Llonxitú d'onda

La llonxitú d'onda^[1] ye un parámetru físicu qu'indica el tamañu d'una onda y que polo xeneral denótase cola lletra griega lambda (λ).

Llonxitú d'onda
Distancia, cantidá física y periodo (es)

Pa ondes sinusoidales defínese como la distancia, midida na direición de propagación de la onda, ente dos puntos que tienen un estáu de movimientu idénticu,como por exemplu cumes o valles axacentes.

Na figura axunta, l'exe x representa la distancia recorría pola perturbación, mentantu que nel exe y representa un parámetru físicu en función de x, como pue ser la presión del aire pa ondes sonores, o el valor del campu llétricu o magnéticu pa ondes eleutromagnétiques.

Nel Sistema Internacional, la unidá de midida de la llonxitú d'onda ye'l metru, lo mesmo que cualesquier otra distancia. Daos los órdenes de magnitú d'esti parámetru, por comodidá suel recurrise a submúltiplos como'l milímetru (mm), el micrómetru (μm) y el nanómetru (nm).

Rellación cola frecuencia

Representación d'una onda sinusoidal. Wavelegth=Llonxitú d'onda.

La llonxitú d'onda λ ye inversamente proporcional a la frecuencia f, siendo ésta la frecuencia del movimientu armónicu cenciellu de cada una de les partícules del mediu. Nun hai de trafulcalo cola frecuencia angular ω:

${\displaystyle \omega =2\pi f\,}$

Sabiendo que les ondes viaxen al traviés de los desemeyaos medios a una velocidá d'onda determinao (que depende de les propiedaes d'estos), pue definise la llonxitú d'onda como'l cociente ente tala velocidá y la frecuencia de la onda:

${\displaystyle \lambda ={\frac {v}{f}}}$

au:

• λ ye la llonxitú d'onda d'una onda sonora o una onda eleutromagnética
• v ye la velocidá de propagación de la onda (soníu=340 m/s), y
• f ye la frecuencia dao n'hercios (1/s).

Por exemplu, al tratar ondes eleutromagnétiques, la velocidá de transmisión d'éstes nel vacíu ye la velocidá de la lluz (299,792,458 metros por segundo).

Medios desemeyaos al vacíu

Les úniques ondes que son quien a tresmitise a traviés del vacíu son les ondes eleutromagnétiques. Cuando éstes caltrien nun mediu material, como por exemplu l'aire o un sólidu, la so llonxitú d'onda vese amenorgada de mena proporcional al índiz de refraición n de talu material, metantu que la so frecuencia caltiénse invariable.

La llonxitú d'onda en tal mediu (λ') vien dao por:

${\displaystyle \lambda ^{\prime }={\frac {\lambda _{0}}{n}}}$

au:

• λ₀ ye la llonxitú d'onda nel vacíu, y
• n ye l'índiz de refraición del material.

La llonxitú d'onda de les radiaciones eleutromagnétiques, seya cual seya'l mediu nel que se tresmitan, esprésase polo xeneral en función de la llonxitú d'onda d'éstes nel vacíu, magar que non siempres té indicáu espresamente.

Llonxitú d'onda asociada a partícules

Louis-Victor de Broglie descubrió que toles partícules que calteníen una cantidá de movimientu teníen asociada una determinada llonxitú d'onda. Ye la denomada Hipótesis de De Broglie.

${\displaystyle \lambda ={\frac {h}{p}}}$

au:

• h ye la Constante de Planck, y
• p eye la cantidá de movimientu de la partícula.

El cociente ente una constante abondo pequeña y un denominador que depende de la velocidá de la partícula, fai que pa oxetos macroscópicos en movimientu les llonxitúes d'onda asociaes a éstos seyan incolumbrables pol ser humanu (siendo éstes menores qu'un fotón).

Ver tamién

• Amplitú
• Frecuencia y Frecuencia angular
• Onda periódica
• Dualidá onda corpúsculu
• Onda
• Propagación del soníu y Efeutu Doppler
• Espeutru eleutromagnéticu

Referencies

1. Esti términu apaez nel Diccionariu de l'Academia de la Llingua Asturiana. Ver: llonxitú

Enllaces esternos

• Ferramienta pa calcular y convertir ente llonxitú d'onda y frecuencia (castellán)

• Datos: Q41364
• Multimedia: Wavelength