Seattle ye una ciudá portuaria del estáu norteamericanu de Washington, sede alministrativa del condáu de King. La so población estimada pal 2019, de 753.675 habitantes, faen d'ella la ciudá mayor del estáu y tamién de la rexón pacífica del noroeste, y tamién la ciudá de mayor crecimientu en tol país. El so área metropolitana, con alredor de 3,6 millones d'habitantes, ye la decimoquinta mayor del país. La ciudá asítiase nun ismu perestrenchu ente Puget Sound (una ensenada nel océanu Pacíficu y el llagu Washington, a unos 160 km de la frontera con Canadá. El so puertu, ún de los más importantes pal comerciu d'Estaos Xuníos con Asia, ye'l octavu del país y el novenu d'América del Norte pol volume del so tráficu de contenedores.