L'Empire State Building ye un rascacielos de 102 plantes asitiáu nel Midtown Manhattan, na ciudá d'Estaos Xuníos de Nueva York, nel cruce de la Quinta Avenida cola Cai 34. Tien un altor de 381 m edificaos, que son 443,2 m si contamos l'altor de la antena que tien nel so cumal. El so nome vién-y del alcuñu del estáu de Nueva York, que ye conocíu como l'estáu del imperiu. Foi l'edificiu más altu del mundu demientres cuarenta años, dende qu'acabó la so construcción en 1931 hasta qu'acabaron les obres de la torre norte del World Trade Center en 1971. Cuando esta y la so torre ximielga foron valtaes por un atentáu terrorista el 11 de setiembre de 2001 l'Empire State foi otra vuelta el más altu de la ciudá. Y foilo hasta que lu sobrepasó, el 30 d'abril de 2012, el One World Trade Center, entá en construcción nel solar dexáu poles torres del World Trade Center orixinal. Anguaño l'edificiu ye'l terceru completáu más altu de los Estaos Xuníos, dempués de la Willis Tower de Chicago y del Trump International Hotel and Tower, asitiáu tamién en Chicago, y el ventenu segundu mayor del mundu.