Artista y políticu español From Wikipedia, the free encyclopedia
Antonio Cantó García del Moral (14 de xineru de 1965, Valencia), conocíu como Toni Cantó, ye un actor y políticu español, diputáu del Congresu de los Diputaos d'España por UPyD ente avientu de 2011 y abril de 2015 y repite escañu por Valencia dende'l 13 de xineru de 2016 con Ciudadanos. En xunetu de 2015, en perdiendo'l congresu a la direición d'UPyD la candidatura d'Irene Lozano (Renovadores) na cual diba númberu dos, dexa'l partíu pa integrase nes llistes de Ciudadanos.
Toni Cantó conoció a l'actriz Eva Cobo en 1986, empecipiando una rellación sentimental dos años más tarde. En 1992 ella quedó embarazada y, dos meses enantes de dar a lluz, rompíen la rellación. Cantó interpunxo una demanda escontra Eva Cobo negando la paternidá de la so fía Carlota y la consiguiente pensión de mantención. Tres trés años de batalles xudiciales,[2] dambos llegaron a un alcuerdu, retirando Cantó la denuncia y dándo-y los sos apellíos a la neña. Darréu la rellación ente ellos ameyoró, realizando ésti numberoses visites a la so fía.[3] El 29 de xineru de 2011 Carlota, la fía de Toni Cantó y Eva Cobo, muerre nun accidente de tráficu nel qu'un conductor kamikaze que circulaba en sentíu contrariu y que quintuplicaba la tasa d'alcohol permitida, topeta frontalmente contra'l coche nel que viaxaben dambos mozos.[4][5]
Cantó tien otros dos fíos: Lucas (2003), ñacíu de la so rellación cola presentadora de televisión Carla Hidalgo;[6] y Violeta ñacida en 2006, cola actriz Mar Regueras.[7] Casóse'l 23 de mayu de 2010 n'Eivissa, con una moza canaria, terapeuta d'oficiu, llamada Inma Suárez, de la que se dixebraba un añu más tarde.[8]
Nos caberos años tuvo na política activa al traviés de delles organizaciones y partíos políticos. La so carrera política entama con Ciudadanos, partíu al que s'afilió en 2006. Al pie d'esti partíu manifestóse en contra de la política llingüística nel sistema educativu de la Xeneralidá de Cataluña. Sicasí, pa les eleiciones municipales d'España de 2007 decidió centrase na política municipal del pueblu nel que moraba, Torrelodones, siendo'l candidatu númberu 5 de Vecinos por Torrelodones (VxT).[9] VxT algamó 4 conceyales, asina que Toni Cantó nun consiguió acta de conceyala.[10]
Dende 2008 hasta 2015 militó n'Unión Progresu y Democracia (UPyD), y defendió en delles ocasiones la unidá d'España, la llucha contra los nacionalismos periféricos, la necesidá de la reforma de la llei eleutoral y, especialmente, la necesidá d'una nueva llei d'educación que faiga realmente partes a los ciudadanos de la cultura y l'arte.[11] En 2011 preséntase postreru nes llistes nes eleiciones autonómiques de Madrid por UPyD. Coles mesmes, el 17 de setiembre ye escoyíu en eleiciones primaries como cabezaleru de llista por Valencia de cara a les eleiciones xenerales del 20 de payares de 2011,[12] llogrando l'escañu que lu lleva al Congresu. El diputáu, escoyíu por Valencia anque residente en Madrid, arrenunció a les dietes pol ADSL na so casa y a les dietes d'agospiamientu.[13] Nel Congresu de los Diputaos exerció de voceru d'UPyD nes comisiones de Cultura, Igualdá, Polítiques Integrales de la Discapacidá, Seguridá Vial y Movilidá Sostenible, Agricultura, Alimentación y Mediu Ambiente y Pidimientos. Tuvo coles mesmes ascritu a les comisiones d'Educación y Deporte y Cooperación Internacional pal Desenvolvimientu.[14]
.jpg)
El 13 de setiembre de 2014 Toni Cantó anunció que va encabezar la candidatura de la formación a la Xeneralidá nes eleiciones de 2015, pa liderar "una tercer vía" escontra "la corrupción" qu'afara la comunidá,[15] lo cual oficializóse'l 11 d'ochobre de 2014. A les primaries tamién se presentaron otros dos candidatos, Ernesto Santillán y José Vera, anque'l 17 d'ochobre se retiró del procesu José Vera. Finalmente, el 18 d'ochobre celebraron les primaries abiertes de la formación, de les cualos salió como candidatu a la presidencia de la Xeneralidá Toni Cantó por un 73,2%.[16] Amás d'esto, UPyD, Vox y Ciudadanos punxéronse en contautu p'analizar la creación d'un frente común na Comunidá Valenciana.[17]
Anque anunció que dexaría'l so escañu nel Congresu pa presentase como candidatu a Presidente de la Xeneralidá Valenciana por UPyD nes eleiciones a les Cortes Valencianes de 2015,[16] el 7 d'abril de 2015 anunció qu'arrenunciaba tanto a la so acta de diputáu como a la so candidatura a la presidencia del Gobiernu de la Comunidá Autónoma Valenciana, poles sos discrepancies cola cúpula del so partíu.[18] Sicasí, siguió tando afiliáu a UPyD hasta'l congresu estraordinariu de xunu de 2015. Toni participó cola tamién diputada por UPyD, Irene Lozano, nuna de les candidatures presentaes a liderar el partíu (Renovadores), pero finalmente foi ganada pol hasta entós númberu dos de Rosa Díez, Andrés Herzog. Tres esta derrota Toni anunció que se daba de baxa del partíu y pocu dempués anuncióse la so participación nes primaries de Ciudadanos como independiente, siendo escoyíu'l númberu dos por Valencia nes eleiciones xenerales d'España de 2015.[19] El 19 de xunetu de 2015, una noticia del diariu El Mundo reveló que'l 25 de marzu de 2015, trés díes depués del fracasu eleutoral d'UPyD nes eleiciones Andaluces, Toni Cantó y Albert Rivera axuntáronse y pactaron l'arrenunciu d'esti a ser el candidatu d'UPyD a la presidencia de la Xeneralidá Valenciana. L'alcuerdu incluyía que Toni Cantó intentara ganar el congresu estraordinariu d'UPyD pa pasar el partíu en bloque a Ciudadanos y en casu de perdelo, como asina asocedió, Albert Rivera ufiertába-y ser el númberu dos de Ciudadanos por Valencia nes eleiciones xenerales d'España de 2015.
Fíu del doctor Antonio Cantó, entamó trabayando como modelu, y estudió nel Centru Dramáticu Nacional, nel branu de 1986 lléga-y la so primer oportunidá énte una cámara, nel magacín Tardar, de Televisión Española, acompañando a Pastora Vega y Guillermo Fesser.[20] Sicasí, namái permaneció unes selmanes en pantalla.
Un añu más tarde entama a presentar l'espaciu musical Sábado Noche, xera na que sigue hasta 1988 en compañía primero de Paola Dominguín y dempués de Lydia Bosch. Nel branu de 1988 s'incorpora al equipu de Por la mañana, el programa qu'Hermida realiza darréu en TVE, y que-y sirve d'escuela p'actuar énte una cámara.
_José_María_Aznar_se_reune_con_un_grupo_de_actores._Pool_Moncloa._7_de_octubre_de_1996_(cropped).jpeg)
Intervieno en delles series de televisión mientres la década de los noventa, como El Destino en sus manos (1995), Entre Naranjales (1996) o Querido Maestro (1998), nos caberos años díes de 1999 lléga-y el papel que, probablemente, apurrió-y mayor popularidá: el de David Pérez, un mozu qu'espierta dempués de dieciocho años en coma, na serie 7 vidas.
Anque Cantó namái participara nes dos primeres temporaes, ente 1999 y 2000, la popularidá repuesta déxa-y empecipiar nuevos proyeutos en televisión, como les series La ley de la vida (2000), en TVE, el programa de cámara oculta Mira, mira (2002-2003), en Canal 9, Living Lavapiés (2002), y En buena compañía (2006), éstes últimes en Telemadrid y na serie de FORTA De moda (2004), amás d'actuaciones puntuales nel anováu Estudio 1 (Pares y Nones, 2004; La doble historia del doctor Valmy, 2006).
En 2008 trabaya na serie d'Antena 3 700 euros, diario secreto de una call girl.
En 2009 protagoniza la serie de Telecinco Un golpe de suerte y dos años dempués y na mesma cadena trabaya, tamién como protagonista, en Vida loca, xunto a Esther Reguero, Miguel Ángel Muñoz y Lolita Flores.[21] La serie tuvo n'antena apenes unes selmanes.
En 2015 ficha pola cuarta temporada de "Amar es para siempre".
Compaxinó la so trayeutoria en televisión con una carrera interpretativa, tanto en cine como en teatru. Debuta na gran pantalla en 1986 con Oficiu de rapazos, de Carlos Romero Marchent. Nos años siguientes interpreta una ventena de películes, ente les que destaquen Tu nome envenena mis sueños (1996), de Pilar Miró y especialmente Todo sobre mí madre (1999), de Pedro Almodóvar.
En teatru debuta en 1988 con Los ochenta son nuestros, d'Ana Diosdado y dempués participó en Carmen, Carmen y en Hamlet.
En 1990 interpreta'l papel de Orestes en La Orestíada, de la mano del direutor José Carlos Plaza. Otres obres nos qu'intervieno inclúin:
Acreedores (1994)
| Añu | Categoría | Trabayu | Resultancia |
|---|---|---|---|
| 1999 | Meyor actor de televisión | 7 vidas | Finalista |
| 1996 | Meyor actor de teatru | La gata sobre el tejado de zinc | Candidatu |
| Añu | Categoría | Trabayu | Resultancia |
|---|---|---|---|
| 1999 | Meyor interpretación protagonista de televisión | 7 vidas | Candidato |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
.jpg)
.svg){kind=small}
.svg)
