Organización territorial de los Estaos Xuníos
From Wikipedia, the free encyclopedia
La organización territorial político-alministrativa de los Estaos Xuníos abarca'l conxuntu de les diverses entidaes de gobiernu del so territoriu que, en conxuntu, formen los Estaos Xuníos d'América: estaos, el distritu de Columbia, los territorios y les reserves indies.
La división político-alministrativa de primer nivel de los Estaos Xuníos ye l'estáu. Hai 50 estaos, xuníos ente sí pa formar un estáu federal. Cada estáu tien la xurisdicción gubernamental completa sobre un territoriu xeográficu concretu, nel que comparte la soberanía col gobiernu federal de los Estaos Xuníos. Acordies con numberoses resoluciones del Tribunal Supremu de los Estaos Xuníos, neto los 50 estaos individuales que'l gobiernu federal son caún xurisdicciones soberanes[1].
Tolos gobiernos estatales tienen una estructura idéntica a la del gobiernu federal, con trés rames: executiva, llexislativa y xudicial[2]. Caltienen plenos poderes pa llexislar con total autonomía sobre les cuestiones non reservaes al gobiernu federal na Constitución, los estatutos federales o suxetes a trataos ratificaos pol Senáu, y organícense como sistemes presidenciales nos que'l gobernador ye, al tiempu, xefe de gobiernu y del estáu.
Los estaos sodivídense en condaos, que son la xunidá político-alministrativa de segundu nivel. Louisiana usa'l términu parish (parroquia) pa referise a les sos sodivisiones, y Alaska el terminu borough (burgu); dambes entidaes son, a efeutos censales, los equivalentes de los condaos nesos estaos. La estructura político-alministrativa de tercer nivel son les township (conceyos), o los sos equivalentes a efeutos censales, nomaes town, nos estaos de Nueva York, Nueva Inglaterra y Wisconsin. La sodivisión del territoriu de los condaos en townships o towns apaez en venti de los estaos del país, mayoritariamente nel Noreste y el Mediu Oeste del país[3].
Les entidaes de población pueden organizase en diversos tipos d'entidaes municipales: ciudaes incorporaes, towns, villages... Los conceyos, reciban el nome que reciban, avecen a tar subordinaos alministrativamente a un condáu, con delles esceiciones. Asina, delles ciudaes consolidaron el so gobiernu condal formando ciudaes-condáu consolidaes. En Virxinia les ciudaes son completamente independientes de los condaos, pese a que tán asentaes nel so territoriu; y en dellos estaos, especialmente de Nueva Inglaterra, les towns formen la unidá básica de gobiernu llocal perbaxu del nivel estatal.
El gobiernu de caún de los cinco territorios con población permanente siguen tamién el modelu d'organización del gobiernu federal. Les sos sodivisiones reciben nomes diferentes: Puerto Rico tien 78 municipios, y les Islles Marianes del Norte tienen 4 municipios, mentantu que Guam sodivídese en villages, les Islles Vírxenes Americanes en distritos y la Samoa Americana tien distritos y atolones "non organizaos".
Otres sodivisiones subnacionales inclúin el distritu de Columbia, delles islles menores sin población permanente y reserves indies, toos ellos alministraos pol gobiernu federal. Cada reserva india tien sodivisiones diferentes: la de la nación navaja sodivídese n'axencies y cases capitulares, y la de la nación blackfeet en comunidaes. El gobiernu federal tien tamién xurisdicción esclusiva sobre les instalaciones militares, embaxaes y consulaes llocalizaos n'otros países.