Forma musical
From Wikipedia, the free encyclopedia
En música, forma musical nel so sentíu xenéricu designa tantu una estructura musical como una tradición d'escritura que dexa asitiar la obra musical na historia de la evolución de la creación musical. Añadíes a un títulu d'una obra, les distintes formes musicales como sinfonía, conciertu, preludiu, fantasía, etc. designen entós, tantu una estructura que se construyó a lo llargo del tiempu, como un xéneru musical particular, una composición musical qu'evolucionó mientres sieglos: ópera, danza, etc. En dambos casos, el conceutu de forma alude a la pertenencia a una categoría d'obra que tien unu o dellos criterios más o menos estrictos propios d'una estructura ―númberu de movimientos, estructura xeneral, proporciones, etc.― qu'a lo llargo de la historia convirtiéronse en prototipos, lo que nun torgó que siguieren evolucionando y escaeciendo dacuando los moldes del principiu, una y bones los compositores trabayen, amás de les temes, el ritmu, la melodía y l'harmonía.
Fálase tamién de formalismu cuando se fai usu d'una cierta téunica de composición (música serial) o d'una categoría d'obra que respeta un ciertu númberu d'usos, teóricos o históricamente inducíos.
Pero si'l conteníu de la música ye inefable, inmanente, la so inscripción na trama temporal del nuesu presente impríme-y al empar una estructura y una forma, qu'operen en nós tresformamientos incontrolables pola consciencia. La organización de la música nun ye d'orde intelectual salvo si la consideramos como una estructuración consciente que la teoría podría paralizar.