Festival Intercélticu de Lorient
festival musical na ciudá de Lorient / From Wikipedia, the free encyclopedia
El Festival intercélticu de Lorient (en bretón: Gouelioù Etrekeltiek An Oriant, en francés: Festival Interceltique de Lorient) ye un festival de música celta que se celebra na ciudá del mesmu nome, qu'aconceya cada añu na Bretaña francesa a los grupos de música céltica de les naciones celtes, y ye un puntu d'alcuentru de la cultura música y tradiciones de los diferentes países participantes. Tien llugar nos primeros díes d'agostu y ye'l mayor acontecimientu d'estes carauterístiques del mundu con una duración de diez díes.
El festival de Lorient ñació nel añu 1971 sobre una idea de Jean-Pierre Pichard p'acoyer la competición nacional de bagad. Nos años siguientes, convirtióse nun festival d'interceltismu pa diferenciase d'otros festivales asemeyaos de la redolada. A partir de finales de la década de 1990 convirtióse nun de los festivales de música más importantes de Francia pol númberu de visitantes, acoyendo a más de 800 000 persones y con 115 000 entraes vendíes en 2010. L'antepasáu d'esti Festival alcontrábase'n Brest, pero darréu foi la ciudá de Lorient la s'ufrió voluntaria p'acoyer l'eventu.
La programación del festival ta centrada nos conciertos, espectáculos y dances. Tamién ye la sede de competiciones musicales, como'l campeonatu nacional de bagad, de bailles como los de la federación War 'l leur. Organícense tamién otros eventos como desfiles y actividaes culturales. Tien una importante influencia nel territoriu, tanto no económico como no que cinca a los medios. El festival funciona como un actor cultural, permitiendo la creación y difusión de la cultura de Bretaña y de les naciones celtes.
Les naciones participantes son: Irlanda (Éire), Escocia (Alba), Bretaña (Breizh), Gales (Cymru), islla de Man (Mannin), Cornualles (Kernow), Galicia y Asturies. Dende l'añu 2000, nomáu Añu del mundu celta viénense sumando representaciones de países con fuerte emigración de los países celtes como EEXX, Australia, Nueva Zelanda, Arxentina, Méxicu, ya inclusive Rumanía ya Italia.
Una particularidá del festival ye que cada añu ta dedicáu a un país celta del mundu siendo'l 1998 dedicáu a Asturies, en 2007 foi l'añu d'Escocia, en 2006 el d'Australia o'l 2005 el d'Irlanda. Nel 2008 tuvo dedicáu a Gales, el 2009 a Galicia y l'añu 2010 a Bretaña.
Dende primeros del añu 2007, l'asturianu Lisardo Lombardía toma'l relevu de Jean-Pierre Pichard na direición d'esti festival.