militar italianu (1889–1977) From Wikipedia, the free encyclopedia
Xavier de Borbón-Parma (1889, Italia - 1977, Suiza), foi'l titular dinásticu del llexitimismu carlista ente los años 1936 y 1975, pero tamién xugó un papel importante demientres les dos guerres mundiales.
 | Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
Yera ún de los fíos del segundu matrimoniu de Roberto de Borbón-Parma, caberu Duque reinante en Parma hasta la unificación italiana, ya Infante de la Casa Real española, hasta que pola so participación nel Exércitu llexitimista de Carlos VII na Tercer Guerra Carlista (1872-1876), el Gobiernu lliberal de Madrid privó-y d'esa condición como de la ciudadanía española. Por esta razón a lo llargo de la etapa franquista, el Gobiernu como los periódicos afines a Don Xuan de Borbón calificaríen a Xavier de Borbón como un “pretendiente francés”.
Realizó estudios militares na Academia d'Artillería de Viena, de Ciencies Polítiques y Económiques na Universidá Católica de la Sorbona, y de Filosofía y Sagrada Teoloxía na Universidá Católica de Lovaina. Tamién yera inxenieru agrónomu.
Al finar los sos estudios empecipia la primer guerra mundial, manifestándose al empar que'l so primu Xaime III, titular dinásticu carlista ente 1909 y 1931, a favor de la República francesa frente al Imperiu alemán. Quiso ingresar nel exércitu francés pero nun foi posible en virtú d'una Llei prohibitiva que torgaba la entrada a los príncipes de la Casa de Borbón. Ingresaría nel exércitu belga, onde ascendería hasta comandante, con títulu de Estado Mayor. Combatió nos frentes inglés, belga y francés, distinguiéndose nes sangrines batalles de Verdún y Chemin des Dames, siéndo-y concedida pol so valor la «Croix de Guerre 1914-1918» de la República Francesa.
Testigu de los sufrimientos que ocasionaba el conflictu bélicu, y ante la perspeutiva d'una prolongación indefinida, Xavier y el so hermanu mayor Sixto, retrucaríen al llamamientu del Papa Benedicto XV en pro de la paz. Nesi sentíu intentaríen negociar ente los aliaos y Austria una paz separtada que obligase a Alemania a finar la guerra.
El Gobiernu de Viena foi favoratible al alcuerdu, sofitáu pola emperatriz Zita d'Austria, hermana de los dos príncipes de Parma, pero una indiscreción de Clemenceau, xefe del gobiernu francés, al falar del proyeutu col ministru italianu Sonnino, supondría el so fracasu.
Esta aventura foi reconstruyida munchos años más tarde demientres la década de 1990 nun episodiu de la serie de televisión El Xoven Indiana Jones, siendo los actores que representaben el papel de los príncipes Parma los coprotagonistes del episodiu. Pero por motivos desconocíos, na versión en llingua castellana de la Televisión Española, nun se mencionen los nomes y apellíos d'estos dos príncipes.
Ante la proximidá de la estinción de la llinia orixinal de la Dinastía carlista, el so tíu Alfonso Carlos I, titular dinásticu carlista ente 1931 y 1936, por Real Decretu a 23 de xineru de 1936 estableció una Rexencia na so persona, ensin privación “del so derechu eventual a la Corona”.
Por esa razón, tres el fallecimientu d'Alfonso Carlos I, el 1 d'ochobre Xavier de Borbón va ser investíu Príncipe Rexente por Manuel Fal Conde, máxima autoridá política del carlismu dende 1934. El mesmu día nel que Francisco Franco, nun nuevu golpe d'Estáu, yera proclamáu unillateralmente como Xefe del Gobiernu por una Xunta de Xenerales. A esi fechu le va siguir l'arrequexamientu del carlismu cola prohibición de l'Academia de Oficiales de Requetés, col fin d'evitar que'l Requeté se constituye como un Exércitu paralelu al regular; el Decretu de Militarización de les milicies, col fin de someter a los requetés al mandu militar regular; y el destierru de Manuel Fal Conde, acusáu de golpismu pol so proyeutu d'Academia y amenaciáu con un Conseyu de Guerra; dinámica que culmina col Decretu d'Unificación de 19 d'abril, al traviés del cual el carlismo ye illegalizáu, mientres que los sos bienes, llocales y periódicos son espropiaos.
Non muncho dempués del bombardeu de Gernika, y non muncho enantes del decretu por el que se suprimíen los conciertos económicos de Bizkaia y Gipuzkoa, en confrontación cola nueva llegalidá Xavier de Borbón visitaría la Casa de Xuntes para xurar los Fueros vascos. Dempués del bombardeu, enantes ante les intenciones falanxistes de talar l'Árbol foral, ésti tuvo que ser protexíu por un cinturón de requetés. Nel actu de xura, participaría Antonio Arrúe Zarauz, destacáu impulsor de la reconstrucción de l'Academia de la Llingua Vasca-Euskaltzaindia nos años vinientes. En payares Xavier entra nuevamente en territoriu español pa declarar espulsaos del carlismu a aquellos que collaborasen col partíu únicu, entrevistándose con Serrano Suñer, al que manifestó que yera contrariu a qu'en España se aplicasen los métodos de la Gestapo alemana, y con Francisco Franco, al cual le espresó la so oposición a la implantación del fascismu, pues tal réxime yera incompatible colos ideales polos que lluchaben los voluntarios del Requeté. Esta estancia en territoriu español finaría rápidamente cola so espulsión por orde gubernamental ya inspiración alemana.
Al iniciase la segunda guerra mundial en setiembre de 1939 foi movilizáu'l exércitu belga. Al ser invadida Bélxica poles fuercies del Tercer Reich alemán, Xavier de Borbón s'incorporaría como comandante d'artillería nel Estáu Mayor de la IV División, y al producise el desastre militar aconseyó al rei Lleopoldo que colase a Inglaterra, retirándose él a les llinies de Dunkerque.
Cuando la Italia de Mussolini entró na guerra, el gobiernu fascista le confiscó los sos bienes por consideralo un italianu (pol so llugar de nacencia) al serviciu del enemigu. La prensa española espublizó la noticia col envís de desacreditalo.
Dempués de la victoria alemana sobre Francia se tresllada cola so familia a Saint-Jean-de-Luz, onde ta diez días, y una vegada que los exércitos alemanes lleguen hasta ehí, marcha a Pau dende onde pensaba dir a Portugal, pero le foi denegáu'l permisu de pasu per territoriu español pol gobiernu de Franco; namás foi autorizáu'l pasu a la so madre, la so hermana Zita y otres señores de la so familia, pero llindáu únicamente a tres díes. Xavier de Borbón se treslladaría a la fastera central de Francia, fora del área d'ocupación alemana.
N'avientu de 1940 ye requeríu por Churchill, primer ministru de Gran Bretaña, y Pétain, xefe d'estáu del régime de Vichy, pa que participe na negociación secreta que se taba efectuando ente los sos respeutivos gobiernos; negociación que concluyó nunos pactos conocíos como «los alcuerdos Halifax-Chevalier». De común alcuerdu foi designáu árbitru na aplicación d'esi conveniu, gracies al cual los barcos franceses pudieron siguir tresportando alimentos a Francia nesti periodu d'escasez.
Les sos primeres actividaes cola Resistencia consistieron en tapecer na biesca del so castiellu a los xóvenes franceses que escapaben de los nazis pa nun ser deportaos a Alemania onde trabayaben ensin nengún salariu na industria alemana. Más alantre, una vegada que los alemanes entraron na Francia non ocupada, pasó a dirixir la Resistencia na rexón d'Allier y personalmente mandaba un maquis de 120 partisanos.
Nes lluches del branu de 1944, poco dempués del desembarcu aliáu en Francia, foi deteníu. Yera'l 22 de xunetu de 1944. Foi conducíu a Vichy onde permaneció un mes na carcele de la Gestapo, siendo condergáu a muerte acusáu de terrorista, comunista y axente inglés.
La demora de la sentencia pa dar a la so execución idéntica forma que la sofrida por un oficial alemán, víctima d'otru maquis, permitió la intervención de Pétain, visitáu pola esposa de Xavier de Borbón, ante'l mandu militar alemán pa que saliera de la carcele de la Gestapo y pasase a la xurisdicción ordinaria militar.
De Vichy foi treslladáu a la carcele de Clermont-Ferrand onde foi clasificáu como prisioneru oficialmente desapaecíu siendo marcaes les ropes coles lletres NN. Xunto con otros prisioneros ye conducíu al campu de estermín de Natzweiler asitiáu n'Alsacia. Pero la proximidá de les tropes aliaes provocó la evacuación d'esti campu y el so treslladu a Dachau.
El tren que los llevaba foi bombardeáu y nel incendiu foron quemaes les fiches de los deteníos, colo cual los alemanes, perdieron por un tiempu la so llocalización. Reconocíu en Dachau, foi salváu pol incendiu provocáu nos ficheros del campu por unos republicanos españoles que tamién taben ehí.
Foi nuevamente identificáu meses más tarde, pero yá nun momentu en que a los alemanes les interesaba caltener como rehenes a personalidaes importantes. Ante'l avance de les fuercies americanes en Baviera, Dachau foi evacuáu, y va ser teaslladáu a Prax nel Tirol, xunto a prisioneros importantes d'otros campos, como'l dirixente socialista León Blum, que nes sos memories al esplicar esos momentos lo cita de la viniente manera: “el Príncipe Xavier (…) del que daprenderemos a amar la sencillez perfecta y la bondá (…) que se llevantó n'armes contra la Gestapo”.
L'ochu de mayu de 1945 tropes americanes procedentes d'Italia consiguieron lliberar al grupu de rehenes. La noticia de la lliberación va ser celebrada con allegría polos carlistes, por embargu en Pamplona tres l'actu relixosu desendolcáu na Catedral hebo una carga de la Policía Armada contra los carlistes, que derivó nun tiroteu mutuu, con nueve policíes y trés carlistes ferios, seis (cuatro policíes y dos carlistes) d'ellos por arma de fueu. Posteriormente hebo 103 carlistes deteníos.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
