![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/6/68/Barn_Swallow_-_Hirundo_rustica.ogv/640px--Barn_Swallow_-_Hirundo_rustica.ogv.jpg&w=640&q=50)
Hirundo rustica
especie de páxaru / From Wikipedia, the free encyclopedia
Les especies d'aves con nome común en llingua asturiana márquense como NOA. En casu contrariu, conséñase'l nome científicu.
L'Hirundo rustica, conocida comúnmente como andarina[4] ye una ave de vezos migratorios que pertenez a la familia de los hirundínidos, dientro del orde de los paseriformes. Trátase de l'andarina cola mayor área de distribución nel mundu. Habita n'Europa, Asia, África y América.
Esisten seis subespecies d'andarina, que se reproducen a lo llargo del hemisferiu norte. Cuatro d'elles son fuertemente migratories y los sos cuarteles d'ivernada cubren gran parte del hemisferiu sur, llegando a l'Arxentina central, Sudáfrica y el norte d'Australia.[5] La so vasta área de distribución y enorme población impliquen que la especie alcuéntrase fora de peligru d'estinción,[1][2] anque pueda haber decrecimientos poblacionales locales por cuenta d'amenaces específiques.[5][6]
L'andarina ye una ave de campu abierto que davezu utiliza estructures construyíes pol home pa reproducise y que, darréu d'ello, ensamara col espardimientu humanu. Constrúi nieros en forma de duernu,[7] con pellines de barro en tenaes y construcciones asemeyaes y aliméntase d'inseutos que garra esnalando.[8]
La so alimentación insectívora contribúi al bon acoyimientu de los humanos pa cola especie; antiguamente esta acoyida viose reforzada por supersticiones respeuto l'ave y el so nieru.[9]
Amás del nome andarina, ye conocida tamién por andolina[10], alandrina[11], andarica[12], golondra[13], golondrina[14] y volendrina[15]; les sos críes llámenes andarinos[16], y el so cantar, chiar[17].