Santuariu de La nuesa Señora de Contrueces
From Wikipedia, the free encyclopedia
El santuariu de La nuesa Señora de Contrueces ye un templu católicu que s'atopa na comunidá d'Asturies, na zona sur del área urbana de Xixón, nel barriu de Contrueces. Ye un importante iconu na historia de Xixón, una y bones la Virxe que se venera nesti templu foi considerada per gran parte de los xixoneses mientres munchos años como la patrona de la ciudá. Los primeros documentos que dan fe de la esistencia d'esta ilesia daten de principios del sieglu X y provienen del Llibru de los testamentos, onde se recueye un documentu robláu'l 28 d'agostu de 905 en Cortuloces —suburbiu de Xixón— a favor de la ilesia d'Ourense, nel que se cita la confirmación del rei Alfonso III y la so esposa doña Jimena. Pol Diploma d'Ourense del sieglu X (o XI), el del Monesteriu de San Vicente, el de Sampiro y otros más siguen les referencies a esta ilesia.
Santuariu de La nuesa Señora de Contrueces | |
---|---|
santuariu | |
| |
![]() | |
Llocalización | |
País | ![]() |
Autonomía | ![]() |
Provincia | ![]() |
Conceyu | ![]() |
Coordenaes | 43°31′02″N 5°39′46″W |
Historia y usu | |
Diócesis | Archidiócesis d'Uviéu |
Arquiteutura | |
Estilu | arquiteutura herreriana |
![]() |
Del sieglu XII al XVI abre un periodu escuru del que nun llegaron noticies. En 1636 los vecinos punxeron de manifiestu la necesidá d'entamar una feria en Contrueces, yá que d'esa forma fomentábase la devoción a la Virxe al empar que s'esperaba tuviera una gran repercusión económica pol aumentu de transaiciones de compra y venta de ganáu caballar, vacunu y mular, que se llevaba a cabu pela redolada del santuariu aprovechando la gran arribación de fieles. L'alloñanza del santuariu fizo que la ermita de la Virxe de Begoña recibiera un bon númberu de fieles y acabara siendo considerada patrona del barriu de la Fonte Vieya onde s'atopaba, nel centru de la ciudá, polo que pasó a llamase «barriu de Begoña». Sicasí, munchos xixoneses siguen allegando al santuariu de la Virxe de Contrueces el domingu siguiente a la fiesta de la Virxe de Begoña.[1]
Frente al santuariu y a unos 50 m hai un palaciu que sirvió d'asilu, seminariu y colexu infantil. Nes dómines en que taba vacíu soler frecuentar l'escritor y políticu ilustráu Gaspar Melchor de Xovellanos, por consideralo bien afechu pa escribir, meditar y rezar. Anguaño ye un colexu d'enseñanza primaria dirixíu polos claretianos.