Megalópolis
conxuntu d'árees metropolitanes axacentes / From Wikipedia, the free encyclopedia
Una megalópolis (del griegu Μεγάλη (Megáli) -gran- πόλις (pólis) -ciudad-) ye una agrupación urbana qu'aveza a ser definida como una cadena d'árees metropolitanes axacentes, bien con continuidá espacial ente elles o con pequeños espacios ente elles, que pol so crecimientu espacial acaben poniéndose en contautu y formando una rexón urbana continua. El términu tien un significáu asemeyáu al de megaciudá, magar que nun son equivalentes.
El términu utilizolu por primer vegada en 1915 Patrick Geddes, nel so llibru Cities in Evolution,[1], y dempués por Oswald Spengler en La decayencia d'Occidente (1918) y por Lewis Mumford en The culture of cities (1938), que les describía como la primer etapa nel sobredesarrollu urbanu y el so declive social. Sicasí, el que-y dio'l so significáu actual foi Jean Gottmann nel so llibru de 1961 Megalopolis: The Urbanized Northeastern Seaboard of the United States, nel que lu usó pa describir la cadena d'árees metropolitanes de la costa nororiental d'Estaos Xuníos (nomada BosWash), estendida dende Boston a Washington D.C. y qu'inclúi tamién a Nueva York, Filadelfia y Baltimore[2][3][4].
Nun hai una definición clara y consensuada de cuála ye la población qu'una cadena de ciudaes tien qu'axuntar pa poder ser definida como una megalópolis o megarrexón. Gottman consideraba que lo yeren si había nella una población de 25 millones de persones[5], mentantu que Doxiadis, qu'estudió la megalópolis de los Grandes Llagos, consideraba que bastaba qu'una agrupación similar tuviera 10 millones d'habitantes pa poder considerala una megalópolis pequeña[6][7][8]. Ye fácil atopar exemplos d'elles, pues cualquier ciudá grande acaba arrodiada por ciudaes satélites, más pequeñes. Cuando la rede s'estiende alcontramos ciudaes que son a la so vegada satélites de varies d'eses ciudaes, y fórmase una megalópolis, un conceptu útil pa la planificación rexonal de les víes de comunicación y el tresporte.