From Wikipedia, the free encyclopedia
El Congresu Continental foi, inicialmente, una convención de delegaos de delles colonies britániques de Norteamérica qu'aconceyó nel contestu de la Revolución Americana. Foi la representación de los habitantes de les Trece Colonies qu'acabaron formando los Estaos Xuníos d'América. Tres de declarar les colonies independientes del Reinu de Gran Bretaña en 1776 entamó a funcionar como una estructura provisional de gobiernu pa los Estaos Xuníos, magar que la mayoría de les funciones propies del gobiernu quedaron en manes de los estaos, heriedes de les colonies. El términu aplícase, en sentíu estrictu, al Primer Congresu Continental de 1774 y al Segundu Congresu Continental de 1775-1781. En sentíu ampliu, sicasí, úsase tamién incluyendo la dómina del Congresu de la Confederación (1781-89), abarcando asina les trés asamblees de les Trece Colonies y los Estaos Xuníos que se reunieran ente 1774 y la inauguración d'una nueva forma de gobiernu, derivada de l'aplicación de la Constitución de los Estaos Xuníos, en 1789.
El Primer Congresu Continental, qu'aconceyó en respuesta a l'aprobación por parllamentu británicu de les nomaes Lleis Intolerables (Intolerable Acts) en 1774, buscó arreglar la deteriorada rellación ente'l gobiernu británicu y les sos colonies norteamericanes, pero reivindicando al empar los derechos de los colonos. El Segundu Congresu adoptó la Declaración d'Independencia en xunetu de 1776, que proclamó que les trece colonies yeren de magar estaos independientes y soberanos, non venceyaos a Gran Bretaña. Esti Segundu Congresu foi'l gobiernu provisional de los Estaos Xuníos hasta que la primer constitución del país, los Artículos de la Confederación (Articles of Confederation and Perpetual Union) entraron en vigor el 1 de marzu de 1781. Per esa primer llei el Segundu Congresu camudó'l so nome pol de Congresu de la Confederación (Congress of the Confederation). Esti cuerpu llexislativu unicameral aconceyó ocho vegaes primero de ser desaniciáu en 1789, cuando'l Congresu de los Estaos Xuníos tomó'l so llugar como muérganu del poder llexislativu del país.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
