <--> Briaf
• de middlhouchdeitschn Longvokale â, o, ê und œ han olle diphtongiert worn: Schòuf <--> Schòòf, ròut/rout <--> rot/rout, Schnèj <--> Schnèè, bèjs <--> bèès
• dej Diphthonge büldn in de nerdlichern und de westlichern noadboarischn Dialekte zomma min vokalisiertn r nou Triphthonge, baispülswais in Jòua, Òua, Schnoua, umkèjan, Beja, des entspricht en sidlichern und middlboarischn Jòòa/Jåår, Ooa, Schnuua, umkeean, Biia
• es mittl- und sidboarische oa (middlhouchdeitsch ei) is in Noadboarischn je nouch Dialekt und Lautumgebung a oa, oi oder åå (es letzte ner in Noadn zon Ostfrenkischn hi): broat/broit/brååt <--> broat, Loitern <--> Loatern
• d Diphthongierungen in Noadostn von Sprouchgebejt: Fruasch <--> Froosch, Vuagl <--> Voogl, Viagl <--> Veegl
• d Hebung vo de Vokale wej in Ostfrenkischn on de Schnittstölln vo Frånkn und Åltbayern (in Westn und Noadwestn von noadboarischn Sprouchraum): Fruusch <--> Froosch, Vuugl <--> Voogl, Viigl <--> Veegl
• es L nouch an Vokal wead ondeascht ols wej in Middlboarischn (und enlich wej in frenkische Nochbar-Dialekte) niat oder niat gonz zo an Vokal, sundern blaibt ols a Holbkonsonant/Holbvokal erholtn. A Tol vo de Vokale vaendertse durch des (bsunders e und i). Baispülswais Wòld <--> Wòid, Göld <--> Gèid/Gööd, vül/vul <--> vui/vèi/vüü, Hulz/Holz <--> Hoiz
• es tolwais afgwoichte (spirantisierte) g wej in Weech, Vuuchal, moocher, a wichticher Brejf. Ower: weg, Vuugl, gsågt, an wichtinga Brejf. Dej Spirantisierung gejt iwers Ostfrenkische af an middldeitschn Ainfluss zruck, dej zoigtse ower niat su stork wej in de frenkischn und de middldeitschn Dialekte. In Ostfrenkischn waiter in Noadn und Westn sogt'ma aa wech, Vuuchl, gsåcht.
• Verbn mit Doppelvokale endn in Noadboarischn af -a: 'schaua <--> 'schaung, baua <--> baun, 'schneia <--> 'schneim, gfraia <--> gfrain
• D Endung -en vor k, ch und f is in de nerdlichern nordboarischn Dialekte a Konsonant blim, baispülswais hockn, 'stechn, hoffm, Soifm. In de sidlichern noadboarischn Dialekte iss wej in de middlboarischn waiter in Sidn zo an -a worn, olso hocka, 'stecha, hoffa, Soifa/Soafa.
• d Form niat fia net. Dej Form waist aa af d Vokalisierung von ch zo a bsunders vor t und 's hi, wejs in an Tol noadboarische Dialekte fiakummt (haintzatoch wenger), baispülswais reat <--> recht, 'sia/siast/siat <--> 'siich/sichst/sicht, Noat <--> Nocht, Floas <--> Flåchs.
• d Vakleanerungs- und d Buzalforma endn in da Mejerzol zmejeascht af -(a)la, in da Oazol zmejeascht af -(a)l, baispülswais oa Moidl, zwoa Moidla. Waiters Moidal(a), Bejwal(a), Vuuchal(a) vo Moidl, Bou, Vuugl.

Bsunderhaitn ban Wortschoz

Wos "tippisch noadboarisch" is, is schwar zon song. Easchtns, wal de ondern boarischn oder oweadeitschn Dialektgruppm de meastn Werter aa hom. Und zwoatns, wal de noadboarischn Dialekte zommagnumma kam an Wortschoz hom, dean wous mitanond toln, ower niat mit ondere boarische, owerostfrenkische und waitere Dialekte. Ma ko koane ollgmoana Grenzn zejng, wou'ma song kannt "douda is da Wortschoz noadboarisch, dou is'a middlboarisch, und durn is'a owerostfrenkisch". Des entscheidtse oft Wort fia Wort. A grobe Faustregl fian noadboarischn Sprouchraum is, olso wou'ma ejer gleiche Werter hejern ko (ba de Baispül gejts wenger um de oanzlna gnaua Lautforma, sundern mejer um d Werter on sich):

• Westn <--> Ostowerfrenkisch
  Erdbirn stot Erdåpfl/Erdöpfl. Zwiggerl stot Klubbal. Schlòut stot Kamin. Hètscher stot Schnàggler. Kloider stot Gwånd. Gàl stot Ross.
• Nordosten <--> Ostowerfrenkisch, niat-oweadeitsche Dialekte
  Pfà (= Pferd) stot Ross. Duapf (= Topf) stot Hofa/Hofm.
• Sidostn <--> Waldlerisch-Middlboarisch
  Schòrrinna stot Dochrinna. Kintl/Raufång stot Schlòut/Kamin.

Baispül fia kloaregionole Variantn han Ruutschan und Ruutschagàl stot Hetschan und Hetschagàl (= Kinderschaukel und Schaukelpferd) oder Schluuder/Schlooder stot Dopfa/Dopfm/Dopfkàs (= Topfen/Quark) in da westlichstn Owerpfolz.

Vaglicha min de Sprouchraim rundumadum, han tippische Werter (wortschoz-, grammatik-, und formamasse) iwern noadboarischn Kern-Sprouchraum baispülswais:

• d Wesch flòdern stot (nord)middlboarisch ... schwoam/'schwoim, owerostfrenkisch ... flaia/flana.
• enk/enks, deeds/diids/diats, èds stot (noad)mittlboarisch ees und owerostfrenkisch ihr.
• iwa/iwara, iwe/iware stott (nord)middlboarisch uma, ume, und owerostfrenkisch riwa, niwa.
• Moidl stot (noad)middlboarisch Deandl/Diandl, und owerostfrenkisch Maadla.

Da rain noadboarische Sprouchraum (one de Iwergongsdialekte) is zwor da kleanste vo de drei boarischn Haptgruppm, dou gits ower a grousse Vülfolt on vaschine Werter und Wortforma:

• immer: immer, ummer; ollawal, owl; owa; ollamol.
• ihr: enk, enks; èds; deeds, diids, diats; ees.
• Stein – Steine: Stoa – Stoana/Steana, Stoi – Stoina, Stoo – Stoona
• Vogel – Vögel: Vogl – Vegl, Vugl – Vigl, Vuagl – Viagl

Wej in de ondern boarischn Dialekte wern ower immer mejerer olte Dialektwerter durch standarddeitsche und iwerregionole dasetzt:

• ihr stot enk usw., aich stot enk, aier stot enker.
• dånn stot nòu, und in Noadostn åffa
• månchsmòl stot ejamòl
• Dejnsda stot Irda, Erchda
• Fåsching stot Foosnat und enliche Forma
• vorigs Jòua stot fern(d), ferd(n)

D Grammatik

De noadboarische Grammatik waicht niat stork vo da boarischn o. Gnauers und mejerer findts in Artikl iwer de Boarische Grammatik.

Schau ar af

• Boarische Dialekte im Vagleich
• Boarische Sprouch
• Wikipedia:Boarische Umschrift
• Boarische Grammatik
• Bsunderhaitn im boarischn Vokabular

Quölln, Literatua und Im Netz

• Ludwig Zehetner: Bairisches Deutsch, Heinrich Hugendubel Verlag/edition vulpes, Kreuzlingen/Minga/Regensburg, 2005, ISBN 3-9807028-7-1
• Manfred Renn, Werner König: Kleiner Bayerischer Sprachatlas, Deutscher Taschenbuch Verlag, Minga, 2006, ISBN 3-423-03328-2
• Ludwig Zehetner: Das bairische Dialektbuch, Verlag C.H.Beck, Minga, 1985, ISBN 3-406-30562-8
• Eberhard Wagner: Das fränkische Dialektbuch. Verlag C. H. Beck, Minga 1987, ISBN 3-406-31800-2.
• Werner König: dtv-Atlas deutsche Sprache. Deutscher Taschenbuch Verlag, Minga, 2004, ISBN 3-423-03025-9
• Redader Sprouchatlas vo Bayern (Dialektkattn asn Bouch Kleiner Bayerischer Sprachatlas, und Tonafnouma)
• DiWa Digitaler Wenker-Atlas (Dialektkattn und mejerer) - d Kartn Nordbairischer Sprachatlas von Menüpunkt DiWA --> Karten, nou Auswahl (a technischer Hinwais: wölts zeascht erweiterte Ausgabe, nou in Menüpunkt DiWA --> Installation/Einstellungen unter ECS-Darstellung es Aswolknepfal HTML, des hengt niat vo Plugins und Java o)