Paleontoloxía
ciencia qu'estudia los fósiles de seres vivos pasaos / From Wikipedia, the free encyclopedia
La paleontoloxía (del griegu «παλαιος» palaios = antiguu, «οντο» onto = ser, «-λογία» -logía = tratáu, estudiu, ciencia) ye la ciencia natural qu'estudia ya interpreta el pasáu de la vida sobre la Tierra al traviés de los fósiles.[1] Encuádrase dientro de les ciencies naturales, tien un cuerpu de doctrina propiu y comparte fundamentos y métodos cola xeoloxía y la bioloxía coles que s'integra estrechamente.
Ente los sos oxetivos tán, amás de la reconstrucción de los seres vivos que vivieron nel pasáu, l'estudiu del so orixe, de los sos cambeos nel tiempu (evolución y filoxenia), de les rellaciones ente ellos y cola so redolada (paleoecoloxía, evolución de la biosfera), de la so distribución espacial y migraciones (paleobioxeografía), de les estinción, de los procesos de fosilización (tafonomía) o de la correlación y datación de les roques que los contienen (bioestratigrafía).
La Paleontoloxía dexa entender l'actual composición (biodiversidá) y distribución de los seres vivos sobre la Tierra (bioxeografía) —antes de la intervención humana—, apurrió pruebes indispensables pa la solución de dos de les más grandes discutinios científicos del pasáu sieglu, la evolución de los seres vivos y la deriva de los continentes, y, de cara al nuesu futuru, ufierta ferramientes pal analís de cómo los cambeos climáticos pueden afectar al conxuntu de la biosfera.