Azərbaycan SSR əməkdar həkimi

Azərbaycan SSR əməkdar həkimi (azərb-kiril. Азәрбајҹан ССР әмәкдар һәкими) — Azərbaycan SSR-də xalq səhiyyəsi sahəsində fərqlənmiş həkimlərə verilən fəxri ad.

Azərbaycan SSR əməkdar həkimi
Азәрбајҹан ССР әмәкдар һәкими
Ölkə	Azərbaycan SSR
Tip	fəxri ad
Status	verilmir
Statistika
Təsis tarixi	28 fevral 1940
Ləğv tarixi	5 fevral 1991
İlk təltif	23 aprel 1940
Son təltif	4 fevral 1991
Ardıcıllıq
Yüksək mükafat	SSRİ xalq həkimi
Müvafiqdir	Azərbaycan Respublikasının əməkdar həkimi

Tarixi və əsasnaməsi

"Azərbaycan SSR əməkdar həkimi" fəxri adı 28 fevral 1940-cı ildə təsis olunmuşdur.^[1]

Fəxri adla klinikalarda, xəstəxanalarda, hospitallarda, poliklinikalarda, ambulatoriyalarda, dispanserlərdə, həkim məntəqələrində, doğum evlərində, habelə başqa müalicə-profilaktika və sanitariya idarələrində 15 il (ilk əsasnamədə 10 il^[2]) işləmiş və fəaliyyəti zamanı fərqlənmiş, xalq səhiyyəsi və əhaliyə tibb xidməti sahəsində xüsusi xidmətlər göstərmiş bütün ixtisaslardan olan həkimlərə verilirdi.^[3]

Fəxri ad Azərbaycan SSR Ali Soveti Rəyasət Heyəti (Azərbaycan SSR Baş Soveti) tərəfindən verilirdi və onu almış şəxslər Azərbaycan SSR Ali Soveti Rəyasət Heyətinin fəxri fərmanı (Azərbaycan SSR Baş Soveti Prezidiumunun Fəxri Fərmanı) ilə təltif olunurdular.^[3][2]